3. кхамбхакатаваггаван̣н̣ана̄

603. татийавагге патте сан̃н̃а̄ паттасан̃н̃а̄, са̄ асса аттхӣти паттасан̃н̃ӣ, аттано бха̄джане упанибандхасан̃н̃ӣ хутва̄ти аттхо. бйан̃джанам̣ пана ана̄дийитва̄ аттхаматтамева дассетум̣ ‘‘патте сан̃н̃ам̣ катва̄’’ти вуттам̣.

604. олон̣ӣти ека̄ бйан̃джанавикати. ‘‘йо кочи суддхо кан̃джикатакка̄дирасао’’ти кечи. са̄касӯпеййа-ггахан̣ена йа̄ ка̄чи сӯпеййаса̄кехи ката̄ бйан̃джанавикати вутта̄. мам̣сараса̄дӣнӣти а̄ди-саддена авасеса̄ сабба̄пи бйан̃джанавикати сан̇гахита̄ти дат̣т̣хаббам̣. тенева ма̄тика̄т̣т̣хакатха̄йам̣ (кан̇кха̄. ат̣т̣ха. самасӯпакапат̣иггахан̣асиккха̄падаван̣н̣ана̄) вуттам̣ ‘‘т̣хапетва̄ пана сӯпам̣ авасеса̄ сабба̄пи сӯпеййа̄ бйан̃джанавикати расарасо на̄ма хотӣ’’ти.

605. самапун̣н̣анти адхит̣т̣ха̄нупагасса паттасса антомукхават̣т̣илекхам̣ анатикка̄метва̄ рачитам̣. самабхаританти тассева вевачанам̣. пхала̄пхала̄дӣти а̄ди-саддена одана̄димпи сан̇ган̣ха̄ти. хет̣т̣ха̄ орохатӣти саманта̄ ока̄сасаббха̄вато ча̄лийама̄нам̣ хет̣т̣ха̄ бхассати. маттхаке тхӯпӣкатам̣ пӯвамева ват̣ам̣сакасадисатта̄ ‘‘пӯвават̣ам̣сака’’нти вуттам̣. пуппхават̣ам̣сака̄дӣсупи есева найо.

йасма̄ ‘‘саматиттико пин̣д̣апа̄то пат̣иггахетаббо’’ти вачанам̣ пин̣д̣апа̄то сампун̣н̣о пат̣иггахетабботи дӣпети, тасма̄ аттано хаттхагате патте пин̣д̣апа̄то диййама̄но тхӯпӣкатопи че хоти, ват̣т̣атӣти дӣпети. ‘‘тхӯпӣкатам̣ пин̣д̣апа̄там̣ пат̣игган̣ха̄ти, а̄патти дуккат̣асса̄’’ти хи вачанам̣ пат̣хамам̣ тхӯпӣкатам̣ пин̣д̣апа̄там̣ паччха̄ пат̣игган̣хато а̄паттӣти дӣпети. ‘‘патте пат̣игган̣хато ча тхӯпӣкатам̣ хоти, ват̣т̣ати атхӯпӣкатасса пат̣иггахитатта̄, пайого пана наттхи ан̃н̃атра пуббадеса̄’’ти кеначи вуттам̣, там̣ на са̄рато паччетаббам̣. ‘‘на тхӯпӣкатам̣ пин̣д̣апа̄там̣ пат̣игган̣ха̄тӣ’’ти вачанам̣ пат̣хамам̣ тхӯпӣкатассева паччха̄ пат̣игган̣ханам̣ дӣпети. на хи хаттхагатепи патте диййама̄нам̣ тхӯпӣкатам̣ ган̣ханто тхӯпӣкатам̣ пин̣д̣апа̄там̣ пат̣игган̣ханто на̄ма на хоти, на ча тена саматиттико пин̣д̣апа̄то пат̣иггахитоти сакка̄ вин̃н̃а̄тум̣. ‘‘тхӯпӣката’’нти ча бха̄ванапум̣саканиддесе гайхама̄не айаматтхо сут̣т̣хутарам̣ па̄кат̣ойева̄ти.

кхамбхакатаваггаван̣н̣ана̄ нит̣т̣хита̄.