2. дутийаниссаггийапа̄читтийасиккха̄падаван̣н̣ана̄

740. ваттхусампаттатта̄ ва̄ на тасса̄ ана̄паннака̄мата̄йа ва̄ ана̄н̣аттиката̄йа ва̄ ака̄лачӣварамадам̣су. йатха̄да̄не ева упанетаббам̣, на бха̄джетаббам̣ пуггаликатта̄ти адхиппа̄йо. аттхато хи итарампи йатха̄да̄не ева упанетаббамева. ган̣т̣хипаде пана ‘‘аййа̄йа даммӣти евам̣ пат̣иладдханти ниссат̣т̣хапат̣иладдхам̣. йатха̄да̄нети да̄йакехи париччаттавидха̄нена. упанетаббанти ака̄лачӣварабха̄вена бха̄джетаббанти адхиппа̄йо. идха бха̄джа̄пита̄йа ладдхачӣварамева ниссаггийам̣ хоти, там̣ винайакаммам̣ катва̄пи аттана̄ на лабхатӣ’’ти ликхитам̣. йади ниссат̣т̣хапат̣иладдхам̣ сандха̄йа идам̣ вуттам̣ сийа̄, ‘‘ниссаджджитаббам̣ сан̇гхасса ва̄ ган̣асса ва̄ пуггаласса ва̄ дадеййа, дадеййум̣, аййа̄йа даммӣ’’ти вуттатта̄ тӣн̣ипета̄ни пада̄ни ваттабба̄ни сийум̣, тасма̄ на кевалам̣ ниссат̣т̣хапат̣иладдхамева йатха̄да̄не упанетаббам̣, ан̃н̃а̄хи бхиккхунӣхи ладдхакот̣т̣ха̄сампи йатха̄да̄нейева упанетаббам̣.

741. ‘‘ака̄лачӣваре ка̄лачӣварасан̃н̃а̄йа ана̄паттӣ’’ти пана бха̄джанапаччайа̄ а̄паджджитабба̄паттим̣ на̄паджджатӣти еттакамева дӣпети, на пат̣иладдхам̣, на йатха̄да̄не да̄таббанти имаматтхам̣ дӣпети. лесена пана ган̣ха̄ти че, бхан̣д̣аггхена ка̄ретабба̄.

дутийаниссаггийапа̄читтийасиккха̄падаван̣н̣ана̄ нит̣т̣хита̄.