2. сативинайо

189. [идам̣ ваттху па̄ра̄. 380 а̄дайо] тена самайена буддхо бхагава̄ ра̄джагахе вихарати вел̣уване каландаканива̄пе. тена кхо пана самайена а̄йасмата̄ даббена маллапуттена джа̄тийа̄ саттавассена арахаттам̣ саччхикатам̣ хоти. йам̣ кин̃чи са̄вакена паттаббам̣ саббам̣ тена ануппаттам̣ хоти. наттхи часса кин̃чи уттари [уттарим̣ (сӣ.)] каран̣ӣйам̣, катасса ва̄ патичайо. атха кхо а̄йасмато даббасса маллапуттасса рахогатасса пат̣исаллӣнасса евам̣ четасо паривитакко удапа̄ди – ‘‘майа̄ кхо джа̄тийа̄ саттавассена арахаттам̣ саччхикатам̣. йам̣ кин̃чи са̄вакена паттаббам̣ саббам̣ майа̄ ануппаттам̣. наттхи ча ме кин̃чи уттарикаран̣ӣйам̣, катасса ва̄ патичайо. ким̣ ну кхо ахам̣ сан̇гхасса веййа̄ваччам̣ кареййа’’нти?

атха кхо а̄йасмато даббасса маллапуттасса етадахоси – ‘‘йам̣нӯна̄хам̣ сан̇гхасса сена̄санан̃ча пан̃н̃апеййам̣ бхатта̄ни ча уддисеййа’’нти. атха кхо а̄йасма̄ даббо маллапутто са̄йанхасамайам̣ пат̣исалла̄на̄ вут̣т̣хито йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ даббо маллапутто бхагавантам̣ етадавоча – ‘‘идха майхам̣, бханте, рахогатасса пат̣исаллӣнасса евам̣ четасо паривитакко удапа̄ди – ‘майа̄ кхо джа̄тийа̄ саттавассена арахаттам̣ саччхикатам̣. йам̣ кин̃чи са̄вакена паттаббам̣, саббам̣ майа̄ ануппаттам̣. наттхи ча ме кин̃чи уттарикаран̣ӣйам̣, катасса ва̄ патичайо. ким̣ ну кхо ахам̣ сан̇гхасса веййа̄ваччам̣ кареййа’нти? тасса майхам̣, бханте, етадахоси – ‘йам̣нӯна̄хам̣ сан̇гхасса сена̄санан̃ча пан̃н̃апеййам̣ бхатта̄ни ча уддисеййа’нти. иччха̄махам̣, бханте, сан̇гхасса сена̄санан̃ча пан̃н̃а̄петум̣ бхатта̄ни ча уддиситу’’нти. ‘‘са̄дху са̄дху, дабба. тена хи твам̣, дабба, сан̇гхасса сена̄санан̃ча пан̃н̃апехи бхатта̄ни ча уддиса̄хӣ’’ти [уддиса̄ти (па̄ра̄. 380)]. ‘‘евам̣, бханте’’ти кхо а̄йасма̄ даббо маллапутто бхагавато паччассоси. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘тена хи, бхиккхаве, сан̇гхо даббам̣ маллапуттам̣ сена̄санапан̃н̃а̄пакан̃ча бхаттуддесакан̃ча самманнату. еван̃ча пана, бхиккхаве, самманнитаббо. пат̣хамам̣ даббо маллапутто йа̄читаббо [даббо йа̄читаббо (сйа̄. ка.)]. йа̄читва̄ бйаттена бхиккхуна̄ пат̣ибалена сан̇гхо н̃а̄петаббо –

190. ‘‘сун̣а̄ту ме, бханте, сан̇гхо. йади сан̇гхасса паттакаллам̣, сан̇гхо а̄йасмантам̣ даббам̣ маллапуттам̣ сена̄санапан̃н̃а̄пакан̃ча бхаттуддесакан̃ча самманнеййа. еса̄ н̃атти.

