5. папа̄тавагго

1. локачинта̄суттаван̣н̣ана̄

1111. локачинтанти локасаннивесапат̣исам̣йуттавӣмам̣са̄ва. ‘‘локачитта’’нтипи па̄т̣хо, там̣там̣локапарийа̄паннам̣ читтанти аттхо. на̄л̣икера̄дайоти а̄ди-саддена авутта̄нам̣ осадхитин̣аванаппатиа̄дӣнам̣ сан̇гахо. еварӯпанти едисам̣ ан̃н̃ампи там̣там̣локачиттам̣.

вигатачиттоти аттаттхапараттхато апагатавитакко аддаса евам̣ адхит̣т̣хахим̣сӯти самбандхо. самбарима̄йанти самбарена асуриндена уппа̄дитам̣ асурама̄йам̣, йам̣ ‘‘индаджа̄ла’’нтипи вуччати индасса моханаттхам̣ уппа̄дитатта̄. сампариваттетва̄ти паридха̄ветва̄. йатха̄ нети не асуре йатха̄ со пурисо пассати, евам̣ адхит̣т̣хахим̣су. касма̄ панете евам̣ адхит̣т̣хахим̣сӯти? там̣ пурисам̣ таттха татха̄нисиннам̣ дисва̄ ‘‘айан̃ча дево’’ти а̄сан̇канта̄ татха̄ адхит̣т̣хахитва̄ бхисамул̣а̄лачхиддехи пависитва̄ аттано асурабхаванам̣ гата̄. тена̄ха бхагава̄ – ‘‘дева̄нам̣йева мохайама̄на̄’’ти.

2-3. папа̄тасутта̄диван̣н̣ана̄

1112-3. марийа̄дапа̄са̄н̣оти гиджджхакӯт̣апаббатасса марийа̄дапа̄ка̄расадисо маханто па̄са̄н̣о. анит̣т̣харӯпанти еттха рӯпа-саддо сабха̄ваттхо ‘‘пийарӯпе са̄тарӯпе’’тиа̄дӣсу (ма. ни. 1.408-409) вийа̄ти а̄ха – ‘‘анит̣т̣хасабха̄ва’’нти.

5. ва̄ласуттаван̣н̣ана̄

1115. упа̄сананти а̄чарийаупа̄санам̣, а̄чарийам̣ антева̄сина̄ ва̄ дивасе дивасе сиккханавасена упа̄ситаббато упа̄сананти ладдхана̄мам̣ кан̣д̣акхипанасиппам̣. кан̣д̣ам̣ атиккамантети сарам̣ кхипанте. пон̇кха̄нупон̇кханти пон̇кхасаддаттхам̣ па̄кат̣ам̣ катва̄ дассетум̣ ‘‘екам̣ кан̣д̣ам̣ кхипитва̄’’тиа̄ди вуттам̣. апарам̣ анупон̇кханти еттха апаранти татийакан̣д̣ам̣. анупон̇кхам̣ на̄ма иданти дассетум̣ ‘‘анупон̇кхам̣ на̄ма дутийасса пон̇кха’’нти вуттам̣. тан̃хи татийена сарена виджджхӣйати. пуна апарам̣ тасса пон̇кханти идам̣ пана апара̄парам̣ авираджджханам̣ дассетум̣ вуттам̣. дурабхисамбхаватаранти абхибхавитум̣ асаккун̣еййатарам̣. ва̄ланти кесам̣. саттадха̄ бхиндитва̄ти саттаккхаттум̣ випха̄летва̄. тасса екам̣ бхеданти тасса кесасса екам̣ ам̣сусан̇кха̄там̣ бхедам̣ гахетва̄. ва̄тин̇ган̣амаджджхе бандхитва̄ти ва̄тин̇ган̣апхаласса маджджхат̣т̣ха̄не бандхитва̄. апарам̣ бхеданти апарам̣ кесасса ам̣сусан̇кха̄там̣ бхедам̣. аггакот̣ийам̣ бандхитва̄ти йатха̄ тасса ва̄лабхедасса ӯка̄маттам̣ ликха̄маттам̣ ва̄ кан̣д̣асса аггакот̣им̣ адхикам̣ хутва̄ тит̣т̣хати, евам̣ бандхитва̄. усабхаматтети вӣсатийат̣т̣химатте т̣ха̄не т̣хито. кан̣д̣абаддха̄йа кот̣ийа̄ти кан̣д̣абаддха̄йа ва̄ласса кот̣ийа̄ ва̄тин̇ган̣абандханава̄ласса кот̣им̣ пат̣ивиджджхеййа.

8. дутийачхиггал̣айугасуттаван̣н̣ана̄

1118. адхиччуппаттиканти йадиччха̄васена уппаджджанакам̣. чхиггал̣ена̄ти чхиггал̣ападесена. чхиггал̣упарӣти хет̣т̣химайугасса чхиггал̣ападесасса упари. а̄рул̣хасса чхиггал̣ена̄ти убхиннампи чхиддена. гӣваппавесанам̣ вийа̄ти чатуннам̣ йуга̄нам̣ чхиддападесенева упарӯпари т̣хита̄нам̣ чхиддантарена ка̄н̣акаччхапасса гӣваппавесанам̣ адхиччатарасамбхавам̣. татопи адхиччатарасамбхаво мануссаттала̄бхо, тато адхиччатамасамбхаво арийамаггапат̣ила̄бхоти дассенто а̄ха ‘‘чатусаччапат̣иведхо ативийа адхиччатарасамбхаво’’ти.

папа̄таваггаван̣н̣ана̄ нит̣т̣хита̄.