4. чатуттханайо сан̇гахитенасан̇гахитападаван̣н̣ана̄

191. тин̣н̣ам̣ сан̇гаха̄нанти кхандха̄йатанадха̄тусан̇гаха̄нам̣. сан̇гахан̣апуббам̣ асан̇гахан̣ам̣, асан̇гахан̣апуббам̣ сан̇гахан̣ан̃ча вуччама̄нам̣ сан̇гахан̣а̄сан̇гахан̣а̄нам̣ паваттивисесена вуттам̣ хотӣти а̄ха ‘‘сан̇гахан̣а̄…пе… уддит̣т̣ха̄’’ти. сан̇гаха̄бха̄вакато асан̇гахо сан̇гахахетуко сан̇гахасса паваттивисесойева на̄ма хотӣти а̄ха ‘‘сан̇гахан̣аппаваттивисесавирахе’’ти. кеначи самудайасачча̄дина̄ тӣхипи сан̇гахехи сан̇гахитена сан̇кха̄раккхандхапарийа̄паннена дхаммависесена пуна татхева сан̇гахито со ева самудайасачча̄дико дхаммависесо сан̇гахитена сан̇гахито. сан̇га̄хакатта̄бха̄васаббха̄ва̄ сан̇га̄хакабха̄вена на уддхат̣а̄, на асан̇га̄хакатта̄ ева. йатха̄ хи тӣхи сан̇гахехи на сан̇га̄хака̄, евам̣ двӣхи, екенапи сан̇гахена на сан̇га̄хака̄ идха на уддхат̣а̄. техи сан̇гахита̄ти техи тӣхи сан̇гахехи сан̇гахита̄ дхамма̄. йасса̄ти йасса аттано сан̇га̄хакасса.

сакалава̄чакена̄ти анавасесам̣ кхандха̄диаттхам̣ вадантена. тена кхандха̄дипадена̄ти ‘‘тенева сан̇гахам̣ гаччхеййа̄’’ти еттха тена кхандха̄дипадена̄ти евам̣ йоджетаббам̣. евам̣ пана айоджетва̄ ‘‘йам̣ аттано сан̇га̄хакам̣ сан̇ган̣хитва̄ пуна тенева сан̇гахам̣ гаччхеййа, там̣ ан̃н̃ам̣ сан̇гахитам̣ на̄ма наттхӣ’’ти евам̣ на сакка̄ ваттум̣. касма̄ти че? на хи йена самудайасачча̄дина̄ йам̣ сан̇кха̄раккхандхапарийа̄паннам̣ дхаммаджа̄там̣ кхандха̄дисан̇гахехи сан̇гахитам̣, тенева самудайасачча̄дина̄ тасса тадавасит̣т̣хасса сан̇кха̄раккхандхадхаммасса, на ча тассева кеваласса самудайасачча̄дикасса сан̇гахо пуччхито виссаджджитоти йоджана̄, атха кхо тена сан̇кха̄раккхандхадхаммена пхасса̄дина̄. сан̇гахитасса̄ти сан̇гахитата̄висит̣т̣хасса̄ти аттхо. тасма̄ аттано сан̇га̄хакам̣ сакалаккхан̣а̄дим̣ сан̇ган̣хитва̄ пуна тена кхандха̄дипадена йам̣ сан̇гахам̣ гаччхеййа, там̣ та̄дисам̣ наттхӣти аттхо ведитаббо. ведана̄ саддо ча кхандхо а̄йатанан̃ча̄ти ведана̄ висум̣ кхандхо, саддо ча висум̣ а̄йатананти аттхо. ан̃н̃ена кхандхантара̄дина̄. асаммиссанти абйа̄катадуккхасачча̄ди вийа амисситам̣. на хи…пе… еттха̄ти сан̇гахитата̄висит̣т̣хена дхаммена йо дхаммо сан̇гахито, тасса сан̇гахитата̄висит̣т̣хойева йо сан̇гахо, со на еттха ва̄ре пуччхито виссаджджито ча. сан̇гахова̄ти кевало сан̇гахо, на катта̄пеккхоти аттхо. на сан̇га̄хакена̄ти идам̣ йатха̄вуттена аттхена ниваттитасса дассанам̣. на хӣтиа̄ди там̣саматтханам̣.

чатуттханайасан̇гахитенасан̇гахитападаван̣н̣ана̄ нит̣т̣хита̄.