‘‘сун̣а̄ту ме, бханте, сан̇гхо. сан̇гхо а̄йасмантам̣ даббам̣ маллапуттам̣ сена̄санапан̃н̃а̄пакан̃ча бхаттуддесакан̃ча самманнати. йасса̄йасмато кхамати а̄йасмато даббасса маллапуттасса сена̄санапан̃н̃а̄пакасса ча бхаттуддесакасса ча саммути, со тун̣хасса; йасса наккхамати, со бха̄сеййа.

‘‘саммато сан̇гхена а̄йасма̄ даббо маллапутто сена̄санапан̃н̃а̄пако ча бхаттуддесако ча. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

191. саммато ча пана̄йасма̄ даббо маллапутто сабха̄га̄нам̣ бхиккхӯнам̣ екаджджхам̣ сена̄санам̣ пан̃н̃апети. йе те бхиккхӯ суттантика̄ тесам̣ екаджджхам̣ сена̄санам̣ пан̃н̃апети – те ан̃н̃аман̃н̃ам̣ суттантам̣ сан̇га̄йиссантӣти. йе те бхиккхӯ винайадхара̄ тесам̣ екаджджхам̣ сена̄санам̣ пан̃н̃апети – те ан̃н̃аман̃н̃ам̣ винайам̣ виниччхиниссантӣти. йе те бхиккхӯ дхаммакатхика̄ тесам̣ екаджджхам̣ сена̄санам̣ пан̃н̃апети – те ан̃н̃аман̃н̃ам̣ дхаммам̣ са̄каччхиссантӣти. йе те бхиккхӯ джха̄йино тесам̣ екаджджхам̣ сена̄санам̣ пан̃н̃апети – те ан̃н̃аман̃н̃ам̣ на бйа̄ба̄дхиссантӣти. йе те бхиккхӯ тираччха̄накатхика̄ ка̄йадал̣хибахула̄ [ка̄йадад̣д̣хибахула̄ (сӣ.)] вихаранти тесампи екаджджхам̣ сена̄санам̣ пан̃н̃апети – има̄йапиме а̄йасманто ратийа̄ аччхиссантӣти. йепи те бхиккхӯ вика̄ле а̄гаччханти тесампи теджодха̄тум̣ сама̄паджджитва̄ тенева а̄локена сена̄санам̣ пан̃н̃апети; апису бхиккхӯ сан̃чичча вика̄ле а̄гаччханти – майам̣ а̄йасмато даббасса маллапуттасса иддхипа̄т̣иха̄рийам̣ пассисса̄ма̄ти.

те а̄йасмантам̣ даббам̣ маллапуттам̣ упасан̇камитва̄ евам̣ ваданти – ‘‘амха̄кам̣, а̄вусо дабба, сена̄санам̣ пан̃н̃апехӣ’’ти. те а̄йасма̄ даббо маллапутто евам̣ вадети – ‘‘каттха а̄йасманта̄ иччханти каттха пан̃н̃апемӣ’’ти? те сан̃чичча дӯре ападисанти – ‘‘амха̄кам̣, а̄вусо дабба, гиджджхакӯт̣е паббате сена̄санам̣ пан̃н̃апехи. амха̄кам̣, а̄вусо, чорапапа̄те сена̄санам̣ пан̃н̃апехи. амха̄кам̣, а̄вусо, исигилипассе ка̄л̣асила̄йам̣ сена̄санам̣ пан̃н̃апехи. амха̄кам̣, а̄вусо, вебха̄рапассе саттапан̣н̣игуха̄йам̣ сена̄санам̣ пан̃н̃апехи. амха̄кам̣, а̄вусо, сӣтаване саппасон̣д̣икапаббха̄ре сена̄санам̣ пан̃н̃апехи. амха̄кам̣, а̄вусо, готамакакандара̄йам̣ [гомат̣акандара̄йам̣ (сйа̄. кам̣.)] сена̄санам̣ пан̃н̃апехи. амха̄кам̣, а̄вусо, тиндукакандара̄йам̣ сена̄санам̣ пан̃н̃апехи. амха̄кам̣, а̄вусо, таподакандара̄йам̣ [капотакандара̄йам̣ (ка.)] сена̄санам̣ пан̃н̃апехи. амха̄кам̣, а̄вусо, тапода̄ра̄ме сена̄санам̣ пан̃н̃апехи. амха̄кам̣, а̄вусо, джӣвакамбаване сена̄санам̣ пан̃н̃апехи. амха̄кам̣, а̄вусо, маддакуччхимхи мигада̄йе сена̄санам̣ пан̃н̃апехӣ’’ти.

