5. дутийасена̄санасиккха̄падаван̣н̣ана̄

116. дутийасена̄санасиккха̄паде еттакамева вуттанти ат̣т̣хакатха̄су вуттам̣. ‘‘идан̃ча ат̣т̣хакатха̄су татха̄вуттабха̄вадассанаттхам̣ вуттам̣, ан̃н̃ампи та̄дисам̣ ман̃чапӣт̣хесу аттхаритам̣ паччаттхаран̣амева̄’’ти тӣсупи ган̣т̣хипадесу вуттам̣. ма̄тика̄т̣т̣хакатха̄йам̣ пана ‘‘паччаттхаран̣ам̣ на̄ма па̄ва̄ро коджавоти еттакамева̄’’ти нийаметва̄ вуттам̣, тасма̄ ган̣т̣хипадесу вуттам̣ имина̄ на самети, вӣмам̣ситва̄ гахетаббам̣. сена̄санатоти саббапаччхимасена̄санато. йо кочӣти тасса н̃а̄тако ва̄ ан̃н̃а̄тако ва̄ йо кочи.

117. паривен̣анти екекасса виха̄расса париккхепаббхантарам̣. курундат̣т̣хакатха̄йам̣ вуттамеваттхам̣ сависесам̣ катва̄ дассетум̣ ‘‘кин̃ча̄пи вутто’’тиа̄ди а̄раддхам̣. ‘‘апариччханне ман̣д̣апе’’ти висум̣ йоджетаббам̣. тенева ма̄тика̄т̣т̣хакатха̄йам̣ (кан̇кха̄. ат̣т̣ха. дутийасена̄санасиккха̄падаван̣н̣ана̄) ‘‘апариччханнаман̣д̣апе ва̄ париччханне ва̄пи бахӯнам̣ саннипа̄табхӯте’’ти вуттам̣. бходжанаса̄ла̄йампи айам̣ висесо лаббхатийева. ваттаббам̣ наттхӣти висесетва̄ кин̃чи ваттаббам̣ наттхи. палуджджатӣти винассати. нассеййа̄ти чора̄дӣхи винассеййа.

118. йена ман̃чам̣ ва̄ пӣт̣хам̣ ва̄ винанти, там̣ ман̃чапӣт̣хакава̄нам̣. силуччайален̣анти силуччайе лен̣ам̣, паббатагуха̄ти аттхо. ‘‘сена̄санам̣ упачика̄хи кха̄йита’’нти имасмим̣ ваттхусмим̣ пан̃н̃аттатта̄ ваттхуанурӯпавасена ат̣т̣хакатха̄йам̣ упачика̄сан̇ка̄йа абха̄ве ана̄патти вутта̄. ваттаккхандхаке гамикаваттам̣ пан̃н̃апентена ‘‘сена̄санам̣ а̄пуччхитабба’’нти вуттатта̄ кевалам̣ итикаттабба̄ка̄раматтадассанаттхам̣ ‘‘а̄пуччханам̣ пана ватта’’нти вуттам̣, на пана ваттабхедена дуккат̣анти дассанаттхам̣. тенева андхакат̣т̣хакатха̄йам̣ ‘‘сена̄санам̣ а̄пуччхитабба’’нти еттха ‘‘йам̣ па̄са̄н̣апит̣т̣хийам̣ ва̄ па̄са̄н̣аттхамбхесу ва̄ катасена̄санам̣ йаттха упачика̄ на̄роханти, там̣ ана̄пуччхантассапи ана̄паттӣ’’ти ваккхати, тасма̄ йам̣ вуттам̣ ган̣т̣хипаде ‘‘та̄дисе сена̄сане ана̄пуччха̄ гаччхантасса па̄читтийам̣ наттхи, гамикаваттавасена пана ана̄пуччха̄ гаччхато ваттабхедо хоти, тасма̄ дуккат̣ам̣ а̄паджджатӣ’’ти, там̣ на гахетаббам̣.

паччхимасса а̄бхогена мутти наттхӣти тасса паччхато гаччхантасса ан̃н̃асса абха̄вато вуттам̣. екам̣ ва̄ песетва̄ а̄пуччхитаббанти еттха гаманачиттасса уппаннат̣т̣ха̄нато ана̄пуччхитва̄ гаччхато дутийапа̄дуддха̄ре па̄читтийам̣. кин̃ча̄пи ман̃чам̣ ва̄ пӣт̣хам̣ ва̄ аджджхока̄се никкхипитва̄ гаччхантасса идха висум̣ а̄патти на вутта̄, татха̄пи ака̄ле аджджхока̄се ман̃чапӣт̣ха̄ни пан̃н̃апетва̄ гаччхантасса лед̣д̣упа̄та̄тиккаме пуримасиккха̄падена па̄читтийам̣, париккхепа̄тиккаме имина̄ дуккат̣анти ведитаббам̣. ‘‘ман̣д̣апе ва̄ руккхамӯле ва̄’’ти имина̄ аджджхока̄сопи сан̇гахитойева̄ти таттха̄пи дуккат̣ам̣ идха вуттамева̄ти дат̣т̣хаббам̣. сеййам̣ пана аджджхока̄се сантхаритва̄ гаччхантасса убхайенапи дуккат̣амева. ‘‘сан̇гхике виха̄ре сан̇гхикам̣йева сеййам̣ сантхаритва̄ паккамантасса па̄читтийам̣ вуттанти убхосу екекасмим̣ сан̇гхике дуккат̣а’’нти ваданти. сесаметтха утта̄намева. вутталаккхан̣асеййа̄, тасса̄ сан̇гхиката̄, вутталаккхан̣е виха̄ре сантхаран̣ам̣ ва̄ сантхара̄панам̣ ва̄, апалибуддхата̄, а̄пада̄йа абха̄во, анапеккхасса диса̄паккаманам̣, упача̄расӣма̄тиккамоти има̄ни панеттха сатта ан̇га̄ни.

дутийасена̄санасиккха̄падаван̣н̣ана̄ нит̣т̣хита̄.