7. сам̣видха̄насиккха̄падаван̣н̣ана̄

183. саттаме па̄л̣ийам̣ гаччха̄ма бхагини гаччха̄ма̄ййа̄ти бхиккхупуббакам̣ сам̣видха̄нам̣, итарам̣ бхиккхунипуббакам̣. екаддха̄намагганти екато аддха̄насан̇кха̄там̣ маггам̣. хиййоти суве. парети татийе дивасе.

двидха̄ вуттаппака̄роти па̄дагамане паккхагаманети двидха̄ вуттаппака̄ро. упача̄ро на лаббхатӣти йо париккхитта̄дига̄масса екалед̣д̣упа̄та̄диупача̄ро вутто, со идха на лаббхати а̄саннатта̄. етена ча антарагхарейеветтха га̄моти адхиппето, на сакалам̣ га̄макхеттам̣. таттха̄пи йаттха упача̄ро лаббхати, таттха упача̄роккамане ева а̄паттӣти дассети. тена̄ха ‘‘ратанаматтантаро’’тиа̄ди. упача̄роккаманан̃четтха упача̄раббхантаре пависанамева хоти. таттха аппависитва̄пи упача̄рато бахи аддхайоджанаббхантарагатена маггена гаччхантопи маггасса двӣсу пассесу аддхайоджанаббхантарагатам̣ га̄мӯпача̄рам̣ саббам̣ оккамитва̄ гаччхатиччева вуччати. аддхайоджанато бахи гатена маггена гаччханто на га̄мӯпача̄раган̣ана̄йа ка̄ретаббо, аддхайоджанаган̣ана̄йева ка̄ретаббо. еван̃ча сати анантарасиккха̄паде на̄ва̄йева га̄матӣрапассена гаччхантасса га̄мӯпача̄раган̣ана̄йа а̄патти саматтхита̄ хоти. на хи сакка̄ на̄ва̄йа га̄мӯпача̄раббхантаре пависитум̣. тин̣н̣ам̣ магга̄нам̣ самбандхат̣т̣ха̄нам̣ син̇гха̄т̣акам̣. еттхантаре сам̣видахитети еттха на кевалам̣ йатха̄вуттаратхика̄дӣсу ева сам̣видахане дуккат̣ам̣, антара̄маггепӣти адхиппа̄йо.

аддхайоджанам̣ атиккамантасса̄ти асати га̄ме аддхайоджанам̣ атиккамантасса. йасмин̃хи га̄макхеттабхӯтепи аран̃н̃е аддхайоджанаббхантаре га̄мо на хоти, тампи идха ага̄макам̣ аран̃н̃анти адхиппетам̣, на вин̃джха̄т̣ава̄дайо.

185. рат̣т̣хабхедети рат̣т̣хавилопе. чаккасама̄рул̣ха̄ти ирийа̄патхачаккам̣, сакат̣ачаккам̣ ва̄ сама̄рул̣ха̄. двиннампи сам̣видахитва̄ маггаппат̣ипатти, ависан̇кетам̣, самайа̄бха̄во, ана̄пада̄, га̄мантароккаманам̣ ва̄ аддхайоджана̄тиккамо ва̄ти има̄неттха пан̃ча ан̇га̄ни. екатоупасампанна̄дӣхи саддхим̣ сам̣видха̄йа гаччхантасса пана ма̄туга̄масиккха̄падена а̄патти.

сам̣видха̄насиккха̄падаван̣н̣ана̄ нит̣т̣хита̄.