тесам̣ а̄йасма̄ даббо маллапутто теджодха̄тум̣ сама̄паджджитва̄ ан̇гулийа̄ джалама̄на̄йа пурато пурато гаччхати. тепи тенева а̄локена а̄йасмато даббасса маллапуттасса пит̣т̣хито пит̣т̣хито гаччханти. тесам̣ а̄йасма̄ даббо маллапутто евам̣ сена̄санам̣ пан̃н̃апети – айам̣ ман̃чо, идам̣ пӣт̣хам̣, айам̣ бхиси, идам̣ биббоханам̣ [бимбоханам̣ (сӣ. сйа̄. кам̣.)], идам̣ ваччат̣т̣ха̄нам̣, идам̣ пасса̄ват̣т̣ха̄нам̣, идам̣ па̄нӣйам̣, идам̣ парибходжанӣйам̣, айам̣ каттарадан̣д̣о, идам̣ сан̇гхасса катикасан̣т̣ха̄нам̣, имам̣ ка̄лам̣ пависитаббам̣, имам̣ ка̄лам̣ никкхамитаббанти. тесам̣ а̄йасма̄ даббо маллапутто евам̣ сена̄санам̣ пан̃н̃апетва̄ пунадева вел̣уванам̣ пачча̄гаччхати.

192. тена кхо пана самайена меттийабхӯмаджака̄ [меттийабхуммаджака̄ (сӣ. сйа̄. кам̣.)] бхиккхӯ навака̄ чева хонти аппапун̃н̃а̄ ча. йа̄ни сан̇гхасса ла̄мака̄ни сена̄сана̄ни та̄ни тесам̣ па̄пун̣анти ла̄мака̄ни ча бхатта̄ни. тена кхо пана самайена ра̄джагахе манусса̄ иччханти тхера̄нам̣ бхиккхӯнам̣ абхисан̇кха̄рикам̣ пин̣д̣апа̄там̣ да̄тум̣ – саппимпи, телампи, уттарибхан̇гампи. меттийабхӯмаджака̄нам̣ пана бхиккхӯнам̣ па̄катикам̣ денти – йатха̄рандхам̣ [йатха̄раддхам̣ (сйа̄.)] кан̣а̄джакам̣ билан̇гадутийам̣. те паччха̄бхаттам̣ пин̣д̣апа̄таппат̣икканта̄ тхере бхиккхӯ пуччханти – ‘‘тумха̄кам̣, а̄вусо, бхаттагге ким̣ ахоси, тумха̄кам̣ ким̣ ахосӣ’’ти [ким̣ на̄хоси (сйа̄. кам̣.)]? екачче тхера̄ евам̣ ваданти – ‘‘амха̄кам̣, а̄вусо, саппи ахоси, телам̣ ахоси, уттарибхан̇гам̣ ахосӣ’’ти. меттийабхӯмаджака̄ пана бхиккхӯ евам̣ ваданти – ‘‘амха̄кам̣, а̄вусо, на кин̃чи ахоси – па̄катикам̣ йатха̄рандхам̣ кан̣а̄джакам̣ билан̇гадутийа’’нти.

