5. нисӣданасантхатасиккха̄падаван̣н̣ана̄

565-6. нисӣданасантхатасиккха̄паде пана пан̃н̃а̄йиссатӣти саче са̄ катика̄ мана̄па̄ бхависсати, мана̄пата̄йа бхиккхусан̇гхо сандиссиссати. саче амана̄па̄, амана̄пата̄йа сандиссиссатӣти адхиппа̄йо, а̄ран̃н̃акан̇га̄дӣни тӣн̣и па̄л̣ийам̣ падха̄нан̇гавасена вутта̄ни, сеса̄нипи те сама̄дийим̣суйева̄ти ведитаббам̣. тенева̄ха ‘‘сантхате чатуттхачӣварасан̃н̃ита̄йа̄’’ти. уджджхитва̄ти виссаджджетва̄.

567. нисӣданасантхататта̄ нива̄санапа̄рупанакиччам̣ наттхӣти а̄ха ‘‘саким̣ нисиннан̃чева нипаннан̃ча̄’’ти. видаттхиматтанти сугатавидаттхим̣ сандха̄йа вадати. идан̃ча хет̣т̣химапариччхедадассанаттхам̣ вуттам̣. ‘‘вита̄на̄дӣнам̣йева аттха̄йа каран̣е ана̄паттивачанато саче нипаджджанаттха̄йа каронти, а̄паттийева̄’’ти тӣсупи ган̣т̣хипадесу вуттам̣. акаппийатта̄ пана ‘‘парибхун̃джитум̣ на ват̣т̣атӣ’’ти вуттам̣. идан̃ча нисӣданасантхатам̣ на̄ма нисӣданачӣварамева, на̄н̃н̃анти ваданти. нисӣданасиккха̄падепи нисӣданам̣ на̄ма садасам̣ вуччатӣти ча ат̣т̣хакатха̄йан̃часса ‘‘сантхатасадисам̣ сантхаритва̄ екасмим̣ анте сугатавидаттхийа̄ видаттхиматте падесе двӣсу т̣ха̄несу пха̄летва̄ тиссо даса̄ карӣйанти, та̄хи даса̄хи садасам̣ на̄ма вуччатӣ’’ти (па̄чи. ат̣т̣ха. 531) вачанато идха̄пи ‘‘нисӣданам̣ на̄ма садасам̣ вуччатӣ’’ти ча ‘‘сантхате чатуттхачӣварасан̃н̃ита̄йа̄’’ти ча вачанато там̣ йуттам̣ вийа диссати. кечи пана ‘‘нисӣданасантхатам̣ ел̣акалома̄ни сантхаритва̄ сантхатам̣ вийа каронти, там̣ ава̄йимам̣ анадхит̣т̣ха̄нупагам̣, нисӣданачӣварам̣ пана чханнам̣ чӣвара̄нам̣ ан̃н̃атарена кароти адхит̣т̣ха̄нупагам̣, там̣ каронта̄ ча нантака̄ни сантхаритва̄ сантхатасадисам̣ каронтӣ’’ти ваданти, вӣмам̣ситва̄ йуттатарам̣ гахетаббам̣.

нисӣданасантхатасиккха̄падаван̣н̣ана̄ нит̣т̣хита̄.