5. таласаттикасиккха̄падаван̣н̣ана̄

457. пан̃чаме на пахаритука̄мата̄йа диннатта̄ дуккат̣анти еттха пахаритука̄мата̄йа пахат̣е пуримасиккха̄падена па̄читтийам̣, учча̄ретука̄мата̄йа кевалам̣ уггиран̣аматте кате имина̄ па̄читтийам̣. имина̄ пана вираджджхитва̄ паха̄ро динно, тасма̄ дуккат̣ам̣. кимидам̣ дуккат̣ам̣ паха̄рапаччайа̄, уда̄ху уггиран̣апаччайа̄ти? таттха кечи та̄ва ваданти ‘‘паха̄рапаччайа̄ ева дуккат̣ам̣, уггиран̣апаччайа̄ па̄читтийанти садуккат̣ам̣ па̄читтийам̣ йуджджати. пуриман̃хи уггиран̣ам̣, паччха̄ паха̄ро, на ча паччха̄ паха̄рам̣ нисса̄йа пуримам̣ уггиран̣ам̣ ана̄паттиваттхукам̣ бхавитумарахатӣ’’ти.

майам̣ панеттха евам̣ таккайа̄ма ‘‘уггиран̣асса аттано сабха̄венева асан̣т̣хитатта̄ таппаччайа̄ па̄читтийена на бхавитаббам̣, асуддхачиттена катапайогатта̄ пана на сакка̄ еттха ана̄паттийа̄ бхавитунти дуккат̣ам̣ вуттам̣. ‘на пахаритука̄мата̄йа диннатта̄’ти имина̄ ча паха̄рапаччайа̄ пуримасиккха̄падена па̄читтийа̄самбхаве ка̄ран̣ам̣ вуттам̣, на пана паха̄рапаччайа̄ дуккат̣асамбхаве. на хи апахаритука̄мата̄йа паха̄ре динне пуримасиккха̄падена паха̄рапаччайа̄ па̄читтийена дуккат̣ена ва̄ бхавитум̣ йутта’’нти. ‘‘тираччха̄на̄дӣнам̣ асучикаран̣а̄дим̣ дисва̄ куджджхитва̄пи уггирантасса моккха̄дхиппа̄йо ева̄’’ти ваданти. сесаметтха утта̄намева. купитата̄, на моккха̄дхиппа̄йата̄, упасампаннасса таласаттиуггиран̣анти има̄ни панеттха тӣн̣и ан̇га̄ни.

таласаттикасиккха̄падаван̣н̣ана̄ нит̣т̣хита̄.