тена кхо пана самайена калйа̄н̣абхаттико гахапати сан̇гхасса чатуккабхаттам̣ дети ниччабхаттам̣. со бхаттагге сапуттада̄ро упатит̣т̣хитва̄ паривисати – ан̃н̃е оданена пуччханти, ан̃н̃е сӯпена пуччханти, ан̃н̃е телена пуччханти, ан̃н̃е уттарибхан̇гена пуччханти. тена кхо пана самайена калйа̄н̣абхаттикасса гахапатино бхаттам̣ сва̄тана̄йа меттийабхӯмаджака̄нам̣ бхиккхӯнам̣ уддит̣т̣хам̣ хоти. атха кхо калйа̄н̣абхаттико гахапати а̄ра̄мам̣ агама̄си кеначидева каран̣ӣйена. со йена̄йасма̄ даббо маллапутто тенупасан̇ками, упасан̇камитва̄ а̄йасмантам̣ даббам̣ маллапуттам̣ абхива̄детва̄ екамантам̣ нисӣди. екамантам̣ нисиннам̣ кхо калйа̄н̣абхаттикам̣ гахапатим̣ а̄йасма̄ даббо маллапутто дхаммийа̄ катха̄йа сандассеси сама̄дапеси самуттеджеси сампахам̣сеси. атха кхо калйа̄н̣абхаттико гахапати а̄йасмата̄ даббена маллапуттена дхаммийа̄ катха̄йа сандассито сама̄дапито самуттеджито сампахам̣сито а̄йасмантам̣ даббам̣ маллапуттам̣ етадавоча – ‘‘касса, бханте, амха̄кам̣ гхаре сва̄тана̄йа бхаттам̣ уддит̣т̣ха’’нти? ‘‘меттийабхӯмаджака̄нам̣ кхо, гахапати, бхиккхӯнам̣ тумха̄кам̣ гхаре сва̄тана̄йа бхаттам̣ уддит̣т̣ха’’нти. атха кхо калйа̄н̣абхаттико гахапати анаттамано ахоси. катхан̃хи на̄ма па̄пабхиккхӯ амха̄кам̣ гхаре бхун̃джиссантӣти гхарам̣ гантва̄ да̄сим̣ а̄н̣а̄песи – ‘‘йе, дже, све бхаттика̄ а̄гаччханти те кот̣т̣хаке а̄санам̣ пан̃н̃апетва̄ кан̣а̄джакена билан̇гадутийена паривиса̄’’ти. ‘‘евам̣ аййа̄’’ти кхо са̄ да̄сӣ калйа̄н̣абхаттикасса гахапатино паччассоси.

атха кхо меттийабхӯмаджака̄ бхиккхӯ – хиййо кхо, а̄вусо, амха̄кам̣ калйа̄н̣абхаттикасса гахапатино бхаттам̣ уддит̣т̣хам̣; све амхе калйа̄н̣абхаттико гахапати сапуттада̄ро упатит̣т̣хитва̄ паривисиссати; ан̃н̃е оданена пуччхиссанти, ан̃н̃е сӯпена пуччхиссанти, ан̃н̃е телена пуччхиссанти, ан̃н̃е уттарибхан̇гена пуччхиссантӣти. те тенева соманассена на читтарӯпам̣ раттийа̄ супим̣су. атха кхо меттийабхӯмаджака̄ бхиккхӯ пуббан̣хасамайам̣ нива̄сетва̄ паттачӣварама̄да̄йа йена калйа̄н̣абхаттикасса гахапатино нивесанам̣ тенупасан̇камим̣су. аддаса̄ кхо са̄ да̄сӣ меттийабхӯмаджаке бхиккхӯ дӯратова а̄гаччханте; дисва̄на кот̣т̣хаке а̄санам̣ пан̃н̃а̄петва̄ меттийабхӯмаджаке бхиккхӯ етадавоча – ‘‘нисӣдатха, бханте’’ти. атха кхо меттийабхӯмаджака̄нам̣ бхиккхӯнам̣ етадахоси – ‘‘ниссам̣сайам̣ кхо на та̄ва бхаттам̣ сиддхам̣ бхависсати йатха̄ майам̣ кот̣т̣хаке нисӣда̄пийа̄ма̄’’ти [нисӣда̄пеййа̄ма̄ти (ка.)]. атха кхо са̄ да̄сӣ кан̣а̄джакена [ка̄н̣а̄джакена (сйа̄. кам̣.)] билан̇гадутийена упаган̃чхи – бхун̃джатха, бхантети. ‘‘майам̣ кхо, бхагини, ниччабхаттика̄’’ти. ‘‘джа̄на̄ми аййа̄ ниччабхаттика̄ти. апи ча̄хам̣ хиййова гахапатина̄ а̄н̣атта̄ – ‘йе, дже, све бхаттика̄ а̄гаччханти, те кот̣т̣хаке а̄санам̣ пан̃н̃а̄петва̄ кан̣а̄джакена билан̇гадутийена паривиса̄’ти. бхун̃джатха, бханте’’ти. атха кхо меттийабхӯмаджака̄ бхиккхӯ – хиййо кхо, а̄вусо, калйа̄н̣абхаттико гахапати а̄ра̄мам̣ агама̄си даббасса маллапуттасса сантике. ниссам̣сайам̣ кхо майам̣ даббена маллапуттена гахапатино антаре парибхинна̄ти [сантике парибхинна̄ти (сйа̄. кам̣.)]. те тенева доманассена на читтарӯпам̣ бхун̃джим̣су. атха кхо меттийабхӯмаджака̄ бхиккхӯ паччха̄бхаттам̣ пин̣д̣апа̄таппат̣икканта̄ а̄ра̄мам̣ гантва̄ паттачӣварам̣ пат̣иса̄метва̄ баха̄ра̄макот̣т̣хаке сан̇гха̄т̣ипаллаттхика̄йа нисӣдим̣су тун̣хӣбхӯта̄ ман̇кубхӯта̄ паттаккхандха̄ адхомукха̄ паджджха̄йанта̄ аппат̣ибха̄на̄.

