2. ратанасиккха̄падаван̣н̣ана̄

502. дутийе маха̄латам̣ на̄ма̄ти патикулам̣ гаччхантийа̄ кира тасса̄ пита̄ маха̄лата̄пил̣андханам̣ на̄ма ка̄ра̄песи. тасмим̣ пил̣андхане чатассо ваджирана̄л̣ийо таттха таттха аппетаббат̣т̣ха̄не аппанавасена винийогам̣ агамам̣су, мутта̄нам̣ ека̄даса на̄л̣ийо, пава̄л̣асса два̄вӣсати на̄л̣ийо, ман̣ӣнам̣ теттим̣са на̄л̣ийо. ити етехи ча ан̃н̃ехи ча вел̣урийалохитан̇камаса̄рагалла̄дӣхи саттаван̣н̣ехи ча ратанехи нит̣т̣ха̄нам̣ агама̄си. там̣ сӣсе пат̣имуккам̣ йа̄ва па̄дапит̣т̣хийа̄ бхассати, пан̃чаннам̣ хаттхӣнам̣ балам̣ дха̄райама̄на̄ва иттхӣ нам̣ дха̄ретум̣ саккоти. там̣ сандха̄йетам̣ вуттам̣.

506. а̄васатхасса пана суппапа̄то ва̄ мусалапа̄то ва̄ упача̄ро на̄ма̄ти йоджетаббам̣. а̄васатхоти четтха антоа̄ра̄ме ва̄ хоту ан̃н̃аттха ва̄, аттано васанат̣т̣ха̄нам̣ вуччати. чханденапи бхайенапӣти вад̣д̣хакӣа̄дӣсу чхандена, ра̄джаваллабхесу бхайена. тамева бхиккхум̣ а̄сан̇кантӣти виссаритва̄ гаманака̄ле аттано паччхато ан̃н̃асса̄бха̄ва̄ а̄сан̇канти. патирӯпам̣ на̄ма ратанасаммате пам̣сукӯлаггахан̣ам̣ ва̄ ратане нируссуккагаманам̣ ва̄. йади хи там̣ ратанасамматам̣ а̄ма̄сам̣ че, ‘‘наттхи етасса са̄мӣ’’ти пам̣сукӯлам̣ гахессати. ана̄ма̄сам̣ че, ‘‘наттхи етасса са̄мӣ’’ти пам̣сукӯлачхиннапалибодхо нирапеккхо гамиссати. сама̄дапетва̄ти ан̃н̃ам̣ сама̄дапетва̄, ‘‘уддисса арийа̄ тит̣т̣ханти, еса̄ арийа̄найа̄чана̄’’ти (джа̄. 1.7.59) вуттанайена йа̄читва̄ти аттхо. сесаметтха утта̄намева. ананун̃н̃а̄такаран̣ам̣, парасантаката̄, висса̄сагга̄хапам̣сукӯласан̃н̃а̄нам̣ абха̄во, уггахан̣ам̣ ва̄ уггаха̄панам̣ ва̄ти има̄ни панеттха чатта̄ри ан̇га̄ни.

ратанасиккха̄падаван̣н̣ана̄ нит̣т̣хита̄.