8. самуггха̄таса̄руппасуттаван̣н̣ана̄

30. ман̃н̃итам̣ на̄ма тан̣ха̄ма̄надит̣т̣хӣхи гахетаббам̣ ман̃н̃итам̣. саббасмим̣ ман̃н̃итанти саббаман̃н̃итам̣, тасса самуггха̄то сетугха̄то, тада̄вахам̣ саббаман̃н̃итасамуггха̄таса̄руппам̣. ат̣т̣хакатха̄йам̣ пана ‘‘ман̃н̃итам̣ на̄ма чаккха̄дӣсу ева уппаджджати, на̄н̃н̃асми’’нти дутийанайо вутто. ануччхавиканти анурӯпам̣ авиломам̣. идха̄ти идхева са̄сане ан̃н̃аттха тадабха̄вато. ‘‘тан̣ха̄-ма̄надит̣т̣химан̃н̃ита̄на’’нти вуттам̣ ман̃н̃итаттайам̣ сапарасанта̄несу пат̣ипаккхавасена йоджетва̄ дассетум̣ ‘‘чаккхум̣ аханти ва̄’’тиа̄ди вуттам̣. таттха ‘‘чаккхум̣ аха’’нти имина̄ аджджхаттависайам̣ дит̣т̣химан̃н̃итан̃ча дассети атта̄бхинивеса̄хам̣ка̄радӣпанато. ‘‘мама’’нти имина̄ тан̣ха̄ман̃н̃итам̣ ма̄наман̃н̃итампи ва̄, париггахамукхенапи сеййа̄дито ма̄нуппаджджанато. сесапададвайепи имина̄ найена ман̃н̃итавибха̄го ведитаббо. аханти атта̄ва, со ча чаккхусмим̣ тададхӣнавуттитта̄ ‘‘паро’’ти на ман̃н̃ати. мама кин̃чанапалибодхо чаккхусмим̣ сати лаббханато, асати на ман̃н̃ати татха̄ман̃н̃итасса паччайагха̄тато. сесапададвайепи есева найо.

ахам̣ чаккхуто ниггатоти ‘‘аха’’нти ваттаббо айам̣ сатто чаккхуто ниггато таттха сукхума̄ка̄рена упалаббханато. мама кин̃чанапалибодхо чаккхуто ниггато тасмим̣ сати ева упалаббханато. сесадвайепи есева найо. таттха пароти паро сатто. мама чаккхӯти на ман̃н̃ати йасса там̣ чаккху, тасса ‘‘аха’’нти ваттаббассева абха̄вато. маматтабхӯтанти мама ка̄ран̣ам̣. сесам̣ утта̄намева. еваметасмим̣ сутте чаккхурӯпа-чаккхувин̃н̃а̄н̣а-чаккхусампхасса-сукхадуккха̄дуккхамасукхавасена сатта ва̄ра̄ чаккхудва̄ре, татха̄ сотадва̄ра̄дӣсӯти чха саттака̄ двечатта̄лӣса. пуна сакка̄йавасена ‘‘саббам̣ на ман̃н̃атӣ’’тиа̄дина̄ вуттам̣, тена течатта̄лӣса. пуна тебхӯмакават̣т̣ам̣ ‘‘локо’’ти гахетва̄ ‘‘на кин̃чи локе упа̄дийатӣ’’ти вуттам̣, тена чатучатта̄лӣса хонти. евам̣ саббатха̄пи чатучатта̄лӣса̄йа т̣ха̄несу арахаттам̣ па̄петва̄ випассана̄ катхита̄ти ведитабба̄. ‘‘чатучатта̄лӣса̄дхикасатесӯ’’ти кесучи поттхакесу ликханти, са̄ ча пама̄далекха̄.

самуггха̄таса̄руппасуттаван̣н̣ана̄ нит̣т̣хита̄.