атха кхо меттийа̄ бхиккхунӣ йена меттийабхӯмаджака̄ бхиккхӯ тенупасан̇ками, упасан̇камитва̄ меттийабхӯмаджаке бхиккхӯ етадавоча – ‘‘ванда̄ми аййа̄’’ти. евам̣ вутте меттийабхӯмаджака̄ бхиккхӯ на̄лапим̣су. дутийампи кхо…пе… татийампи кхо меттийа̄ бхиккхунӣ меттийабхӯмаджаке бхиккхӯ етадавоча – ‘‘ванда̄ми аййа̄’’ти. татийампи кхо меттийабхӯмаджака̄ бхиккхӯ на̄лапим̣су. ‘‘кйа̄хам̣ аййа̄нам̣ апараджджха̄ми? кисса мам̣ аййа̄ на̄лапантӣ’’ти? ‘‘татха̄ хи пана твам̣, бхагини, амхе даббена маллапуттена вихет̣хийама̄не аджджхупеккхасӣ’’ти? ‘‘кйа̄хам̣, аййа̄, каромӣ’’ти? ‘‘саче кхо твам̣, бхагини, иччхеййа̄си, аджджева бхагава̄ а̄йасмантам̣ даббам̣ маллапуттам̣ на̄са̄пеййа̄’’ти. ‘‘кйа̄хам̣, аййа̄, кароми? ким̣ майа̄ сакка̄ ка̄ту’’нти? ‘‘ехи твам̣, бхагини, йена бхагава̄ тенупасан̇ками, упасан̇камитва̄ бхагавантам̣ евам̣ вадехи – ‘идам̣, бханте, наччханнам̣ наппатирӯпам̣, йа̄йам̣, бханте, диса̄ абхайа̄ анӣтика̄ анупаддава̄ са̄йам̣ диса̄ сабхайа̄ саӣтика̄ саупаддава̄; йато нива̄там̣ тато сава̄там̣ [тато пава̄там̣ (сӣ. сйа̄. кам̣.)]; удакам̣ ман̃н̃е а̄диттам̣; аййенамхи даббена маллапуттена дӯсита̄’’’ти. ‘‘евам̣ аййа̄’’ти кхо меттийа̄ бхиккхунӣ меттийабхӯмаджака̄нам̣ бхиккхӯнам̣ пат̣иссутва̄ [пат̣иссун̣итва̄ (сйа̄. кам̣.)] йена бхагава̄ тенупасан̇ками, упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хита̄ кхо меттийа̄ [са̄ меттийа̄ (сйа̄. ка.)] бхиккхунӣ бхагавантам̣ етадавоча – ‘‘идам̣, бханте, наччханнам̣ наппатирӯпам̣, йа̄йам̣, бханте, диса̄ абхайа̄ анӣтика̄ анупаддава̄ са̄йам̣ диса̄ сабхайа̄ саӣтика̄ саупаддава̄; йато нива̄там̣ тато сава̄там̣; удакам̣ ман̃н̃е а̄диттам̣; аййенамхи даббена маллапуттена дӯсита̄’’ти.

