2. а̄ва̄сикаваттакатха̄

358. тена кхо пана самайена а̄ва̄сика̄ бхиккхӯ а̄гантуке бхиккхӯ дисва̄ нева а̄санам̣ пан̃н̃апенти, на па̄додакам̣ па̄дапӣт̣хам̣ па̄дакатхаликам̣ упаниккхипанти, на паччуггантва̄ паттачӣварам̣ пат̣игган̣ханти, на па̄нӣйена пуччханти [на па̄нӣйена пуччханти, на парибходжанӣйена пуччханти (сйа̄. кам̣.)], на вуд̣д̣хатарепи а̄гантуке бхиккхӯ абхива̄денти, на сена̄санам̣ пан̃н̃апенти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄ва̄сика̄ бхиккхӯ а̄гантуке бхиккхӯ дисва̄ нева а̄санам̣ пан̃н̃апессанти, на па̄додакам̣ па̄дапӣт̣хам̣ па̄дакатхаликам̣ упаниккхиписсанти, на паччуггантва̄ паттачӣварам̣ пат̣иггахиссанти, на па̄нӣйена пуччхиссанти, вуд̣д̣хатарепи а̄гантуке бхиккхӯ на абхива̄дессанти, на сена̄санам̣ пан̃н̃апессантӣ’’ти! атха кхо те бхиккхӯ бхагавато етаматтхам̣ а̄рочесум̣…пе… саччам̣ кирам̣, бхиккхаве…пе… саччам̣ бхагава̄ти…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси –

359. ‘‘тена хи, бхиккхаве, а̄ва̄сика̄нам̣ бхиккхӯнам̣ ваттам̣ пан̃н̃апесса̄ми йатха̄ а̄ва̄сикехи бхиккхӯхи самма̄ ваттитаббам̣. а̄ва̄сикена, бхиккхаве, бхиккхуна̄ а̄гантукам̣ бхиккхум̣ вуд̣д̣хатарам̣ дисва̄ а̄санам̣ пан̃н̃апетаббам̣, па̄додакам̣ па̄дапӣт̣хам̣ па̄дакатхаликам̣ упаниккхипитаббам̣, паччуггантва̄ паттачӣварам̣ пат̣иггахетаббам̣, па̄нӣйена пуччхитаббо [па̄нӣйена пуччхитаббо, парибходжанӣйена пуччхитаббо (сйа̄.)]. саче уссахати, упа̄хана̄ пун̃чхитабба̄. упа̄хана̄ пун̃чхантена пат̣хамам̣ суккхена чол̣акена пун̃чхитабба̄, паччха̄ аллена. упа̄хана̄пун̃чханачол̣акам̣ дховитва̄ [дховитва̄ пӣл̣етва̄ (сйа̄.)] екамантам̣ виссаджджетаббам̣.

‘‘а̄гантуко бхиккху вуд̣д̣хатаро абхива̄детаббо. сена̄санам̣ пан̃н̃апетаббам̣ – ‘етам̣ те сена̄санам̣ па̄пун̣а̄тӣ’ти. аджджха̄вут̣т̣хам̣ ва̄ анаджджха̄вут̣т̣хам̣ ва̄ а̄чиккхитаббам̣. гочаро а̄чиккхитаббо. агочаро а̄чиккхитаббо. секкхасаммата̄ни кула̄ни а̄чиккхитабба̄ни. ваччат̣т̣ха̄нам̣ а̄чиккхитаббам̣. пасса̄ват̣т̣ха̄нам̣ а̄чиккхитаббам̣. па̄нӣйам̣ а̄чиккхитаббам̣. парибходжанӣйам̣ а̄чиккхитаббам̣. каттарадан̣д̣о а̄чиккхитаббо. сан̇гхасса катикасан̣т̣ха̄нам̣ а̄чиккхитаббам̣ – ‘имам̣ ка̄лам̣ пависитаббам̣, имам̣ ка̄лам̣ никкхамитабба’нти.

‘‘саче навако хоти, нисиннакенева а̄чиккхитаббам̣ – ‘атра паттам̣ никкхипа̄хи, атра чӣварам̣ никкхипа̄хи, идам̣ а̄санам̣ нисӣда̄хӣ’ти. па̄нӣйам̣ а̄чиккхитаббам̣. парибходжанӣйам̣ а̄чиккхитаббам̣. упа̄хана̄пун̃чханачол̣акам̣ а̄чиккхитаббам̣. а̄гантуко бхиккху навако абхива̄да̄петаббо. сена̄санам̣ а̄чиккхитаббам̣ – ‘етам̣ те сена̄санам̣ па̄пун̣а̄тӣ’ти. аджджха̄вут̣т̣хам̣ ва̄ анаджджха̄вут̣т̣хам̣ ва̄ а̄чиккхитаббам̣. гочаро а̄чиккхитаббо. агочаро а̄чиккхитаббо. секкхасаммата̄ни кула̄ни а̄чиккхитабба̄ни. ваччат̣т̣ха̄нам̣ а̄чиккхитаббам̣. пасса̄ват̣т̣ха̄нам̣ а̄чиккхитаббам̣. па̄нӣйам̣ а̄чиккхитаббам̣. парибходжанӣйам̣ а̄чиккхитаббам̣. каттарадан̣д̣о а̄чиккхитаббо. сан̇гхасса катикасан̣т̣ха̄нам̣ а̄чиккхитаббам̣ – ‘имам̣ ка̄лам̣ пависитаббам̣, имам̣ ка̄лам̣ никкхамитабба’нти. идам̣ кхо, бхиккхаве, а̄ва̄сика̄нам̣ бхиккхӯнам̣ ваттам̣ йатха̄ а̄ва̄сикехи бхиккхӯхи самма̄ ваттитабба’’нти.