9. пан̣ӣтабходжанасиккха̄падаван̣н̣ана̄

257-259. наваме пан̣ӣтасам̣сат̣т̣ха̄ни бходжана̄ни пан̣ӣтабходжана̄ни. йатха̄ хи а̄джан̃н̃айутто ратхо ‘‘а̄джан̃н̃аратхо’’ти вуччати, евамидха̄пи пан̣ӣтасам̣сат̣т̣ха̄ни саттадхан̃н̃аниббатта̄ни бходжана̄ни ‘‘пан̣ӣтабходжана̄нӣ’’ти вутта̄ни. йехи пана пан̣ӣтехи сам̣сат̣т̣ха̄ни, та̄ни ‘‘пан̣ӣтабходжана̄нӣ’’ти вуччанти, тесам̣ пабхедадассанаттхам̣ ‘‘сеййатхидам̣, саппи наванӣта’’нтиа̄ди па̄л̣ийам̣ вуттам̣. ‘‘йесам̣ мам̣сам̣ каппатӣ’’ти идан̃ча па̄читтийаваттхупариччхедадассанаттхам̣ вуттам̣, на пана каппийаваттхупариччхедадассанаттхам̣. на хи акаппийамам̣сасатта̄нам̣ саппиа̄дӣни на каппанти. екан̃хи мануссаваса̄телам̣ т̣хапетва̄ саббесам̣ кхӣрасаппинаванӣтаваса̄телесу акаппийам̣ на̄ма наттхи. саппибхаттанти еттха кин̃ча̄пи сапписам̣сат̣т̣хам̣ бхаттам̣ саппибхаттам̣, саппи ча бхаттан̃ча саппибхаттантипи вин̃н̃а̄йати, ат̣т̣хакатха̄су пана ‘‘са̄либхаттам̣ вийа саппибхаттам̣ на̄ма наттхӣ’’ти ка̄ран̣ам̣ ватва̄ дуккат̣ассева дал̣хатарам̣ катва̄ вуттатта̄ на сакка̄ ан̃н̃ам̣ ваттум̣. ат̣т̣хакатха̄чарийа̄ ева хи ӣдисесу т̣ха̄несу пама̄н̣ам̣.

мӯланти каппийабхан̣д̣ам̣ сандха̄йа вуттам̣. ана̄паттӣти висан̇кетатта̄ сабба̄хийева а̄паттӣхи ана̄патти. кечи пана ‘‘па̄читтийенева ана̄патти вутта̄, сӯподанавин̃н̃аттидуккат̣ам̣ пана хотийева̄’’ти ваданти, там̣ на гахетаббам̣. каппийасаппина̄ акаппийасаппина̄ти ча идам̣ каппийа̄каппийамам̣са̄нам̣ васена вуттам̣, тасма̄ каппийамам̣сасаппина̄ акаппийамам̣сасаппина̄ти еваметтха аттхо гахетаббо. на̄на̄ваттхука̄нӣти саппинаванӣта̄дӣнам̣ васена вуттам̣.

261. маха̄на̄масиккха̄падена ка̄ретабботи еттха –

‘‘агила̄нена бхиккхуна̄ чатума̄сапаччайапава̄ран̣а̄ са̄дитабба̄ ан̃н̃атра пунапава̄ран̣а̄йа ан̃н̃атра ниччапава̄ран̣а̄йа, тато че уттари са̄дийеййа, па̄читтийа’’нти (па̄чи. 306) –

идам̣ маха̄на̄масиккха̄падам̣ на̄ма. имина̄ ча сиккха̄падена сан̇гхавасена гила̄напаччайапава̄ран̣а̄йа пава̄ритат̣т̣ха̄не саче таттха раттӣхи ва̄ бхесаджджехи ва̄ париччхедо като хоти, еттака̄йева раттийо еттака̄ни ва̄ бхесаджджа̄ни вин̃н̃а̄петабба̄нӣти. атха тато раттипарийантато ва̄ бхесаджджапарийантато ва̄ уттари на бхесаджджакаран̣ӣйена ва̄ бхесаджджам̣ ан̃н̃абхесаджджакаран̣ӣйена ва̄ ан̃н̃ам̣ бхесаджджам̣ вин̃н̃а̄пентасса па̄читтийам̣ вуттам̣. тасма̄ агила̄но гила̄насан̃н̃ӣ хутва̄ пан̃ча бхесаджджа̄ни вин̃н̃а̄пенто на бхесаджджакаран̣ӣйена бхесаджджам̣ вин̃н̃а̄пенто на̄ма хотӣти ‘‘маха̄на̄масиккха̄падена ка̄ретаббо’’ти вуттам̣. ета̄ни па̄т̣идесанӣйаваттхӯнӣти па̄л̣ийам̣ а̄гатасаппиа̄дӣни сандха̄йа вуттам̣. па̄л̣ийам̣ ана̄гата̄ни пана акаппийасаппиа̄дӣни бхиккхунӣнампи дуккат̣аваттхӯнӣти ведитаббам̣. сӯподанавин̃н̃аттийанти бхиккхӯнам̣ па̄читтийаваттхӯни бхиккхунӣнам̣ па̄т̣идесанӣйаваттхӯни ча т̣хапетва̄ авасесавин̃н̃аттим̣ сандха̄йа вуттам̣. сесаметтха утта̄намева. пан̣ӣтабходжаната̄, агила̄ната̄, акатавин̃н̃аттийа̄ пат̣ила̄бхо, аджджхохаран̣анти има̄ни панеттха чатта̄ри ан̇га̄ни.

пан̣ӣтабходжанасиккха̄падаван̣н̣ана̄ нит̣т̣хита̄.