1. пат̣хамасан̇гха̄дисесасиккха̄падаван̣н̣ана̄

679. сан̇гха̄дисесакан̣д̣е ‘‘дутийасса а̄рочетӣ’’ти еттха̄пи двӣсупи ад̣д̣ака̄ракесу йасса кассачи дутийасса катхам̣ йо кочи а̄рочетӣти еваматтхо гахетабботи а̄ха ‘‘есева найо’’ти.

гатигатанти чирака̄лаппаваттам̣. а̄паттӣти а̄паджджанам̣. ‘‘нисса̄ран̣ӣйа’’нти идам̣ каттуаттхе сиддханти а̄ха ‘‘нисса̄ретӣ’’ти. а̄паннам̣ бхиккхуним̣ сан̇гхато вийоджети, вийоджанахету хотӣти аттхо.

гӣва̄йева̄ти а̄н̣аттийа̄ абха̄вато. тесам̣ анаттхака̄мата̄йа̄ти ‘‘чоро’’ти вуттам̣ мама вачанам̣ сутва̄ кечи дан̣д̣иссанти джӣвита̄ воропессантӣти евам̣ сан̃н̃а̄йа. етена кевалам̣ бхайена ва̄ париккха̄раггахан̣аттхам̣ ва̄ сахаса̄ ‘‘чоро’’ти вутте дан̣д̣итепи на досоти дассети. ра̄джапуриса̄нан̃хи ‘‘чоро айа’’нти уддисса катхане ева гӣва̄, бхиккхӯнам̣, пана а̄ра̄мика̄дӣнам̣ ва̄ саммукха̄ ‘‘асуко чоро евамака̄сӣ’’ти кеначи вуттавачанам̣ нисса̄йа а̄ра̄мика̄дӣсу ра̄джапуриса̄нам̣ ватва̄ дан̣д̣а̄пентесупи бхиккхусса на гӣва̄ ра̄джапуриса̄нам̣ авуттатта̄. йесан̃ча вуттам̣, техи сайам̣ чорасса адан̣д̣итатта̄ти гахетаббам̣. ‘‘твам̣ етасса сантакам̣ аччхинда̄’’ти а̄н̣аттопи хи саче ан̃н̃ена аччхинда̄пети, а̄н̣а̄пакасса ана̄патти висан̇кетатта̄. ‘‘аттано вачанакара’’нти идам̣ са̄мӣчивасена вуттам̣. вачанам̣ акаронта̄нам̣ ра̄джапуриса̄нампи ‘‘имина̄ гахитапариккха̄рам̣ а̄хара̄пехи, ма̄ часса дан̣д̣ам̣ карохӣ’’ти уддисса вадантасса̄пи дан̣д̣е гахитепи на гӣва̄ ева дан̣д̣аггахан̣асса пат̣иккхиттатта̄, ‘‘асукабхан̣д̣ам̣ авахара̄’’ти а̄н̣а̄петва̄ виппат̣иса̄ре уппанне пуна пат̣иккхипане (па̄ра̄. 121) вийа.

да̄са̄дӣнам̣ сампат̣иччхане вийа тадаттха̄йа ад̣д̣акаран̣е бхиккхӯнампи дуккат̣анти а̄ха ‘‘акаппийаад̣д̣о на̄ма на ват̣т̣атӣ’’ти. кеначи пана бхиккхуна̄ кхетта̄диаттха̄йа воха̄рика̄нам̣ сантикам̣ гантва̄ ад̣д̣е катепи там̣ кхетта̄дисампат̣иччхане вийа саббесам̣ акаппийам̣ на хоти пуббе ева сан̇гхасса сантакатта̄, бхиккхуссева пана пайогавасена а̄паттийо хонти. да̄са̄дӣнампи пана аттха̄йа раккхам̣ йа̄читум̣ воха̄рикена пут̣т̣хена сан̇гхасса уппаннам̣ каппийаккамам̣ ваттум̣, а̄ра̄мика̄дӣхи ча ад̣д̣ам̣ ка̄ра̄петун̃ча ват̣т̣ати ева. виха̄раваттха̄дикаппийаад̣д̣ам̣ пана бхиккхуно сайампи ка̄тум̣ ват̣т̣ати.

бхиккхунӣнам̣ вуттоти раккхам̣ йа̄чантӣнам̣ бхиккхунӣнам̣ вутто уддиссаануддиссавасена раккха̄йа̄чанавиниччхайо, на саббо сиккха̄падавиниччхайо аса̄дха̄ран̣атта̄ сиккха̄падасса. тена̄ха ‘‘бхиккхунопӣ’’тиа̄ди. ана̄кад̣д̣хита̄йа ад̣д̣акаран̣ам̣, ад̣д̣апарийоса̄нанти две ан̇га̄ни.

пат̣хамасан̇гха̄дисесасиккха̄падаван̣н̣ана̄ нит̣т̣хита̄.