1. саммукха̄винайо

185. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чхаббаггийа̄ бхиккхӯ асаммукхӣбхӯта̄нам̣ бхиккхӯнам̣ камма̄ни каронти – таджджанӣйампи, нийассампи, пабба̄джанӣйампи, пат̣иса̄ран̣ӣйампи, уккхепанӣйампи. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ асаммукхӣбхӯта̄нам̣ бхиккхӯнам̣ камма̄ни кариссанти – таджджанӣйампи, нийассампи, пабба̄джанӣйампи, пат̣иса̄ран̣ӣйампи, уккхепанӣйампӣ’’ти! атха кхо те бхиккхӯ бхагавато етаматтхам̣ а̄рочесум̣…пе… ‘‘саччам̣ кира, бхиккхаве, чхаббаггийа̄ бхиккхӯ асаммукхӣбхӯта̄нам̣ бхиккхӯнам̣ камма̄ни каронти – таджджанӣйампи, нийассампи, пабба̄джанӣйампи, пат̣иса̄ран̣ӣйампи, уккхепанӣйампӣ’’ти? ‘‘саччам̣ бхагава̄’’ти. вигарахи буддхо бхагава̄ – ‘‘анануччхавикам̣, бхиккхаве, тесам̣ могхапуриса̄нам̣ анануломикам̣ аппатирӯпам̣ асса̄ман̣акам̣ акаппийам̣ акаран̣ӣйам̣. катхан̃хи на̄ма те, бхиккхаве, могхапуриса̄ асаммукхӣбхӯта̄нам̣ бхиккхӯнам̣ камма̄ни кариссанти – таджджанӣйампи, нийассампи, пабба̄джанӣйампи, пат̣иса̄ран̣ӣйампи, уккхепанӣйампи! нетам̣, бхиккхаве, аппасанна̄нам̣ ва̄ паса̄да̄йа…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси – на, бхиккхаве, асаммукхӣбхӯта̄нам̣ бхиккхӯнам̣ каммам̣ ка̄таббам̣ – таджджанӣйам̣ ва̄, нийассам̣ ва̄, пабба̄джанӣйам̣ ва̄, пат̣иса̄ран̣ӣйам̣ ва̄, уккхепанӣйам̣ ва̄. йо кареййа, а̄патти дуккат̣асса.

186. ‘‘адхаммава̄дӣ пуггало адхаммава̄дӣ самбахула̄ адхаммава̄дӣ сан̇гхо. дхаммава̄дӣ пуггало дхаммава̄дӣ самбахула̄ дхаммава̄дӣ сан̇гхо.

кан̣хапаккханавакам̣

187. ‘‘адхаммава̄дӣ пуггало дхаммава̄дим̣ пуггалам̣ сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти. еван̃четам̣ адхикаран̣ам̣ вӯпасаммати, адхаммена вӯпасаммати саммукха̄винайапатирӯпакена.

‘‘адхаммава̄дӣ пуггало дхаммава̄дӣ самбахуле сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣хатха, имам̣ рочетха̄ти. еван̃четам̣ адхикаран̣ам̣ вӯпасаммати, адхаммена вӯпасаммати саммукха̄винайапатирӯпакена.

‘‘адхаммава̄дӣ пуггало дхаммава̄дим̣ сан̇гхам̣ сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти [имам̣ ган̣хатха, имам̣ рочетха̄ти (ка.)]. еван̃четам̣ адхикаран̣ам̣ вӯпасаммати, адхаммена вӯпасаммати саммукха̄винайапатирӯпакена.

‘‘адхаммава̄дӣ самбахула̄ дхаммава̄дим̣ пуггалам̣ сан̃н̃а̄пенти ниджджха̄пенти пеккхенти анупеккхенти дассенти анудассенти – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти. еван̃четам̣ адхикаран̣ам̣ вӯпасаммати, адхаммена вӯпасаммати саммукха̄винайапатирӯпакена.

‘‘адхаммава̄дӣ самбахула̄ дхаммава̄дӣ самбахуле сан̃н̃а̄пенти ниджджха̄пенти пеккхенти анупеккхенти дассенти анудассенти – айам̣ дхаммо, айам̣ винайо, идам̣ саттхуса̄санам̣, имам̣ ган̣хатха, имам̣ рочетха̄ти. еван̃четам̣ адхикаран̣ам̣ вӯпасаммати, адхаммена вӯпасаммати саммукха̄винайапатирӯпакена.

