12. ра̄сийасуттаван̣н̣ана̄

364. ра̄сим̣ катва̄ ма̄рапа̄савасена, татра̄пи антарабхедена вибхаджитва̄ пуччхитаббапан̃хе екато ра̄сим̣ катва̄. тапанам̣ аттапарита̄панам̣ тапо, со етасса аттхӣти тапассӣ, там̣ тапассим̣. со пана там̣ тапам̣ нисса̄йа т̣хито на̄ма хотӣти вуттам̣ ‘‘тапанисситака’’нти. со пана анека̄ка̄рабхедена лӯкхам̣ пхарусам̣ джӣванасӣлатта̄ лӯкхаджӣвӣ на̄ма. тена̄ха ‘‘лӯкхаджӣвика’’нти. маджджхима̄йа пат̣ипаттийа̄ уппатхабха̄вена аванийа̄ гандхабба̄ти анта̄, тато ева ла̄макатта̄ анта̄. ла̄макампи ‘‘анто’’ти вуччати ‘‘антамидам̣, бхиккхаве, джӣвика̄нам̣ (итиву. 91; сам̣. ни. 3.80), еко анто’’ти евама̄дӣсу (сам̣. ни. 2.15; 3.90). ат̣т̣хакатха̄йам̣ пана ан̃н̃аман̃н̃аа̄дха̄рабха̄вам̣ урӣкатва̄ ‘‘кот̣т̣ха̄са̄’’ти вуттам̣. хӣно га̄моти па̄л̣и. га̄ма-саддо хӣнапарийа̄йоти адхиппа̄йена̄ха ‘‘га̄ммо’’ти. га̄ме бхавоти га̄ммо. га̄ма-саддо четтха га̄мава̄сивисайо ‘‘га̄мо а̄гато’’тиа̄дӣсу вийа. ат̣т̣хакатха̄йам̣ пана ‘‘га̄мава̄сӣнам̣ дхаммо’’ти вуттам̣, тесам̣ ча̄риттанти аттхо. атта-саддо идха сарӣрапарийа̄йо ‘‘аттантапо’’тиа̄дӣсу вийа̄ти а̄ха ‘‘сарӣрадуккхакаран̣анти аттхо’’ти.

еттха̄ти етасмим̣ тапанисситагарахитаббападе касма̄ антадвайамаджджхимапат̣ипада̄гахан̣ам̣? аттакиламатха̄нуйого та̄ва гайхату идаматтхита̄йа̄ти адхиппа̄йо. ка̄мабхогӣтапанисситаканиджджараваттхӯнам̣ дассане йатха̄дхиппетасса аттхасса вибхаджитва̄ катханам̣ самбхаватӣти те дассетва̄ адхиппетаттхо катхито.

таматтханти йо ‘‘ка̄мабхогӣтапанисситакесу гарахитаббейева гарахати, пасам̣ситаббейева ча пасам̣сатӣ’’ти вутто аттхо, таматтхам̣ пака̄сенто. са̄хасикакаммена̄ти айуттена каммена. дхаммена ча адхаммена ча̄ти дхаммикена адхаммикена ча. айонисо паваттам̣ ба̄хиракам̣ сандха̄йа чодако ‘‘катха’’нтиа̄дима̄ха. итаро найидам̣ та̄дисам̣ аттапарита̄панам̣ адхиппетам̣, атха кхо йонисо паваттам̣ са̄саникамева̄ти дассенто ‘‘чатуран̇гавӣрийавасена ча̄’’ти а̄ха. таттха ‘‘ка̄мам̣ тачо ча нха̄ру ча ат̣т̣хи ча авасиссатӯ’’тиа̄дина̄ (ма. ни. 2.184; сам̣. ни. 2.22.237; а. ни. 2.5) найена вутта̄ сарӣренирапеккхавипассана̄йа уссукка̄панавасена паватта̄ вӣрийабха̄вана̄ ‘‘чатуран̇гавӣрийавасена̄’’ти вутта̄. татха̄ аббхока̄сиканесаджджикатапа̄диниссита̄ва килесанимматханайогйа̄ вӣрийабха̄вана̄ ‘‘дхутан̇гавасена ча̄’’ти вутта̄ти. арийамаггена ниссесакилеса̄нам̣ паджахана̄ ниджджара̄. са̄ ча аттапаччаккхата̄йа сандит̣т̣хика̄ тин̣н̣ам̣ мӯлакилеса̄нам̣ паджаханена ‘‘тиссо’’ти ча вутта̄. тена̄ха ‘‘екопӣ’’тиа̄ди.

ра̄сийасуттаван̣н̣ана̄ нит̣т̣хита̄.