7. джа̄лийасуттаван̣н̣ана̄

двепаббаджитаваттхуван̣н̣ана̄

378. евам̣ маха̄лисуттам̣ сам̣ван̣н̣етва̄ ида̄ни джа̄лийасуттам̣ сам̣ван̣н̣енто йатха̄нупуббам̣ сам̣ван̣н̣анока̄сасса паттабха̄вам̣ вибха̄ветум̣, маха̄лисуттасса̄нантарам̣ сан̇гӣтасса суттасса джа̄лийасуттабха̄вам̣ ва̄ пака̄сетум̣ ‘‘евам̣ ме сутам̣…пе… косамбийанти джа̄лийасутта’’нти а̄ха. ‘‘гхоситена̄’’тиа̄дина̄ маджджхелопасама̄сам̣ дассети, гхоситасса а̄ра̄мотипи ваттаббам̣. евампи хи ‘‘ана̄тхапин̣д̣икасса а̄ра̄ме’’тиа̄дӣсу (па̄ра̄. 234) вийа да̄йакакиттанам̣ хоти, евам̣ пана киттенто а̄йасма̄ а̄нандо ан̃н̃епи тасса дит̣т̣ха̄нугатиа̄паджджане нийоджетӣти ан̃н̃аттха вуттам̣. таттха койам̣ гхоситасет̣т̣хи на̄ма, катхан̃ча̄нена а̄ра̄мо ка̄рито, катхам̣ пана таттха бхагава̄ виха̄сӣти пуччха̄йа саббам̣ там̣ виссаджджанам̣ самуда̄гамато пат̣т̣ха̄йа сан̇кхепатова дассенто ‘‘пуббе кира̄’’тиа̄дима̄ха. аллакаппарат̣т̣ханти бахӯсу поттхакесу диссати, каттхачи пана ‘‘аддиларат̣т̣ха’’нти ча ‘‘дамил̣арат̣т̣ха’’нти ча ликхитам̣. татоти аллакаппарат̣т̣хато. ‘‘путтам̣…пе… агама̄сӣ’’ти идампи ‘‘тассетам̣ камма’’нти н̃а̄петум̣ вуттам̣. тада̄ти тесам̣ га̄мам̣ павит̣т̣хадивасе. балавапа̄йа̄санти гарутарам̣ бахупа̄йа̄сам̣. джӣра̄петунти самавепа̄кинийа̄ гахан̣ийа̄ пакка̄петум̣. асаннихитети гехато бахи ан̃н̃ам̣ гате. бхуссатӣти надати, ‘‘бхубху’’ити сунакхасаддам̣ каротӣти аттхо. идамписса екам̣ каммам̣. паччекабуддхе пана чӣваракамматтха̄йа ан̃н̃ам̣ т̣ха̄нам̣ гате сунакхасса хадайам̣ пха̄литам̣. тираччха̄на̄ на̄мете уджуджа̄тика̄ хонти акут̣ила̄, манусса̄ пана ан̃н̃ам̣ хадайена чинтети, ан̃н̃ам̣ мукхена катхенти. тенева̄ха ‘‘гаханан̃хетам̣ бханте йадидам̣ манусса̄, утта̄накан̃хетам̣ бханте йадидам̣ пасаво’’ти (ма. ни. 2.3).

