2. паха̄насуттаван̣н̣ана̄

24. саббасса̄ти два̄ра̄рамман̣ехи саддхим̣ два̄раппаваттасса. паха̄на̄йа̄ти таппат̣ибаддхачхандара̄гапаха̄навасена паджахана̄йа. чаккхусампхассанти чаккхусаннисситапхассам̣. мӯлапаччайанти мӯлабхӯтам̣ паччайам̣ катва̄, сахаджа̄таведана̄йа чаккхусампхассапаччайабха̄ве ваттаббамева наттхи. есева найоти ападесена ‘‘сотасампхассам̣ мӯлапаччайам̣ катва̄’’тиа̄дина̄ ваттаббанти дассети. маноти бхаван̇гачиттам̣ манодва̄расса адхиппетатта̄. а̄рамман̣анти дхамма̄рамман̣ам̣. саха̄ваджджанакаджавананти сахаманодва̄ра̄ваджджанакам̣ джаванам̣. там̣пуббакатта̄ мановин̃н̃а̄н̣апхассаведана̄нам̣ мӯлапаччайабхӯта̄ саббесвева чаккхудва̄ра̄дӣсу вуттитта̄ таданурӯпато ‘‘бхаван̇гасахаджа̄то сампхассо’’ти вуттам̣. саха̄ваджджанаведана̄йа джаванаведана̄ ‘‘ведайита’’нти адхиппета̄, бхаван̇гасампайутта̄йа пана ведана̄йа гахан̣е ваттаббамева наттхи. бхаван̇гато амочетва̄ бхаван̇гачиттена саддхим̣йева а̄ваджджанам̣ гахетва̄ манодва̄ра̄ваджджанам̣ бхаван̇гам̣ дат̣т̣хаббам̣. йа̄ панеттха десана̄ти йа̄ еттха ‘‘паха̄на̄йа̄’’тиа̄дина̄ паваттадесана̄ саттху анасит̣т̣хи а̄н̣а̄. айам̣ пан̣н̣атти на̄ма тасса тасса аттхасса пака̄рато н̃а̄панато. еттха саббаггахан̣ена саббе сабха̄вадхамма̄ гахита̄, пан̃н̃атти пана катама̄ти вича̄ран̣а̄йа там̣ дассетум̣ ‘‘йа̄ панеттха̄’’тиа̄ди вуттанти дат̣т̣хаббам̣.

паха̄насуттаван̣н̣ана̄ нит̣т̣хита̄.