5. читта̄га̄раваггаван̣н̣ана̄

1. пат̣хамасиккха̄падаван̣н̣ана̄

978. кӣл̣анаупаванам̣ на̄ма кан̃чинагарасса нагарупаванам̣ вийа дат̣т̣хаббам̣. уййа̄нам̣ на̄ма таттхева нандаванауййа̄нам̣ вийа дат̣т̣хаббам̣. ‘‘таттхева т̣хатва̄ там̣ там̣ диса̄бха̄гам̣ вилокетва̄ пассантийа̄ пана па̄т̣екка̄ а̄паттийо’’ти па̄т̣хо. евам̣ вутте йам̣ пуббе вуттам̣ падам̣ ‘‘ануддхарама̄на̄’’ти, там̣ екасмим̣йева диса̄бха̄гети сиддханти еке. упача̄ро две лед̣д̣упа̄тоти ча.

пат̣хамасиккха̄падаван̣н̣ана̄ нит̣т̣хита̄.

2. дутийасиккха̄падаван̣н̣ана̄

984. ‘‘а̄харимехи ва̄л̣ехӣ’’ти ‘‘асам̣ха̄римена̄’’ти ча дувидхо па̄т̣хо. ‘‘висум̣ катва̄ паччха̄ саддхим̣ техи ва̄л̣ехӣ’’ти ликхитам̣. йатха̄ татха̄ ва̄л̣арӯпе ут̣т̣хапетва̄ катапа̄дам̣ ‘‘паллан̇ка’’нти вуччати ана̄паттива̄ре ‘‘асам̣ха̄римехи ва̄л̣ехи катам̣ парибхун̃джатӣ’’ти вачана̄бха̄вато.

дутийасиккха̄падаван̣н̣ана̄ нит̣т̣хита̄.

3. татийасиккха̄падаван̣н̣ана̄

988. ‘‘уджджавуджджавети хаттхаппаса̄ран̣е’’ти ликхитам̣, там̣ на йуттам̣ ‘‘йаттакам̣ хаттхена ан̃чхитам̣ хоти, тасмим̣ таккамхи вет̣хите ека̄паттӣ’’ти вачанато.

татийасиккха̄падаван̣н̣ана̄ нит̣т̣хита̄.

4. чатуттхасиккха̄падаван̣н̣ана̄

993. ‘‘йа̄гупа̄нети йа̄гуда̄не’’ти ликхитам̣. пора̄н̣аган̣т̣хипаде ‘‘ма̄та̄питӯнам̣ да̄тум̣ ват̣т̣атӣ’’ти вуттам̣.

чатуттхасиккха̄падаван̣н̣ана̄ нит̣т̣хита̄.

994. пан̃чамасиккха̄падам̣ утта̄наттхамева.

6. чхат̣т̣хасиккха̄падаван̣н̣ана̄

1001. чхат̣т̣хе бхиккхувибхан̇ге ачелакасиккха̄падена екапариччхедам̣. идха ага̄рико висесо, тасма̄ ‘‘аса̄дха̄ран̣а’’нти ваданти.

чхат̣т̣хасиккха̄падаван̣н̣ана̄ нит̣т̣хита̄.

1003-8. саттамат̣т̣хамесу ваттаббам̣ наттхи.

9. навамасиккха̄падаван̣н̣ана̄

1015. ‘‘кхӣланамантам̣ да̄руса̄ракхӣлам̣ мантетва̄ патхавийам̣ павесетва̄ ма̄ран̣амантам̣. на̄гаман̣д̣алам̣на̄ма на̄гародхамантам̣, пит̣т̣ха̄дӣхи ва̄ париккхепам̣ катва̄ таттха мануссе павесенти гуттаттха̄йа̄’’ти ликхитам̣.

навамасиккха̄падаван̣н̣ана̄ нит̣т̣хита̄.

1017. дасамасиккха̄падам̣ утта̄наттхамева.

читта̄га̄раваггаван̣н̣ана̄ нит̣т̣хита̄.