ити со та̄йа паччекабуддхе синехавасена уджудит̣т̣хита̄йа акут̣илата̄йа ка̄лан̇катва̄ та̄ватим̣сабхаване ниббатто. там̣ сандха̄йа̄ха ‘‘со…пе… ниббаттӣ’’ти. тасса пана кан̣н̣амӯле катхентасса саддо сол̣асайоджанат̣т̣ха̄нам̣ пхарати, пакатикатха̄саддо пана сакалам̣ дасайоджанасахассам̣ деванагарам̣, евам̣ сарагхосасампаттийа̄ ‘‘гхосакадевапутто’’ твева на̄мам̣ ахоси. айамасса паччекабуддхе синехена бхуккаран̣асса ниссандо. чавитва̄ти а̄ха̄раккхайена чавитва̄. девалокато хи девапутта̄ а̄йуккхайена, пун̃н̃аккхайена, а̄ха̄раккхайена, копена̄ти чатӯхи ка̄ран̣ехи чаванти. имасса пана ка̄магун̣е парибхун̃джато мут̣т̣хассатисса а̄ха̄раккхайена чаванам̣ хоти. со косамбийам̣ нагарасобхинийа̄ куччхисмим̣ пат̣исандхим̣ ган̣хи. нагарасобхинийо кира дхӣтарам̣ пат̣иджагганти, на путтам̣. дхӣтаро хи та̄сам̣ павен̣им̣ гхат̣айанти, тасма̄ са̄пи там̣ сан̇ка̄ракӯт̣е чхад̣д̣а̄пети. айамасса пуббе путтачхад̣д̣анакаммасса ниссандо. па̄пакамман̃хи на̄метам̣ ‘‘аппака’’нти на̄ваман̃н̃итаббам̣. тамеко мануссо ка̄касунакхапарива̄ритам̣ дисва̄ ‘‘путто ме ладдхо’’ти гехам̣ неси, тасса пана хаттхато косамбакасет̣т̣хи каха̄пан̣асахассам̣ датва̄ аггахеси, таматтхам̣ сандха̄йа ‘‘косамбийам̣ екасса куласса гхаре ниббаттӣ’’тиа̄ди вуттам̣. саттаккхаттум̣ гха̄та̄панаттхам̣ упаккамакаран̣ампи путтачхад̣д̣анакаммассева ниссандо. сет̣т̣хидхӣта̄йа̄ти джанападасет̣т̣хино дхӣта̄йа. веййаттийена̄ти пан̃н̃а̄веййаттийена. са̄ хи тасса питара̄ песитам̣ ма̄ра̄панапан̣н̣ам̣ пха̄летва̄ вива̄хапан̣н̣ам̣ бандхитва̄ джӣвитала̄бхам̣ кароти. та̄йева сарасампаттийа̄ гхоситасет̣т̣хи на̄ма джа̄то.

сарӣрасантаппанаттханти химавантева мӯлапхала̄ха̄рата̄йа килантасарӣрасса лон̣амбиласеванена пӣнанаттхам̣. тасита̄ти пипа̄сита̄. киланта̄ти париссантака̄йа̄. ват̣аруккханти маха̄нигродхаруккхам̣. те кира там̣ патва̄ тасса мӯле нисӣдим̣су. атха джет̣т̣хаката̄пасо нигродхаруккхасса собха̄сампаттим̣ пасситва̄ ‘‘маха̄нубха̄во ман̃н̃е еттха адхивуттха̄ девата̄. са̄дху вата̄йам̣ девата̄ исиган̣асса па̄нӣйа̄дида̄нена аддха̄напариссамам̣ винодеййа̄’’ти чинтеси. девата̄пи татха̄ чинтитам̣ утва̄ исиган̣асса па̄нӣйанха̄накабходжана̄ни ада̄си. тена̄ха ‘‘таттха̄’’тиа̄ди. джет̣т̣хаката̄пасасса пана татха̄ чинтанам̣ ависесато саббаттха а̄ропетва̄ ‘‘сан̇гахам̣ пачча̄сисанта̄’’ти вуттам̣. ‘‘хаттхам̣ паса̄ретва̄’’ти имина̄ хаттхаппаса̄ран̣аматтена тасса̄ йатхиччхитаниппхаттим̣ дассети. девата̄ а̄ха̄ти са̄ аттано пун̃н̃асса париттакатта̄ ладжджа̄йа катхетум̣ ависахантӣпи пунаппунам̣ ниппӣл̣ийама̄на̄ евама̄ха. соти ана̄тхапин̣д̣ико гахапати. бхатака̄нанти бхатийа̄ веййа̄ваччам̣ каронта̄нам̣ да̄сапесакаммакара̄нам̣. пакатибхаттаветанамева̄ти пакатийа̄ да̄таббабхаттаветанамева. тада̄ упосатхикатта̄ каммам̣ акаронта̄нампи каммакаран̣адивасе да̄таббабхаттаветанамева, на тато ӯнанти аттхо. дхаммападат̣т̣хакатха̄йам̣ кхуддакабха̄н̣ака̄нам̣ матена ‘‘са̄йама̄саттха̄йа а̄гато’’ти (дха. па. ат̣т̣ха. 1.2.са̄ма̄ватӣваттху) вуттам̣, идха пана дӣгхабха̄н̣ака̄нам̣ матена ‘‘маджджханхике па̄тара̄саттха̄йа а̄гато’’ти. кан̃чӣти кан̃чипи бхатакам̣, кин̃чипи бхатакакамманти ва̄ самбандхо. маджджханхикака̄латта̄ ‘‘упад̣д̣хадивасо гато’’ти а̄ха, тена упад̣д̣хадивасамева сама̄диннатта̄ ‘‘упад̣д̣хӯпосатхо’’ти там̣ вохарантӣти дассети. дхаммападат̣т̣хакатха̄йам̣ (дха. па. ат̣т̣ха. 1.2 са̄ма̄ватӣваттху) раттибха̄гена упад̣д̣хӯпосатхо вутто, идха пана маджджханхикато пат̣т̣ха̄йа дивасабха̄генева, тадавасесадивасараттибха̄гена ва̄. асамепи хи бха̄ге упад̣д̣хасаддо паваттати. тадахева̄ти арун̣уггаманака̄лам̣ сандха̄йа вуттам̣.