193. атха кхо бхагава̄ етасмим̣ нида̄не етасмим̣ пакаран̣е бхиккхусан̇гхам̣ саннипа̄та̄петва̄ а̄йасмантам̣ даббам̣ маллапуттам̣ пат̣ипуччхи – ‘‘сараси твам̣, дабба, еварӯпам̣ катта̄ йатха̄йам̣ бхиккхунӣ а̄ха̄’’ти? ‘‘йатха̄ мам̣, бханте, бхагава̄ джа̄на̄тӣ’’ти. дутийампи кхо бхагава̄ а̄йасмантам̣ даббам̣ маллапуттам̣ етадавоча – ‘‘сараси твам̣, дабба, еварӯпам̣ катта̄ йатха̄йам̣ бхиккхунӣ а̄ха̄’’ти? ‘‘йатха̄ мам̣, бханте, бхагава̄ джа̄на̄тӣ’’ти. татийампи кхо бхагава̄ а̄йасмантам̣ даббам̣ маллапуттам̣ етадавоча – ‘‘сараси твам̣, дабба, еварӯпам̣ катта̄ йатха̄йам̣ бхиккхунӣ а̄ха̄’’ти? ‘‘йатха̄ мам̣, бханте, бхагава̄ джа̄на̄тӣ’’ти. ‘‘на кхо, дабба, дабба̄ евам̣ ниббет̣хенти. саче тайа̄ катам̣ катанти вадехи. саче акатам̣ акатанти вадехӣ’’ти. ‘‘йатохам̣, бханте, джа̄то на̄бхиджа̄на̄ми супинантенапи метхунам̣ дхаммам̣ пат̣исевита̄, пагева джа̄гаро’’ти. атха кхо бхагава̄ бхиккхӯ а̄мантеси – ‘‘тена хи, бхиккхаве, меттийам̣ бхиккхуним̣ на̄сетха. име ча бхиккхӯ ануйун̃джатха̄’’ти. идам̣ ватва̄ бхагава̄ ут̣т̣ха̄йа̄сана̄ виха̄рам̣ па̄виси.

атха кхо те бхиккхӯ меттийам̣ бхиккхуним̣ на̄сесум̣. атха кхо меттийабхӯмаджака̄ бхиккхӯ те бхиккхӯ етадавочум̣ – ‘‘ма̄вусо, меттийам̣ бхиккхуним̣ на̄сетха, на са̄ кин̃чи апараджджхати; амхехи са̄ усса̄хита̄ купитехи анаттаманехи ча̄вана̄дхиппа̄йехӣ’’ти. ‘‘ким̣ пана тумхе, а̄вусо, а̄йасмантам̣ даббам̣ маллапуттам̣ амӯлика̄йа сӣлавипаттийа̄ ануддхам̣сетха̄’’ти? ‘‘евама̄вусо’’ти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма меттийабхӯмаджака̄ бхиккхӯ а̄йасмантам̣ даббам̣ маллапуттам̣ амӯлика̄йа сӣлавипаттийа̄ ануддхам̣сессантӣ’’ти! атха кхо те бхиккхӯ бхагавато етаматтхам̣ а̄рочесум̣ …пе… ‘‘саччам̣ кира, бхиккхаве, меттийабхӯмаджака̄ бхиккхӯ даббам̣ маллапуттам̣ амӯлика̄йа сӣлавипаттийа̄ ануддхам̣сентӣ’’ти? ‘‘саччам̣ бхагава̄’’ти…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси –

‘‘тена хи, бхиккхаве, сан̇гхо даббасса маллапуттасса сативепуллаппаттасса сативинайам̣ дету. еван̃ча пана, бхиккхаве, да̄таббо – ‘‘тена, бхиккхаве, даббена маллапуттена сан̇гхам̣ упасан̇камитва̄, екам̣сам̣ уттара̄сан̇гам̣ каритва̄, вуд̣д̣ха̄нам̣ бхиккхӯнам̣ па̄де вандитва̄, уккут̣икам̣ нисӣдитва̄, ан̃джалим̣ паггахетва̄, евамасса вачанӣйо – ‘име мам̣, бханте, меттийабхӯмаджака̄ бхиккхӯ амӯлика̄йа сӣлавипаттийа̄ ануддхам̣сенти. сохам̣, бханте, сативепуллаппатто сан̇гхам̣ сативинайам̣ йа̄ча̄мӣ’ти. дутийампи йа̄читаббо. татийампи йа̄читаббо – ‘име мам̣, бханте меттийабхӯмаджака̄ бхиккхӯ амӯлика̄йа сӣлавипаттийа̄ ануддхам̣сенти. сохам̣ [сохам̣ бханте (ка.)] сативепуллаппатто татийампи, бханте, сан̇гхам̣ сативинайам̣ йа̄ча̄мӣ’ти. ‘‘бйаттена бхиккхуна̄ пат̣ибалена сан̇гхо н̃а̄петаббо –

194. сун̣а̄ту ме, бханте, сан̇гхо. име меттийабхӯмаджака̄ бхиккхӯ а̄йасмантам̣ даббам̣ маллапуттам̣ амӯлика̄йа сӣлавипаттийа̄ ануддхам̣сенти. а̄йасма̄ даббо маллапутто сативепуллаппатто сан̇гхам̣ сативинайам̣ йа̄чати. йади сан̇гхасса паттакаллам̣, сан̇гхо а̄йасмато даббасса маллапуттасса сативепуллаппаттасса сативинайам̣ дадеййа. еса̄ н̃атти.

‘‘сун̣а̄ту ме, бханте, сан̇гхо. име меттийабхӯмаджака̄ бхиккхӯ а̄йасмантам̣ даббам̣ маллапуттам̣ амӯлика̄йа сӣлавипаттийа̄ ануддхам̣сенти. а̄йасма̄ даббо маллапутто сативепуллаппатто сан̇гхам̣ сативинайам̣ йа̄чати. сан̇гхо а̄йасмато даббасса маллапуттасса сативепуллаппаттасса сативинайам̣ дети. йасса̄йасмато кхамати а̄йасмато даббасса маллапуттасса сативепуллаппаттасса сативинайасса да̄нам̣, со тун̣хасса; йасса наккхамати, со бха̄сеййа.

‘‘дутийампи етаматтхам̣ вада̄ми…пе… татийампи етаматтхам̣ вада̄ми – сун̣а̄ту ме, бханте, сан̇гхо. име меттийабхӯмаджака̄ бхиккхӯ а̄йасмантам̣ даббам̣ маллапуттам̣ амӯлика̄йа сӣлавипаттийа̄ ануддхам̣сенти. а̄йасма̄ даббо маллапутто сативепуллаппатто сан̇гхам̣ сативинайам̣ йа̄чати. сан̇гхо а̄йасмато даббасса маллапуттасса сативепуллаппаттасса сативинайам̣ дети. йасса̄йасмато кхамати а̄йасмато даббасса маллапуттасса сативепуллаппаттасса сативинайасса да̄нам̣, со тун̣хасса; йасса наккхамати, со бха̄сеййа.

‘‘динно сан̇гхена а̄йасмато даббасса маллапуттасса сативепуллаппаттасса сативинайо. кхамати сан̇гхасса, тасма̄ тун̣хӣ, еваметам̣ дха̄райа̄мӣ’’ти.

195. ‘‘пан̃чима̄ни, бхиккхаве, дхаммика̄ни сативинайасса да̄на̄ни. суддхо хоти бхиккху ана̄паттико, ануваданти ча нам̣, йа̄чати ча, тасса сан̇гхо сативинайам̣ дети дхаммена самаггена – има̄ни кхо, бхиккхаве, пан̃ча дхаммика̄ни сативинайасса да̄на̄нӣ’’ти.