4. саккаччаваггаван̣н̣ана̄

608. чатуттхавагге сапада̄нанти еттха да̄нам̣ вуччати авакхан̣д̣анам̣, апетам̣ да̄нато апада̄нам̣, анавакхан̣д̣ананти аттхо. саха апада̄нена сапада̄нам̣, авакхан̣д̣анавирахитам̣, анупат̣ипа̄т̣ийа̄ти вуттам̣ хоти. тена̄ха ‘‘таттха таттха одхим̣ акатва̄ анупат̣ипа̄т̣ийа̄’’ти.

611. йасмим̣ самайе ‘‘па̄н̣о на хантаббо’’ти ра̄джа̄но бхерим̣ чара̄пенти, айам̣ ма̄гха̄тасамайо на̄ма. идха ана̄паттийам̣ гила̄но на а̄гато, тасма̄ гила̄нассапи а̄патти. сӯподанавин̃н̃аттисиккха̄паде асан̃чичча ассатийа̄ти еттха ‘‘мукхе паккхипитва̄ пуна виппат̣иса̄рӣ хутва̄ чхад̣д̣ентасса аручийа̄ пависанте ‘асан̃чичча̄’ти вуччати, вин̃н̃аттимпи авин̃н̃аттимпи етасмим̣ т̣ха̄не т̣хитам̣ сахаса̄ гахетва̄ бхун̃джанте ‘ассатийа̄’ти вуччатӣ’’ти тӣсупи ган̣т̣хипадесу вуттам̣.

614-615. уджджха̄не сан̃н̃а̄ уджджха̄насан̃н̃а̄, са̄ асса аттхӣти уджджха̄насан̃н̃ӣ. ‘‘майӯран̣д̣ам̣ атимаханта’’нти вачанато майӯран̣д̣аппама̄н̣о кабал̣о на ват̣т̣ати. кечи пана ‘‘майӯран̣д̣ато маханто на ват̣т̣атӣ’’ти ваданти, там̣ на гахетаббам̣, ‘‘на̄тимаханта’’нти ча атимахантассева пат̣иккхиттатта̄ кхуддаке а̄патти на диссати. ‘‘майӯран̣д̣ам̣ атимахантам̣, куккут̣ан̣д̣ам̣ атикхуддакам̣, тесам̣ вемаджджхаппама̄н̣о’’ти имина̄ пана са̄руппавасена кхуддакампи пат̣иккхипитва̄ париччхедо на дасситоти ведитаббам̣.

саккаччаваггаван̣н̣ана̄ нит̣т̣хита̄.