‘‘гхосопи кхо дуллабхо локасмим̣ йадидам̣ буддхо’’ти сан̃джа̄тапӣтипа̄моджджо. тадахева̄ти косамбим̣ паттадивасато дутийадивасейева. турита̄ттха̄ти турита̄ аттха, сӣгхайа̄йино бхаватха̄ти аттхо. ехибхиккхупаббаджджам̣ сандха̄йа ‘‘паббаджитва̄’’ти вуттам̣. арахаттанти чатупат̣исамбхида̄самалан̇катам̣ арахантабха̄вам̣. тепи сет̣т̣хино сота̄паттипхале патит̣т̣ха̄йа ад̣д̣хама̄саматтам̣ да̄на̄ни датва̄ пачча̄гамма тайо виха̄ре ка̄ресум̣. бхагава̄ пана девасикам̣ екекасмим̣ виха̄ре васати. йасса ча виха̄ре вуттхо, тассева гхаре пин̣д̣а̄йа чарати, тада̄ пана гхоситасса виха̄ре вихарати. тена вуттам̣ ‘‘косамбийам̣ вихарати гхосита̄ра̄ме’’ти.

ба̄хирасамайаматтена упаджджха̄йо, на са̄сане вийа упаджджха̄йалаккхан̣ена. упечча парасса ва̄ча̄йа а̄рамбханам̣ ба̄дханам̣ упа̄рамбхо, досадассанавасена гхат̣т̣ананти аттхо. тена̄ха ‘‘ва̄дам̣ а̄ропетука̄ма̄ хутва̄’’ти. ваданти нинда̄васена катхенти етена̄ти хи ва̄до, досо, тама̄ропетука̄ма̄ упари патит̣т̣хапетука̄ма̄ хутва̄ти аттхо. катхама̄ропетука̄ма̄ти а̄ха ‘‘ити кира̄’’тиа̄ди. там̣ джӣвам̣ там̣ сарӣранти йам̣ ваттху джӣвасан̃н̃итам̣, тадева сарӣрасан̃н̃итам̣. идан̃хи ‘‘рӯпам̣ аттато саманупассатӣ’’ти вуттава̄дам̣ гахетва̄ ваданти. рӯпан̃ча атта̄нан̃ча адвайам̣ екӣбха̄вам̣ катва̄ саманупассанавасена, ‘‘сатто’’ти ва̄ ба̄хиракапарикаппитам̣ атта̄нам̣ сандха̄йа ваданти. татха̄ хи вуттам̣ ‘‘идхева сатто бхиджджатӣ’’ти. асса̄ти саман̣асса готамасса. бхиджджатӣти нирудайавина̄савасена винассати. тена джӣвитасарӣра̄нам̣ анан̃н̃атта̄нуджа̄нанато, сарӣрасса ча бхедадассанато. на хеттха йатха̄ дит̣т̣хабхедавата̄ сарӣрато анан̃н̃атта̄ адит̣т̣хопи джӣвасса бхедо вутто, евам̣ адит̣т̣хабхедавата̄ джӣвато анан̃н̃атта̄ сарӣрасса̄пи абхедоти сакка̄ ваттум̣ тасса бхедасса паччаккхасиддхатта̄, бхӯтупа̄да̄йарӯпавинимуттасса ча сарӣрасса абха̄ватоти имина̄ адхиппа̄йена̄ха ‘‘уччхедава̄до хотӣ’’ти.

ан̃н̃ам̣ джӣвам̣ ан̃н̃ам̣ сарӣранти ан̃н̃адева ваттху джӣвасан̃н̃итам̣, ан̃н̃ам̣ сарӣрасан̃н̃итам̣. идан̃хи ‘‘рӯпавантам̣ атта̄нам̣ саманупассатӣ’’тиа̄динайаппаваттава̄дам̣ гахетва̄ ваданти. рӯпабхедассева дит̣т̣хатта̄, аттани ча тадабха̄вато ‘‘атта̄ ниччо’’ти айаматтхо а̄панно ва̄ти имина̄ адхиппа̄йена̄ха ‘‘сатто сассато а̄паджджатӣ’’ти.

