11. пан̃н̃аттиха̄расампа̄тавибха̄вана̄

73. йена йена вевачанаха̄расампа̄тена вевачана̄ни ниддха̄рита̄ни, со вевачанаха̄расампа̄то парипун̣н̣о, ‘‘катамо пан̃н̃аттиха̄расампа̄то’’ти пуччхитаббатта̄ ‘‘таттха катамо пан̃н̃аттиха̄расампа̄то’’тиа̄ди вуттам̣.

‘‘катама̄ суттаппадесабхӯта̄ пан̃н̃атти катамесам̣ дхамма̄нам̣ пан̃н̃аттӣ’’ти пуччхитаббатта̄ ‘‘тасма̄’’тиа̄ди вуттам̣. ‘‘тасма̄ раккхитачиттасса̄’’ти пан̃н̃атти сатийа̄ падат̣т̣ха̄насса раккхитаббасса читтасса пан̃н̃а̄панато сатийа̄ падат̣т̣ха̄напан̃н̃атти на̄ма. сатийа̄ хи раккхитаббам̣ читтам̣ сатийа̄ падат̣т̣ха̄нам̣ адхит̣т̣ха̄нам̣ на̄ма. тена̄ха ат̣т̣хакатха̄йам̣ – ‘‘адхит̣т̣хахитва̄ раккхантийа̄ сатийа̄ раккхийама̄нам̣ читтам̣ тасса̄ адхит̣т̣ха̄нам̣ вийа хотӣ’’ти. ‘‘самма̄сан̇каппагочаро’’ти пан̃н̃атти саматхасса бха̄вана̄йа пан̃н̃а̄панато саматхасса бха̄вана̄пан̃н̃атти на̄ма. ‘‘самма̄дит̣т̣хипуреккха̄ро, н̃атва̄на удайаббайа’’нти пан̃н̃атти дассанабхӯмийа̄ никкхепасса пан̃н̃а̄панато никкхепапан̃н̃атти на̄ма. ‘‘тхинамиддха̄бхибхӯ бхиккхӯ’’ти самудайасса анавасесаппаха̄насса пан̃н̃а̄панато анавасесаппаха̄напан̃н̃атти на̄ма. ‘‘сабба̄ дуггатийо джахе’’ти пан̃н̃атти маггасса арийамаггасса бха̄вана̄йа пан̃н̃а̄панато бха̄вана̄пан̃н̃атти на̄ма.

‘‘еттакова пан̃н̃аттиха̄расампа̄то парипун̣н̣о’’ти ваттаббатта̄ ‘‘нийутто пан̃н̃аттиха̄расампа̄то’’ти вуттам̣. йена йена сам̣ван̣н̣ана̄висесабхӯтена пан̃н̃аттиха̄расампа̄тена пан̃н̃аттиппабхеда̄ ниддха̄рита̄, со со сам̣ван̣н̣ана̄висесабхӯто пан̃н̃аттиха̄расампа̄то нийутто йатха̄рахам̣ ниддха̄ретва̄ йуджджитабботи аттхо гахетабботи.

ити пан̃н̃аттиха̄расампа̄те саттибала̄нурӯпа̄ рачита̄

вибха̄вана̄ нит̣т̣хита̄.

пан̣д̣итехи пана…пе… гахетабботи.