‘‘адхаммава̄дӣ самбахула̄ дхаммава̄дим̣ сан̇гхам̣ сан̃н̃а̄пенти ниджджха̄пенти пеккхенти анупеккхенти дассенти анудассенти – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти. еван̃четам̣ адхикаран̣ам̣ вӯпасаммати, адхаммена вӯпасаммати саммукха̄винайапатирӯпакена.

‘‘адхаммава̄дӣ сан̇гхо дхаммава̄дим̣ пуггалам̣ сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти. еван̃четам̣ адхикаран̣ам̣ вӯпасаммати, адхаммена вӯпасаммати саммукха̄винайапатирӯпакена.

‘‘адхаммава̄дӣ сан̇гхо дхаммава̄дӣ самбахуле сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣хатха, имам̣ рочетха̄ти. еван̃четам̣ адхикаран̣ам̣ вӯпасаммати, адхаммена вӯпасаммати саммукха̄винайапатирӯпакена.

‘‘адхаммава̄дӣ сан̇гхо дхаммава̄дим̣ сан̇гхам̣ сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти. еван̃четам̣ адхикаран̣ам̣ вӯпасаммати, адхаммена вӯпасаммати саммукха̄винайапатирӯпакена.

кан̣хапаккханавакам̣ нит̣т̣хитам̣.

суккапаккханавакам̣

188. ‘‘дхаммава̄дӣ пуггало адхаммава̄дим̣ пуггалам̣ сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти. еван̃четам̣ адхикаран̣ам̣ вӯпасаммати, дхаммена вӯпасаммати саммукха̄винайена.

‘‘дхаммава̄дӣ пуггало адхаммава̄дӣ самбахуле сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣хатха, имам̣ рочетха̄ти. еван̃четам̣ адхикаран̣ам̣ вӯпасаммати, дхаммена вӯпасаммати саммукха̄винайена.

‘‘дхаммава̄дӣ пуггало адхаммава̄дим̣ сан̇гхам̣ сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти. еван̃четам̣ адхикаран̣ам̣ вӯпасаммати, дхаммена вӯпасаммати саммукха̄винайена.

‘‘дхаммава̄дӣ самбахула̄ адхаммава̄дим̣ пуггалам̣ сан̃н̃а̄пенти ниджджха̄пенти пеккхенти анупеккхенти дассенти анудассенти – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти. еван̃четам̣ адхикаран̣ам̣ вӯпасаммати, дхаммена вӯпасаммати саммукха̄винайена.

‘‘дхаммава̄дӣ самбахула̄ адхаммава̄дӣ самбахуле сан̃н̃а̄пенти ниджджха̄пенти пеккхенти анупеккхенти дассенти анудассенти – айам̣ дхаммо, айам̣ винайо, идам̣ саттхуса̄санам̣, имам̣ ган̣хатха, имам̣ рочетха̄ти. еван̃четам̣ адхикаран̣ам̣ вӯпасаммати, дхаммена вӯпасаммати саммукха̄винайена.

‘‘дхаммава̄дӣ самбахула̄ адхаммава̄дим̣ сан̇гхам̣ сан̃н̃а̄пенти ниджджха̄пенти пеккхенти анупеккхенти дассенти анудассенти – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти. еван̃четам̣ адхикаран̣ам̣ вӯпасаммати, дхаммена вӯпасаммати саммукха̄винайена.

‘‘дхаммава̄дӣ сан̇гхо адхаммава̄дим̣ пуггалам̣ сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти. еван̃четам̣ адхикаран̣ам̣ вӯпасаммати, дхаммена вӯпасаммати саммукха̄винайена.

‘‘дхаммава̄дӣ сан̇гхо адхаммава̄дӣ самбахуле сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣хатха, имам̣ рочетха̄ти. еван̃четам̣ адхикаран̣ам̣ вӯпасаммати, дхаммена вӯпасаммати саммукха̄винайена.

‘‘дхаммава̄дӣ сан̇гхо адхаммава̄дим̣ сан̇гхам̣ сан̃н̃а̄пети ниджджха̄пети пеккхети анупеккхети дассети анудассети – айам̣ дхаммо, айам̣ винайо, идам̣ саттхуса̄санам̣, имам̣ ган̣ха̄хи, имам̣ рочехӣти. еван̃четам̣ адхикаран̣ам̣ вӯпасаммати, дхаммена вӯпасаммати саммукха̄винайена̄’’ти.

суккапаккханавакам̣ нит̣т̣хитам̣.