10. парин̣атасиккха̄падаван̣н̣ана̄

657-659. дасаме уддисса т̣хапитабха̄гети аттано гхарепи уддиситва̄ висум̣ т̣хапитакот̣т̣ха̄се. ‘‘екам̣ майхам̣, екам̣ имасса дехӣ’’ти евам̣ екава̄ча̄йа а̄паджджитаббатта̄ ‘‘а̄паджджеййа екато’’ти вуттам̣. тумха̄кам̣ саппиа̄дӣни а̄бхата̄нӣти тумха̄кам̣ аттха̄йа а̄бхата̄ни саппиа̄дӣни. парин̣атабха̄вам̣ джа̄нитва̄пи вуттавидхина̄ вин̃н̃а̄пентена тесам̣ сантакамева вин̃н̃а̄питам̣ на̄ма хотӣти а̄ха – ‘‘майхампи детха̄ти вадати, ват̣т̣атӣ’’ти.

660. пуппхампи а̄ропетум̣ на ват̣т̣атӣти идам̣ парин̣атам̣ сандха̄йа вуттам̣. саче пана екасмим̣ четийе пӯджитам̣ пуппхам̣ гахетва̄ ан̃н̃асмим̣ четийе пӯджети, ват̣т̣ати. т̣хитам̣ дисва̄ти сесакам̣ гахетва̄ т̣хитам̣ дисва̄. имасса сунакхасса ма̄ дехи, етасса дехӣти идам̣ парин̣атейева. тираччха̄нагатасса париччаджитва̄ динне пана там̣ пала̄петва̄ ан̃н̃ам̣ бхун̃джа̄петум̣ ват̣т̣ати. ‘‘каттха дема̄тиа̄дина̄ екена̄ка̄рена па̄л̣ийам̣ ана̄патти дассита̄, евам̣ пана апуччхитепи апарин̣атам̣ иданти джа̄нантена аттано ручийа̄ йаттха иччхати, таттха да̄петум̣ ват̣т̣атӣ’’ти тӣсупи ган̣т̣хипадесу вуттам̣. йаттха иччхатха, таттха детха̄ти еттха̄пи ‘‘тумха̄кам̣ ручийа̄’’ти вуттатта̄ йаттха иччхати, таттха да̄петум̣ лабхати. па̄л̣ийам̣ а̄гатанайенева̄ти ‘‘йаттха тумха̄кам̣ деййадхаммо’’тиа̄дина̄ найена. сан̇гхапарин̣атабха̄во, там̣ н̃атва̄ аттано парин̣а̄манам̣, пат̣ила̄бхоти има̄неттха тӣн̣и ан̇га̄ни.

парин̣атасиккха̄падаван̣н̣ана̄ нит̣т̣хита̄.

нит̣т̣хито паттавагго татийо.

ити самантапа̄са̄дика̄йа винайат̣т̣хакатха̄йа са̄раттхадӣпанийам̣

ниссаггийаван̣н̣ана̄ нит̣т̣хита̄.

дутийо бха̄го нит̣т̣хито.