4. чханнасуттаван̣н̣ана̄

87. саббанимиттехи пат̣исаллӣйати етена̄ти пат̣исалла̄нам̣, пхаласама̄патти. джӣвитаха̄ракасаттхам̣ джӣвитасса харан̣ато, сатта̄нан̃ча сасанато хим̣санато. паричаритоти пайирупа̄сито. тена йатха̄нусит̣т̣хам̣ пат̣ипаджджинти дӣпети.

анупаваджджанти парехи на упавадитаббам̣. там̣ панеттха а̄йатим̣ аппат̣исандхибха̄вато хотӣти а̄ха ‘‘аппаваттика’’нти. ‘‘нетам̣ мама̄’’тиа̄дӣни ваданто арахатте паккхипитва̄ катхеси. путхуджджанабха̄вамева дӣпенто вадати акатакиччабха̄вадӣпанена. кин̃ча̄пи тхеро пуччхитам̣ пан̃хам̣ арахатте паккхипитва̄ катхеси, ‘‘на саманупасса̄мӣ’’ти пана ваданто кин̃чи ниппхаттим̣ на катхеси, тасма̄ ‘‘идампи манаси ка̄табба’’нти идам̣ а̄нетва̄ самбандхо.

килесапассаддхӣти килесапарил̣а̄хавӯпасамо. бхаваттха̄йа пуна бхаваттха̄йа. а̄лайаниканти парийут̣т̣ха̄нети бхавантаре апеккха̄сан̃н̃ите а̄лайе никантийа̄ ча парийут̣т̣ха̄наппаттийа̄. асати авиджджама̄на̄йа. пат̣исандхивасена ан̃н̃абхавато идха̄гаманам̣ а̄гати на̄ма. чутивасена гамананти чаванавасена ито гати. анурӯпагаманам̣ гати на̄ма тадубхайам̣ на хоти. чутӯпапа̄то апара̄парабхаванавасена чути, упападжджанавасена упапа̄то, тадубхайампи на хоти. евам̣ пана чутӯпапа̄те асати невидха на идха локе. на хурам̣ на паралоке хоти. тато ева на убхайаттха хоти. айамева анто айам̣ идхалоке паралоке ча абха̄войева дуккхасса парийоса̄нам̣. айамева̄ти йатха̄вутто ева – еттха етасмим̣ па̄т̣хе парампара̄гато пама̄н̣абхӯто аттхо.

йе пана̄ти саммава̄дино сандха̄йа вадати. антара̄бхавам̣ иччханти ‘‘евам̣ бхавена бхавантарасамбандхо йуджджеййа̄’’ти. нираттхакам̣ антара̄бхавасса на̄ма кассачи абха̄вато. чутиккхандха̄нантаран̃хи пат̣исандхиккхандха̄нам̣йева па̄тубха̄во. тена̄ха ‘‘антара̄бхавасса…пе… пат̣иккхиттойева̄’’ти. таттха бха̄воти аттхита̄. абхидхамме катха̄ваттхуппакаран̣е (катха̄. 505-507) пат̣иккхиттойева. йади евам̣ ‘‘антарена̄’’ти идам̣ катханти а̄ха ‘‘антарена̄’’тиа̄ди. викаппато ан̃н̃ам̣ викаппантарам̣, тасса дӣпанам̣ ‘‘антарена̄’’ти вачанам̣. на антара̄бхавадӣпанам̣ та̄дисасса анупалаббханато пайоджана̄бха̄вато ча. йаттха хи випа̄кавин̃н̃а̄н̣асса паччайо, таттхасса ниссайабхӯтасса ваттхусса сахабха̄вӣнан̃ча кхандха̄нам̣ самбхавоти саддхим̣ аттано ниссайена вин̃н̃а̄н̣ам̣ уппаджджатева̄ти на̄сса уппаттийа̄ десадӯрата̄ ведитабба̄. ‘‘нева идха на хура’’нти вуттадвайато апарам̣ викаппена ‘‘на убхайа’’нти, таттхапи на хотийева̄ти адхиппа̄йо. ‘‘антарена̄’’ти ва̄ ‘‘вина̄’’ти имина̄ сама̄наттхо нипа̄то, тасма̄ невидха, на хурам̣, убхайам̣ вина̄пи нева̄ти аттхо.

а̄харӣти чхиннавасена ган̣хи. тена̄ха ‘‘кан̣т̣хана̄л̣ам̣ чхиндӣ’’ти. паригган̣хантоти саммасанто. париниббуто дӣгхараттам̣ випассана̄йам̣ йуттапайуттабха̄вато. ‘‘анупаваджджам̣ чханнена бхиккхуна̄ саттхам̣ а̄харита’’нти, катхесӣти асеккхака̄ле бйа̄каран̣ам̣ вийа катва̄ катхеси.

имина̄ти ‘‘упаваджджакула̄нӣ’’ти имина̄ вачанена. тхероти са̄рипуттаттхеро. еванти евам̣ пуббака̄лесу сам̣сат̣т̣хавиха̄рӣ хутва̄ т̣хито паччха̄ арахаттам̣ па̄пун̣иссатӣти а̄сан̇канто пуччхати. сесам̣ утта̄намева.

чханнасуттаван̣н̣ана̄ нит̣т̣хита̄.