379-380. тайидам̣ несам̣ ван̃джха̄путтасса дӣгхарассата̄дипарикаппанасадисам̣, тасма̄йам̣ пан̃хо т̣хапанӣйо. на хеса аттханиссито, на дхамманиссито, на̄дибрахмачарийако, на ниббида̄диаттха̄йа сам̣ваттати. пот̣т̣хапа̄дасуттан̃четтха нидассанам̣. там̣ таттха ра̄джанимӣланам̣ катва̄ ‘‘тена ха̄вусосун̣а̄тха̄’’тиа̄дина̄ саттха̄ несам̣ упари дхаммадесанама̄рабхӣти а̄ха ‘‘атха бхагава̄’’тиа̄ди. сассатуччхедадит̣т̣хийо две анта̄. арийамагго маджджхима̄ пат̣ипада̄. тасса̄йева пат̣ипада̄йа̄ти миччха̄пат̣ипада̄йа ева.

саддха̄паббаджитасса̄ти саддха̄йа паббаджитасса ‘‘евамахам̣ ито ват̣т̣адуккхато ниссарисса̄мӣ’’ти паббаджджамупагатасса, таданурӯпан̃ча сӣлам̣ пӯретва̄ пат̣хамаджджха̄нена сама̄хитачиттасса. етанти килесават̣т̣апаривуддхидӣпанам̣ ‘‘там̣ джӣвам̣ там̣ сарӣра’’нтиа̄дикам̣ дит̣т̣хисам̣килесанисситавачанам̣. ниббичикиччхо на хотӣти дхаммесу тин̣н̣авичикиччхо на хоти, таттха таттха а̄саппанапарисаппанавасена паваттатӣти аттхо.

етамевам̣ джа̄на̄мӣти йена со бхиккху пат̣хамам̣ джха̄нам̣ упасампаджджа вихарати, етам̣ сасампайуттам̣ дхаммам̣ ‘‘махаггатачитта’’нти евам̣ джа̄на̄ми. татха̄ хи вуттам̣ ‘‘махаггатачиттаметанти сан̃н̃ам̣ т̣хапеси’’нти. но ча евам̣ вада̄мӣти йатха̄ дит̣т̣хигатика̄ там̣ дхаммаджа̄там̣ саниссайам̣ абхедато ган̣ханта̄ ‘‘там̣ джӣвам̣ там̣ сарӣра’’нти, тадубхайам̣ ва̄ бхедато ган̣ханта̄ ‘‘ан̃н̃ам̣ джӣвам̣ ан̃н̃а сарӣра’’нти аттано миччха̄га̄хам̣ паведенти, евамахам̣ на вада̄ми тасса дхаммасса супарин̃н̃а̄татта̄. тена̄ха ‘‘атха кхо’’тиа̄ди. ба̄хирака̄ йебхуййена касин̣аджджха̄на̄ни ева ниббаттентӣти вуттам̣ ‘‘касин̣апарикаммам̣ бха̄вентасса̄’’ти. йасма̄ бха̄вана̄нубха̄вена джха̄на̄дхигамо, бха̄вана̄ ча патхавӣкасин̣а̄дисан̃джа̄нанамукхена хотӣти катва̄ сан̃н̃а̄сӣсена ниддисӣйати, тасма̄ ‘‘сан̃н̃а̄балена уппанна’’нти а̄ха. тена вуттам̣ ‘‘патхавӣкасин̣амеко сан̃джа̄на̄тӣ’’тиа̄ди. йасма̄ пана бхагавата̄ таттха таттха ва̄ре ‘‘атха ча пана̄хам̣ на вада̄мӣ’’ти вуттам̣, тасма̄ бхагавато вачанамупадесам̣ катва̄ на ваттаббам̣ киретам̣ кевалина̄ уттамапурисена̄ти адхиппа̄йена ‘‘на каллам̣ тассета’’нти а̄хам̣су, на сайам̣ пат̣ибха̄нена̄ти дассетум̣ ‘‘ман̃н̃ама̄на̄ вадантӣ’’ти вуттам̣. сесам̣ анантарасутте вуттанайатта̄, па̄кат̣атта̄ ча сувин̃н̃еййамева.

ити суман̇галавила̄синийа̄ дӣгханика̄йат̣т̣хакатха̄йа парамасукхумагамбхӣрадуранубодхаттхапаридӣпана̄йа сувималавипулапан̃н̃а̄веййаттийаджанана̄йа са̄дхувила̄синийа̄ на̄ма лӣнаттхапака̄санийа̄ джа̄лийасуттаван̣н̣ана̄йа лӣнаттхапака̄сана̄.

джа̄лийасуттаван̣н̣ана̄ нит̣т̣хита̄.