адхикаран̣абхедаван̣н̣ана̄

уккот̣анабхеда̄диван̣н̣ана̄

340. адхикаран̣ауккот̣ена саматха̄нам̣ уккот̣ам̣ дассетунти адхикаран̣а̄ни саттахи саматхехи самманти, та̄ни уккот̣енто сатта саматхе уккот̣ети на̄ма̄ти адхиппа̄йо. пасаватӣти самбхавати. ‘‘анува̄да̄дхикаран̣е лаббхантӣ’тиа̄дӣни ‘дхаммо адхаммо’тиа̄дӣнам̣ сама̄натта̄ тесу висесато лаббхантӣ’’ти вуттам̣. анихатанти сутта̄дина̄. авиниччхитанти ‘‘а̄паттиана̄паттӣ’’тиа̄дина̄. ‘‘таттха джа̄такам̣ адхикаран̣ам̣ уккот̣ети…пе… тин̣аваттха̄ракам̣ уккот̣етӣ’’ти дасева вутта̄. ‘‘саммукха̄винайапат̣ин̃н̃а̄такаран̣айебхуййасика̄ авуттатта̄ уккот̣етум̣ на сакка̄, каммава̄ча̄пи тесам̣ наттхи. тасма̄ те уккот̣етум̣ на сакка̄ти вадантӣ’’ти ликхитам̣. па̄л̣имуттакавиниччхайенева̄ти винайалаккхан̣ам̣ вина̄ кевалам̣ дхаммадесана̄маттавасенева̄ти аттхо. кхандхакато ва̄ парива̄рато ва̄ а̄нӣтасуттена. ниджджха̄пенти дассенти. пуббе дхаммавинайена виниччхитам̣ адхикаран̣ам̣ упаджджха̄йа̄дӣнам̣ аттха̄йа ‘‘адхаммам̣ дхаммо’’тиа̄дӣни дӣпетва̄ти аттхо. висама̄ни ка̄йакамма̄дӣни нисситатта̄ висаманиссито. евам̣ сесесу.

адхикаран̣анида̄на̄диван̣н̣ана̄

342-3. ким̣самбха̄ранти ким̣париккха̄рам̣, еттха кинти лин̇гаса̄ман̃н̃амабйайам̣. пуббе уппаннавива̄дам̣ нисса̄йа паччха̄ уппаджджанакавива̄до вива̄данида̄нам̣ на̄ма. а̄патта̄дхикаран̣апаччайа̄ чатассо а̄паттийо а̄паджджатӣти бхиккхунӣ джа̄нам̣ па̄ра̄джикам̣ дхаммам̣ пат̣иччха̄дети па̄ра̄джикам̣, вематика̄ пат̣иччха̄дети тхуллаччайам̣, бхиккху сан̇гха̄дисесам̣ пат̣иччха̄дети па̄читтийам̣, а̄ча̄равипаттим̣ пат̣иччха̄дети дуккат̣ам̣. пуббе катауккхепанийа̄дикиччам̣ нисса̄йа уппаджджанакакичча̄нам̣. кӣдиса̄нам̣? саманубха̄сана̄дӣнам̣ васена. там̣ хӣти адхикаран̣ам̣.

344. адхикаран̣есу йена адхикаран̣ена самманти, там̣ дассетунти йада̄ адхикаран̣ехи самманти, тада̄ кичча̄дхикаран̣енева самманти, на ан̃н̃ехӣти дассанаттхам̣ вуттам̣, на екантато адхикаран̣енева саммантӣти дассанаттхам̣.

348. а̄патта̄дхикаран̣е сан̇гхо вивадатӣти а̄патта̄на̄паттӣти евам̣.

353. самут̣т̣ха̄на̄бха̄вато саммукха̄винайе каммасса кирийа̄каран̣амичча̄дина̄ авибхаджитва̄ва сативинайа̄дӣнам̣ чханнам̣йева чха самут̣т̣ха̄на̄ни вибхатта̄ни. там̣ касма̄? каммасан̇гаха̄бха̄вена, сативинайа̄дӣнам̣ вийа сан̇гхасаммукхата̄дӣнам̣ киччайата̄ на̄ма наттхӣти адхиппа̄йо.

адхикаран̣абхедаван̣н̣ана̄ нит̣т̣хита̄.