10. бхиккхунупассайасуттаван̣н̣ана̄
376. каммат̣т̣ха̄накаммика̄ти каммат̣т̣ха̄намануйутта̄. висесетӣти висесо, атисайо, сва̄йам̣ пубба̄парависесо упа̄да̄йупа̄да̄йа гахетабботи там̣ дассетум̣ ‘‘таттха̄’’тиа̄дима̄ха.
уппаджджати килесапарил̣а̄хоти ка̄йе асубха̄дивасена манасика̄рам̣ адахантасса манасика̄расса вӣтхийам̣ апат̣ипанната̄ субха̄дивасена ка̄йа̄рамман̣о килесапарил̣а̄хо ча уппаджджати. вӣрийа̄рамбхасса абха̄вена тасмим̣ а̄рамман̣е четасо ва̄ лӣнаттам̣ хоти, гочараджджхаттато бахиддха̄ путхутта̄рамман̣е читтам̣ виккхипати. евам̣ килесапарил̣а̄хе ча̄тиа̄дина̄ тивидхампи бха̄вана̄нуйогасса килесаваттхубха̄вам̣ упа̄да̄йа самуччайавасена ат̣т̣хакатха̄йам̣ вуттам̣. йасма̄ пана те парил̣а̄халӣнаттавиккхепа̄ екаджджхам̣ на паваттанти, тасма̄ па̄л̣ийам̣ ‘‘ка̄йа̄рамман̣о ва̄’’тиа̄дина̄ анийаматтхо ва̄-саддо гахито. килеса̄нуран̃джитена̄ти килесавиван̣н̣итачиттена хутва̄ на ваттитаббам̣. катхам̣ пана ваттитаббанти а̄ха ‘‘кисмин̃чидева̄’’ти. на ча витаккети на ча вича̄ретӣти килесасахагате витаккавича̄ре на паваттети. сукхитоти джха̄насукхена сукхито.
имасса бхиккхуно бха̄вана̄ паватта̄ти самбандхо. йасма̄ хи имасса бхиккхуно там̣ мӯлакаммат̣т̣ха̄нам̣ парипантхе сати т̣хапетва̄ буддхагун̣а̄диануссаран̣ена читтам̣ паса̄детва̄ мӯлакаммат̣т̣ха̄набха̄вана̄ паватта̄, тасма̄ пан̣идха̄йа бха̄вана̄ти вуттанти самбандхо. ат̣т̣хапетва̄ти читтам̣ аппаваттетва̄ти аттхо ведитаббо. каммат̣т̣ха̄на̄дӣнам̣ тин̣н̣ампи васена аттхайоджана̄ самбхавати. тена̄ха ‘‘таттха̄’’тиа̄ди. са̄ренто вийа̄ти ратхам̣ ва̄хайанто вийа. самаппама̄н̣ато ат̣т̣хака̄дивасена сутаччхитам̣ паккхипанто вийа. сукхенева килеса̄нам̣ ока̄сам̣ аденто антара̄ асаджджанто алагганто. випассана̄ча̄расса а̄раддхавуттитам̣ апарипантхатан̃ча дассенто опаммадвайама̄ха. бйа̄бхан̇гийа̄ти ка̄джадан̣д̣ена. килесапарил̣а̄ха̄дӣнанти килесапарил̣а̄халӣнаттавиккхепа̄нам̣.
гул̣акхан̣д̣а̄дӣнӣти гул̣акхан̣д̣асаккхаракхан̣д̣а̄дӣни уччхувика̄рабхӯта̄ни. ‘‘ка̄йе ка̄йа̄нупассӣ вихара̄мӣ’’тиа̄дивачанато ‘‘пуббабха̄гавипассана̄ катхита̄’’ти вуттам̣.
амбапа̄ливаггаван̣н̣ана̄ нит̣т̣хита̄.