7. саттамасиккха̄падаван̣н̣ана̄

820-822. ‘‘нагарам̣ атихарантӣ’’ти па̄т̣хо. ‘‘нагарадва̄ре атихарантӣ’’ти каттхачи, таттха два̄рена̄ти аттхо. айамева ва̄ па̄т̣хо. там̣ пубба̄паравируддханти ‘‘пунапи вутта’’нти вуттам̣ ва̄дам̣ сандха̄йа, на тато пуббе таттха вуттам̣ ва̄дам̣. еттха ‘‘ма̄тарампи вин̃н̃а̄петва̄ти вачанена вируджджхатӣ’’ти ликхитам̣, там̣ дулликхитам̣, на хи тена виродхам̣ сандха̄йа идам̣ вуттанти. каран̣е че па̄читтийам̣, ка̄ра̄панепи па̄читтийенева бхавитаббам̣. атха ка̄ра̄пане дуккат̣ам̣, каран̣епи дуккат̣енева бхавитаббам̣. на хи каран̣е ва̄ ка̄ра̄пане ва̄ висесо аттхи а̄паджджане сатӣти адхиппа̄йо.

823. сампат̣иччхитум̣ ват̣т̣атӣти аппат̣иккхипитва̄ ‘‘са̄дхӯ’’ти ваттум̣ ват̣т̣атӣти адхиппа̄йо. на хи пат̣иггахетум̣ ват̣т̣ати. ана̄ма̄сатта̄ ‘‘а̄макадхан̃н̃ам̣ пана н̃а̄такапава̄ритат̣т̣ха̄непи на ват̣т̣атӣ’’ти вуттам̣. ануган̣т̣хипаде пана ‘‘каппийена ладдхам̣ дхан̃н̃ам̣ бхаджджитва̄ бхун̃джантийа̄ дуккат̣ам̣. апаран̣н̣епи есева найо’’ти ча ‘‘ана̄патти а̄ба̄дхапаччайа̄ти вачанато сатта дхан̃н̃а̄нипи ана̄ма̄са̄нӣти сиддхам̣, тенева хет̣т̣ха̄ ат̣т̣хакатха̄йам̣ дуккат̣аваттхумхи сатта дхан̃н̃а̄нипи гахита̄ни ана̄ма̄са̄нӣ’’ти ча вутта̄ни. а̄ма̄са̄ни каппийаваттхӯни ча йади бхавеййум̣, йатха̄ н̃а̄такапава̄рите сандха̄йа ‘‘апаран̣н̣ам̣ вин̃н̃а̄петӣ’’ти ависесена вуттам̣, евам̣ ‘‘ана̄патти н̃а̄така̄нам̣ пава̄рита̄нам̣ ан̃н̃асса аттха̄йа вин̃н̃а̄пети, умматтика̄йа а̄дикаммика̄йа̄’’ти ваттаббам̣. йасма̄ дуккат̣аваттхутта̄ ча ана̄ма̄сатта̄ ча ма̄тарампи саттавидхам̣ дхан̃н̃ам̣ вин̃н̃а̄петум̣ на ват̣т̣ати, тасма̄ тадаттхадӣпанаттхам̣ саттавидхам̣ дхан̃н̃ам̣ сандха̄йа ‘‘ана̄патти а̄ба̄дхапаччайа̄’’ти вуттам̣, йатха̄ бхиккхунийа̄ а̄ба̄дхапаччайа̄ ват̣т̣ати, татха̄ бхиккхусса̄пӣти ча. йатха̄ ва̄ пана бхиккхунийа̄ бхаджджана̄дӣни ка̄ра̄петум̣ на ват̣т̣ати, евам̣ бхиккхусса̄пи. вуттампи четам̣ андхакат̣т̣хакатха̄йам̣ ‘‘ан̃н̃атаро ба̄лабхиккху каппийам̣ аджа̄нанто етадавоча ‘а̄макадхан̃н̃ам̣ сампат̣иччхитум̣ бхиккхӯнам̣ на ват̣т̣ати. етам̣ дхан̃н̃ам̣ бхаджджитва̄ кот̣т̣етва̄ пачитва̄ йа̄гукхаджджакам̣ бхаттан̃ча детха̄’ти, а̄н̣а̄пакассева бхиккхусса а̄патти, саббесам̣ ана̄паттӣ’’ти. тасма̄ ‘‘сан̇гхава̄рика̄нам̣ дхан̃н̃ам̣ кот̣т̣етха̄’’ти а̄ра̄мика̄нам̣ ваттун̃ча на ват̣т̣ати. ‘‘дивасам̣ париббайам̣ ган̣хатха, тан̣д̣уле сампа̄детха, твам̣ еттаке ган̣ха, твам̣ еттаке’’ти евама̄дӣни пана ваттум̣ ват̣т̣атӣти ча. йам̣ пана ‘‘авин̃н̃аттийа̄ лаббхама̄нам̣ пана навакамматтха̄йа сампат̣иччхитум̣ ват̣т̣атӣ’’ти вуттам̣, тампи хет̣т̣ха̄ ‘‘имам̣ тал̣а̄кам̣ кхеттам̣ ваттхум̣ виха̄расса дема̄’ти вутте ‘сампат̣иччхитум̣ ват̣т̣атӣ’’ти вуттам̣ найам̣ сандха̄йа вуттатта̄ сувуттамева. ‘‘навакамматтха̄йа дхан̃н̃ам̣ дема̄’’ти вутте ‘‘са̄дхӯ’’ти ваттаббам̣. йам̣ пана хет̣т̣ха̄ ‘‘таттха ниссаггийаваттхум̣ аттано ва̄ сан̇гхаган̣апуггалачетийа̄нам̣ ва̄ аттха̄йа сампат̣иччхитум̣ на ват̣т̣ати…пе… дуккат̣аваттхум̣ саббесампи аттха̄йа сампат̣иччхато дуккат̣амева̄’’ти вуттам̣, тампи сувуттамева. касма̄? ‘‘четийасса аттха̄йа дхан̃н̃ам̣ да̄тука̄момхи, тумхе бханте тадаттха̄йа сампат̣иччхатха̄’’ти вутте пат̣иггахетум̣ акаппийатта̄. ‘‘идам̣ пана та̄дисам̣ на хотӣ’’ти ча вуттам̣. саббопа̄йам̣ упатиссаттхерава̄до кира. дхаммасириттхеро паневама̄ха ‘‘пуббепи навакамматтха̄йа пат̣иггахо на ва̄рито, сан̇гхассаттха̄йа пат̣иггахитампи пат̣игга̄хакассева акаппийа’’нти.

саттамасиккха̄падаван̣н̣ана̄ нит̣т̣хита̄.