10. вевачанаха̄расампа̄тавибха̄вана̄

72. йена йена париваттанаха̄расампа̄тена суттаппадесаттха̄ париваттетабба̄, со париваттано ха̄расампа̄тоти парипун̣н̣о, ‘‘катамо вевачано ха̄расампа̄то’’ти пуччхитаббатта̄ ‘‘таттха катамо вевачано ха̄расампа̄то’’тиа̄ди вуттам̣.

‘‘катамесам̣ суттаппадесаттха̄нам̣, суттапада̄нам̣ ва̄ катама̄ни вевачана̄нӣ’’ти пуччхитаббатта̄ ‘‘тасма̄’’тиа̄ди вуттам̣. йа̄ ‘‘тасма̄…пе… гочаро’’ти га̄тха̄ вутта̄, та̄йа га̄тха̄йа ‘‘раккхитачиттасса̄’’ти падена вуттасса читтасса, ‘‘раккхитачиттасса̄’’ти еттха читтасса падасса ва̄ ‘‘читтам̣…пе… виджа̄нитатта’’нти йам̣ вачанам̣ вуттам̣, идам̣ вачанам̣ вевачанам̣, ‘‘ма̄насам̣ хадайа’’нтиа̄дивачанампи (дха. са. 17, 63) читтасса вевачанам̣. ‘‘самма̄сан̇каппагочаро’’ти еттха самма̄сан̇каппасса ‘‘неккхаммасан̇каппо абйа̄па̄дасан̇каппо авихим̣са̄сан̇каппо’’ти йам̣ вачанам̣ вуттам̣, идам̣ вачанам̣ вевачанам̣, ‘‘такко витакко’’тиа̄ди (дха. са. 7) вачанампи самма̄сан̇каппасса вевачанам̣. ‘‘самма̄дит̣т̣хипуреккха̄ро’’ти еттха самма̄дит̣т̣хипадасса ‘‘самма̄дит̣т̣хи на̄ма пан̃н̃а̄саттхам̣ пан̃н̃а̄кхагго пан̃н̃а̄ратанам̣ пан̃н̃а̄патодо пан̃н̃а̄па̄са̄до’’ти йам̣ вачанам̣ вуттам̣, идам̣ вачанам̣ вевачанам̣, ‘‘пан̃н̃а̄ паджа̄нана̄ вичайо’’тиа̄ди (дха. са. 16) вачанампи самма̄дит̣т̣хипадасса вевачанам̣. ‘‘тхинам̣ тхийана̄ тхийитаттам̣ читтасса, читтасса акаллата̄ акамман̃н̃ата̄ она̄хо парийона̄хо антосан̇кочо’’ти (дха. са. 1162-1163) йам̣ вачанам̣ вуттам̣, идам̣ вачанам̣ тхинасса вевачанам̣. ‘‘ка̄йасса акаллата̄ акамман̃н̃ата̄ ка̄йа̄ласийам̣ соппам̣ супана̄ суппитатта’’нти (дха. са. 1163) йам̣ вачанам̣ вуттам̣, идам̣ вачанам̣ миддхасса вевачанам̣. ‘‘бхиккхако бхиккхӯ’’тиа̄дикам̣ (па̄ра̄. 45; вибха. 510) йам̣ вачанам̣ вуттам̣, идам̣ вачанам̣ бхиккхупадасса вевачанам̣. ‘‘дуггати апа̄йо винипа̄то ват̣т̣адуккхам̣ сам̣са̄ро’’тиа̄дикам̣ йам̣ вачанам̣ вуттам̣, идам̣ вачанам̣ дуггатипадасса вевачанам̣. ити вевачана̄ни нӣхарита̄ни.

‘‘еттакова вевачанаха̄расампа̄то парипун̣н̣о’’ти ваттаббатта̄ ‘‘нийутто вевачано ха̄расампа̄то’’ти вуттам̣. йена йена сам̣ван̣н̣ана̄висесабхӯтена вевачанаха̄расампа̄тена вевачана̄ни нӣхарита̄ни, со со сам̣ван̣н̣ана̄висесабхӯто вевачанаха̄расампа̄то нийутто йатха̄самбхавам̣ нӣхаритва̄ йуджджитабботи аттхо гахитоти.

ити вевачанаха̄расампа̄те саттибала̄нурӯпа̄ рачита̄

вибха̄вана̄ нит̣т̣хита̄.

пан̣д̣итехи пана…пе… гахетабботи.