2. дутийапа̄ра̄джикасиккха̄падаван̣н̣ана̄

‘‘кисса пана твам̣ аййе джа̄нам̣ па̄ра̄джикам̣ дхаммам̣ аджджха̄панна’’нти вачанато, ‘‘ат̣т̣ханнам̣ па̄ра̄джика̄нам̣ ан̃н̃атарам̣ па̄ра̄джикам̣ аджджха̄панна’’нти (па̄чи. 666) вачанато, анте ‘‘уддит̣т̣ха̄ кхо аййа̄йо ат̣т̣ха па̄ра̄джика̄ дхамма̄’’тиа̄дивачанато (па̄чи. 677), парива̄ре ‘‘са̄дха̄ран̣апан̃н̃атти убхатопан̃н̃аттӣ’’ти (пари. 201) вачанато ча бхиккхунивибхан̇гам̣ патва̄ бхагава̄ са̄дха̄ран̣а̄ни сиккха̄пада̄ни бхиккхӯнам̣ уппаннаваттхусмим̣йева ‘‘йа̄ пана бхиккхунӣ чхандасо метхунам̣ дхаммам̣ пат̣исевеййа антамасо тираччха̄нагатенапи па̄ра̄джика̄ хоти асам̣ва̄са̄’’тиа̄дина̄ найена сависесампи ависесампи ма̄тикам̣ никкхипитва̄ ануккамена падабха̄джанам̣, а̄паттибхедам̣, тикаччхедам̣, ана̄паттива̄ран̃ча анавасесам̣ ватва̄ виттха̄реси. сан̇гӣтика̄ракехи пана аса̄дха̄ран̣апан̃н̃аттийойева идха виттха̄рита̄ти ведитабба̄.

666. таттха ‘‘ат̣т̣ханнам̣ па̄ра̄джика̄на’’нти идам̣ кевалам̣ сан̇гӣтика̄рака̄нам̣йева найато никкхиттавачанам̣ ито пуббе чхат̣т̣хасаттамат̣т̣хама̄нам̣ па̄ра̄джика̄нам̣ апан̃н̃аттатта̄. бхагавата̄ пана идам̣ пан̃н̃а̄питама̄дисиккха̄падампи упа̄да̄йа ‘‘чханнам̣ па̄ра̄джика̄на’’нти вуттам̣ сийа̄. ито уддхам̣ пан̃н̃атта̄нипи упа̄да̄йа ‘‘ат̣т̣ханнам̣ па̄ра̄джика̄на’’нти вачанам̣ апарабха̄ге уппаннанти екачче а̄чарийа̄. ат̣т̣хакатха̄йам̣ пана ‘‘идан̃ча па̄ра̄джикам̣ паччха̄ пан̃н̃аттам̣, тасма̄ ‘ат̣т̣ханна’нти вибхан̇ге вутта’’нтиа̄ди вуттам̣, тасма̄ ат̣т̣хакатха̄чарийа̄нам̣ матена сиддхаметам̣ йатха̄пан̃н̃атта̄нуккамавасенева сан̇гӣта̄нӣти. ‘‘ан̃н̃а̄си’’нти па̄т̣хо. ан̃н̃а̄сӣти на гахетаббо. ‘‘дут̣т̣хулласиккха̄паде вуттанайенева̄’’ти вачанато ваджджапат̣иччха̄дикам̣ йа̄ пат̣иччха̄дети, са̄пи ваджджапат̣иччха̄дикаа̄йева̄ти сиддхам̣. кин̃ча̄пи ваджджапат̣иччха̄данам̣ пемавасена хоти, татха̄пи сиккха̄падавӣтиккамачиттам̣ доманассикамева хотӣти катва̄ ‘‘дуккхаведана’’нти вуттам̣.

дутийапа̄ра̄джикасиккха̄падаван̣н̣ана̄ нит̣т̣хита̄.