6. дутийасахасеййасиккха̄падаван̣н̣ана̄

55. чхат̣т̣хе ма̄туга̄мена саддхим̣ чатуттхадивасе сайантасса̄пи имина̄ сиккха̄падена ека̄ва а̄патти. кечи пана пуримасиккха̄падена̄пӣти две а̄паттийо ваданти, там̣ на йуттам̣ ‘‘анупасампаннена̄’’ти аниттхилин̇гена вуттатта̄ напум̣сакена пана чатуттхадивасе сайантасса садуккат̣апа̄читтийам̣ ваттум̣ йуттам̣. кин̃ча̄петтха па̄л̣ийам̣ пан̣д̣акавасенева дуккат̣ам̣ вуттам̣, тадануломика̄ пана пурисаубхатобйан̃джанакена саха сайантасса имина̄ дуккат̣ам̣, пуримена чатуттхадивасе садуккат̣апа̄читтийам̣. иттхиубхатобйан̃джанако иттхигатикова̄ти айам̣ амха̄кам̣ кханти. матиттхийа̄ ана̄паттӣти ваданти. па̄читтийаваттхукасена̄санам̣, таттха ма̄туга̄мена саддхим̣ нипаджджанам̣, сӯрийаттхан̇гамананти има̄неттха тӣн̣и ан̇га̄ни.

дутийасахасеййасиккха̄падаван̣н̣ана̄ нит̣т̣хита̄.