1. паттасиккха̄падаван̣н̣ана̄

602. татийаваггасса пат̣хаме ад̣д̣хатерасапала̄ти ма̄гадхика̄йа ма̄натула̄йа ад̣д̣хатерасапалапаримитам̣ удакам̣ ган̣хантам̣ сандха̄йа вуттам̣, татха̄ паримитам̣ йавама̄са̄дим̣ ган̣хантим̣ сандха̄йа̄ти кечи. а̄чарийадхаммапа̄латтхерена пана ‘‘пакатичатумут̣т̣хикам̣ куд̣увам̣, чатукуд̣увам̣ на̄л̣и, та̄йа на̄л̣ийа̄ сол̣аса на̄л̣ийо дон̣ам̣, там̣ пана магадхана̄л̣ийа̄ два̄даса на̄л̣ийо хонтӣти вадантӣ’’ти вуттам̣. дамил̣ана̄л̣ӣти пура̄н̣ана̄л̣им̣ сандха̄йа вуттам̣. са̄ ча чатумут̣т̣хикехи куд̣увехи ат̣т̣ха куд̣ува̄, та̄йа на̄л̣ийа̄ две на̄л̣ийо магадхана̄л̣им̣ ган̣ха̄ти. пура̄н̣а̄ пана ‘‘сӣхал̣ана̄л̣и тиссо на̄л̣ийо ган̣ха̄тӣ’’ти ваданти, тесам̣ матена магадхана̄л̣и ида̄ни паваттама̄на̄йа чатукуд̣ува̄йа дамил̣ана̄л̣ийа̄ чатуна̄л̣ика̄ хоти, тато магадхана̄л̣ито упад̣д̣хан̃ча пура̄н̣адамил̣ана̄л̣исан̇кха̄там̣ паттхам̣ на̄ма хоти, етена ча ‘‘омако на̄ма патто паттходанам̣ ган̣ха̄тӣ’’ти па̄л̣ивачанан̃ча самети, локийехипи –

‘‘локийам̣ магадхан̃чети, паттхадвайамуда̄хат̣ам̣;

локийам̣ сол̣асапалам̣, ма̄гадхам̣ дигун̣ам̣ мата’’нти. –

евам̣ локе на̄л̣ийа̄ магадхана̄л̣и дигун̣а̄ти дассита̄, еван̃ча гайхама̄не омакапаттасса ча йа̄панаматтоданага̄хика̄ ча сиддха̄ хоти. на хи сакка̄ ат̣т̣хакуд̣увато ӯноданага̄хина̄ паттена атхӯпӣкатам̣ пин̣д̣апа̄там̣ парийеситва̄ йа̄петум̣. тенева веран̃джакан̣д̣ат̣т̣хакатха̄йам̣ ‘‘паттхо на̄ма на̄л̣иматтам̣ хоти екасса пурисасса алам̣ йа̄пана̄йа. вуттампи хетам̣ ‘паттходано на̄ламайам̣ дувинна’’’нти (джа̄. 2.21.192) вуттам̣, ‘‘екекасса двиннам̣ тин̣н̣ам̣ пахотӣ’’ти ча а̄гахам̣, тасма̄ идха вуттанайа̄нуса̄ренева гахетаббам̣.

а̄лопасса анурӯпанти еттха ‘‘бйан̃джанасса матта̄ на̄ма оданато чатуттхабха̄го’’ти (ма. ни. ат̣т̣ха. 2.387) брахма̄йусуттат̣т̣хакатха̄йам̣ вуттатта̄ а̄лопасса чатуттхабха̄гамева бйан̃джанам̣ анурӯпанти дат̣т̣хаббам̣. оданагатика̄нева̄ти оданасса анто ева пависанасӣла̄ни сийум̣, аттано ока̄сам̣ на гавесантӣти аттхо. на̄маматтети ‘‘маджджхимо патто маджджхимомако’’тиа̄дина̄маматте.

607-8. евам̣ пайоге пайогети парийоса̄на̄лопаджджхохаран̣апайоге пайоге, а̄лопе а̄лопети аттхо. катва̄ти па̄капарийоса̄нам̣ катва̄. пачитва̄ т̣хапесса̄мӣти ка̄л̣аван̣н̣апа̄кам̣ сандха̄йа вуттам̣. чхидданти мукхават̣т̣ито дван̇гуласса хет̣т̣ха̄чхиддам̣ вуттам̣. сесам̣ пат̣хамакатхине вуттанайамева.

паттасиккха̄падаван̣н̣ана̄ нит̣т̣хита̄.