9. чампеййаккхандхако

кассапаготтабхиккхуваттхукатха̄диван̣н̣ана̄

380. чампеййаккхандхаке тантибаддхоти танти вуччати бйа̄па̄ро, таттха баддхо, уссуккам̣ а̄панноти аттхо. тена̄ха ‘‘тасмим̣ а̄ва̄се’’тиа̄ди.

387-8. ха̄панам̣ ва̄ ан̃н̃атха̄ каран̣ам̣ ва̄ наттхӣти н̃аттикаммасса н̃аттийа̄ екатта̄ ха̄панам̣ на самбхавати, тасса̄ екатта̄ ева паччха̄ н̃аттит̣хапанавасена, двиккхаттум̣ т̣хапанавасена ча ан̃н̃атха̄ каран̣ам̣ наттхи. паратоти парива̄ре. танти пабба̄джанӣйакаммам̣, тасса̄ти аттхо.

кассапаготтабхиккхуваттхукатха̄диван̣н̣ана̄ нит̣т̣хита̄.

двениссаран̣а̄дикатха̄ван̣н̣ана̄

395. еса̄ти ‘‘ба̄ло’’тиа̄дина̄ ниддит̣т̣хапуггало, аппаттоти самбандхо. таттха ка̄ран̣ама̄ха ‘‘йасма̄’’тиа̄ди. таттха а̄вен̣икена лаккхан̣ена̄ти пабба̄джанӣйакаммасса нимиттабха̄вена па̄л̣ийам̣ вуттатта̄ аса̄дха̄ран̣абхӯтена куладӯсакабха̄вена. йади хеса там̣ каммам̣ аппатто, катхам̣ пана сунисса̄ритоти а̄ха ‘‘йасма̄ панасса а̄кан̇кхама̄но сан̇гхо пабба̄джанӣйакаммам̣ кареййа̄ти вуттам̣, тасма̄ сунисса̄рито’’ти. таттха вуттанти каммаккхандхаке (чӯл̣ава. 27) вуттам̣.

еттха пана куладӯсакакаммам̣ катва̄ пабба̄джанӣйакаммакатасса терасакакан̣д̣акат̣т̣хакатха̄йам̣ ‘‘йасмим̣ виха̄ре васантена йасмим̣ га̄ме куладӯсакакаммам̣ катам̣ хоти, тасмим̣ виха̄ре ва̄ тасмим̣ га̄ме ва̄ на васитабба’’нтиа̄дина̄ (па̄ра̄. ат̣т̣ха. 2.433) йа̄ самма̄ваттана̄ вутта̄, са̄ итарена̄пи пӯретабба̄. йам̣ пана пат̣иппассаддхакаммасса куладӯсакасса таттхева ат̣т̣хакатха̄йам̣ ‘‘йесу кулесу куладӯсакакаммам̣ катам̣, тато паччайа̄ на гахетабба̄’’тиа̄ди вуттам̣, там̣ на пӯретаббам̣ куласан̇гахасса акататта̄. евам̣ сесакаммесупи. йади евам̣ ‘‘таджджанӣйакамма̄рахасса нийасакаммам̣ кароти…пе… евам̣ кхо, упа̄ли, адхаммакаммам̣ хотӣ’’тиа̄дивачанам̣ (маха̄ва. 402) вируджджхатӣти? на вируджджхати сан̇гхасаннит̣т̣ха̄навасена таджджанӣйа̄дикамма̄рахаттасса сиджджханато. йасса хи сан̇гхо ‘‘таджджанӣйакаммам̣ карома̄’’ти саннит̣т̣ха̄нам̣ катва̄ каммава̄чам̣ са̄венто пабба̄джанӣйакаммава̄чам̣ са̄вети, тасса каммам̣ адхаммакаммам̣ хоти. саче пана ‘‘тассева пабба̄джанӣйакаммамева карома̄’’ти саннит̣т̣ха̄нам̣ катва̄ тадева кароти, тасса там̣ каммам̣ дхаммакамманти ведитаббам̣.

евамидха ‘‘нисса̄ран̣а’’нти адхиппетасса пабба̄джанӣйакаммасса васена аттхам̣ дассетва̄ ида̄ни тадан̃н̃есам̣ таджджанӣйа̄дӣнам̣ васена нисса̄ран̣е адхиппете ‘‘аппатто нисса̄ран̣а’’нти имасса пат̣ипаккхавасена сампатто нисса̄ран̣ам̣, ‘‘тан̃че сан̇гхо нисса̄рети. сунисса̄рито’’ти аттхасамбхавам̣ дассетум̣ пуна ‘‘тан̃че сан̇гхо нисса̄ретӣти саче сан̇гхо’’тиа̄ди вуттам̣. таттха таттха̄ти таджджанӣйа̄дикаммависайе, екена̄пи ан̇гена нисса̄ран̣а̄ анун̃н̃а̄та̄ти йоджана̄. па̄л̣ийам̣ аппатто нисса̄ран̣анти еттха а̄панно а̄вен̣икавасена таджджанӣйа̄дисан̇кха̄там̣ нисса̄ран̣ам̣ паттоти аттхо гахетаббо.

двениссаран̣а̄дикатха̄ван̣н̣ана̄ нит̣т̣хита̄.

чампеййаккхандхакаван̣н̣ана̄найо нит̣т̣хито.