9. наваманайо сампайуттенасампайуттападаван̣н̣ана̄

319. ‘‘сама̄сападам̣ ида’’нти ватва̄ айам̣ на̄ма сама̄соти дассенто ‘‘йасса кхандха̄дино’’тиа̄дима̄ха, йасса ведана̄ккхандха̄диноти аттхо. йам̣ идха сампайуттам̣ вуттанти имасмим̣ наваманайе йам̣ дхаммаджа̄там̣ сампайуттанти вуттам̣. рӯпаккхандха̄дӣсу аран̣антесу аббхантараба̄хирама̄тика̄дхаммесӯти ниддха̄ран̣е бхуммам̣. тан̃хи дхаммаджа̄там̣ аттана̄ сампайуттена ведана̄ккхандха̄дина̄ сайам̣ сампайуттанти ниддха̄ритам̣. айоготи асампайого. ваккхати дасаманайе. таттха хи ‘‘рӯпаккхандхена ведана̄дайо виппайутта̄, техи рӯпаккхандхо виппайутто’’ти ватва̄ нибба̄нам̣ катханти чоданам̣ сандха̄йа̄ха ‘‘нибба̄нам̣ пана сукхумарӯпагатикамева̄’’ти вуттам̣. ‘‘мана̄йатанам̣ екена̄йатанена ека̄йа дха̄туйа̄ кехичи виппайутта’’нти еттха хи йатха̄ сукхумарӯпам̣ вийа сарӯпато ануддхат̣ампи нибба̄нам̣ кехичӣтипадена гахитамева хотӣти едисесу т̣ха̄несу нибба̄нам̣ сукхумарӯпагатиканти вин̃н̃а̄йати, евамидха̄пи ‘‘рӯпамиссакехи ва̄’’ти етена анупа̄диннаанупа̄да̄нийа̄дӣхи нибба̄намиссакехипи асампайого вутто хотӣти дат̣т̣хаббо. авикалачатуккхандхасан̇га̄хакехи падехи сахаваттино ан̃н̃асса сампайогино абха̄вато атӣта̄на̄гатехи ча сампайого наттхева̄ти тасса айуджджама̄натам̣ дассенто ‘‘ваттама̄на̄намева…пе… арӯпабхава̄дӣхӣти аттхо’’ти а̄ха. итарети йе сампайогам̣ лабханти, ке пана те рӯпена асаммисса̄ арӯпекадесабхӯта̄. тена̄ха ‘‘ведана̄ккхандха̄дайо’’ти.

наваманайасампайуттенасампайуттападаван̣н̣ана̄ нит̣т̣хита̄.