9. пан̣ӣтабходжанасиккха̄падаван̣н̣ана̄

259. наваме пан̣ӣтасам̣сат̣т̣ха̄ни бходжана̄ни пан̣ӣтабходжана̄нӣти па̄л̣ийам̣ пана бходжана̄ни пуббе вуттатта̄ па̄кат̣а̄нӣти адассита̄ни, та̄дисехи пан̣ӣтехи миссатта̄ пан̣ӣтабходжана̄ни на̄ма хонти. тесам̣ пабхедадассанаттхам̣ ‘‘сеййатхидам̣ саппи наванӣта’’нтиа̄ди вуттам̣. саппибхаттанти еттха кин̃ча̄пи саппина̄ сам̣сат̣т̣хам̣ бхаттам̣, саппи ча бхаттан̃ча̄типи аттхо вин̃н̃а̄йати, ат̣т̣хакатха̄йам̣ пана ‘‘са̄либхаттам̣ вийа саппибхаттам̣ на̄ма наттхӣ’’тиа̄дина̄ вуттатта̄ на сакка̄ ан̃н̃ам̣ ваттхум̣. ат̣т̣хакатха̄чарийа̄ ева хи ӣдисесу т̣ха̄несу пама̄н̣ам̣.

мӯланти каппийабхан̣д̣ам̣ вуттам̣. тасма̄ ана̄паттӣти еттха висан̇кетена па̄читтийа̄бха̄вепи сӯподанадуккат̣а̄ на муччатӣти ваданти. ‘‘каппийасаппина̄, акаппийасаппина̄’’ти ча идам̣ каппийа̄каппийамам̣сасатта̄нам̣ васена вуттам̣.

261. маха̄на̄масиккха̄падам̣ на̄ма упари ча̄тума̄сапаччайапава̄ран̣а̄сиккха̄падам̣ (па̄чи. 303 а̄дайо). агила̄но хи аппава̄ритат̣т̣ха̄не вин̃н̃а̄пентопи ка̄лапариччхедам̣, бхесаджджапариччхедам̣ ва̄ катва̄ сан̇гхавасена пава̄ритат̣т̣ха̄нато тадуттари вин̃н̃а̄пентена, париччхедаббхантарепи на бхесаджджакаран̣ӣйена рогена бхесаджджам̣ вин̃н̃а̄пентена ча само хотӣти ‘‘маха̄на̄масиккха̄падена ка̄ретаббо’’ти вуттам̣. пан̣ӣтабходжаната̄, агила̄ната̄, акатавин̃н̃аттийа̄ пат̣ила̄бхо, аджджхохаран̣анти има̄неттха чатта̄ри ан̇га̄ни.

пан̣ӣтабходжанасиккха̄падаван̣н̣ана̄ нит̣т̣хита̄.