катхинабхедаван̣н̣ана̄

катхинааттхата̄диван̣н̣ана̄

403-4. кинти катхам̣. ана̄дийада̄нам̣ та̄вака̄ликаваттху. ‘‘ана̄гатавасена анантара̄ хутва̄’’ти удака̄харан̣а̄дипайогасса дхована̄дипуббакаран̣асса паччха̄ уппаджджанато, дхована̄дикирийан̃ча сандха̄йа пайогакаран̣ато вуттам̣. пуреджа̄тапаччайе панеса пайоготи аттхо. екам̣ дхаммампи на лабхати аттано пуреджа̄тасса наттхита̄йа.

катхина̄диджа̄нитаббавибха̄гаван̣н̣ана̄

412. рӯпа̄дидхаммесӯти ван̣н̣агандха̄диат̣т̣хакесу. ‘‘васса̄насса паччхимо ма̄со’’ти (па̄ра̄. 218) вуттатта̄ паччхиме ма̄се йасмим̣ ва̄ тасмим̣ ва̄ дивасе аттхаритум̣ ват̣т̣атӣти сиддхам̣.

415. ‘‘а̄диччабандхуна̄ти вуттатта̄ тхеравачана’’нти ваданти.

палибодхапан̃ха̄бйа̄каран̣акатха̄ван̣н̣ана̄

415-6. саннит̣т̣ха̄нантико катхам̣ бахисӣма̄йа уддхарӣйати? бхиккху акатачӣварам̣ сама̄да̄йа паккамати ‘‘на паччесса’’нти, тасса бахисӣма̄гатасса евам̣ хоти ‘‘невимам̣ чӣварам̣ ка̄ресса’’нти, еваметасса бахисӣма̄гатасса уддхарӣйати. катхам̣ антосӣма̄йа? акатачӣварам̣ сама̄да̄йа паккамати ‘‘на паччесса’’нти, тато таттха пха̄сувиха̄рам̣ алабханто тамева виха̄рам̣ а̄гаччхати, тасса чӣварапалибодхойева т̣хито, со ча ‘‘невимам̣ чӣварам̣ ка̄ресса’’нти читте уппанне чхиджджати, тасма̄ ‘‘антосӣма̄йа уддхарӣйатӣ’’ти вуттам̣. саннит̣т̣ха̄нантикам̣ дувидхам̣ ‘‘на паччесса’’нти а̄ва̄сапалибодхам̣ чхиндитва̄ тато пунапи тамева виха̄рам̣ а̄гантва̄ ‘‘невимам̣ чӣварам̣ ка̄ресса’’нти саннит̣т̣ха̄нам̣ кароти, бахисӣма̄йа т̣хатва̄ ‘‘невимам̣ чӣварам̣ ка̄рессам̣ на паччесса’’нти читтуппа̄дена саннит̣т̣ха̄нантикам̣ хоти. га̄тха̄йампи ‘‘две палибодха̄ апуббам̣ ачарима’’нти идам̣ имамева сандха̄йа. ‘‘а̄са̄ваччхедико катхам̣ антосӣма̄йа? а̄сӣситена ‘тумхе виха̄рамева паттхетха, ахам̣ пахин̣исса̄мӣ’ти вутто пуббе ‘на паччесса’нти а̄ва̄сапалибодхам̣ чхиндитва̄ гато пуна там̣ виха̄рам̣ гантва̄ тена ‘на̄хам̣ саккоми да̄ту’нти пахито хотӣ’’ти ликхитам̣. ‘‘аттха̄ре хи сати уддха̄ро на̄ма̄’’ти аттха̄рам̣ вина̄ уддха̄рам̣ на лабханти, тасма̄ вуттам̣. пурима̄ двети ‘‘две катхинуддха̄ра̄ екуппа̄да̄ еканиродха̄’’ти вутта̄дхика̄ре пат̣хамам̣ вутта̄ антараббха̄расахуббха̄ра̄. на паккаманантика̄дайо две. екато нируджджхантӣти уддха̄рабха̄вам̣ па̄пун̣антӣти аттхо.

катхинабхедаван̣н̣ана̄ нит̣т̣хита̄.

пан̃н̃аттиваггаван̣н̣ана̄ нит̣т̣хита̄.