1. найама̄тика̄ван̣н̣ана̄

1. чуддасавидхена̄ти чуддасаппака̄рена, чуддасахи падехӣти аттхо. таттха ‘‘сан̇гахо асан̇гахо’’ти идамекам̣ падам̣, татха̄ ‘‘сампайого виппайого’’ти. ‘‘сан̇гахитена сампайуттам̣ виппайутта’’нтиа̄дӣни пана тӣн̣и тӣн̣и пада̄ни екекам̣ падам̣. итаресу падавибха̄го сувин̃н̃еййова. етехӣти сан̇гаха̄диппака̄рехи. найанам̣ па̄панам̣, там̣ пана паваттанам̣ н̃а̄панан̃ча хотӣти ‘‘паваттӣйати н̃а̄йантӣ’’ти ча двидха̄пи аттхо вутто. найа̄ ева уддисийама̄на̄ ма̄тика̄. аттхадвайепи паваттанан̃а̄н̣акирийа̄нам̣ каран̣абха̄вена сан̇гаха̄диппака̄ра̄ найа̄ти вутта̄. тена̄ха ат̣т̣хакатха̄йам̣ ‘‘имина̄ сан̇гаха̄дикена найена̄’’ти (дха̄ту. ат̣т̣ха. 1). пада̄нанти аттхадӣпака̄нам̣ вачана̄нам̣. паджджати етена аттхоти хи падам̣. пада̄нанти ча сам̣са̄мисамбандхе са̄мивачанам̣, пакаран̣асса̄ти пана авайава̄вайавӣсамбандхе.