4. ка̄магун̣асуттаван̣н̣ана̄

117. четасоти каран̣е са̄мивачанам̣. читтена сам̣пхусанам̣ на̄ма анубхавоти а̄ха ‘‘читтена анубхӯтапубба̄’’ти. утуттайа̄нурӯпата̄васена па̄са̄даттайам̣, там̣ васена тивидхана̄т̣акабхедо. манораммата̄маттена ка̄магун̣ам̣ катва̄ дасситам̣, на ка̄мавасена. на хи абхиниккхаманато уддхам̣ бодхисаттасса ка̄мавитакка̄ бхӯтапубба̄. тена̄ха ма̄ро па̄пима̄ –

‘‘сатта васса̄ни бхагавантам̣, анубандхим̣ пада̄падам̣;

ота̄рам̣ на̄дхигаччхиссам̣, самбуддхасса сатӣмато’’ти. (су. ни. 448);

меттеййо на̄ма̄тиа̄ди ана̄гата̄рамман̣адассанаматтам̣, на бодхисаттасса евам̣ уппаджджатӣти. атта̄ пийа̄йитаббарӯпо етасса̄ти аттарӯпо, уттарападе пуримападалопена̄ти ‘‘аттано хитака̄маджа̄тикена̄’’ти аттхо вутто. аттарӯпена̄ти ва̄ пӣтисоманассехи гахитасабха̄вена тут̣т̣хапахат̣т̣хена удаггудаггена. аппама̄доти аппамаджджанам̣ кусаладхаммесу акхан̣д̣ака̄рита̄ти а̄ха ‘‘са̄таччакирийа̄’’ти. авоссагготи читтасса ка̄магун̣есу авоссаджджанам̣ паккхандитум̣ аппада̄нам̣. пуримо викаппо кусала̄нам̣ дхамма̄нам̣ каран̣авасена дассито, паччхимо акусала̄нам̣ акаран̣авасена. две дхамма̄ти аппама̄до сатӣти две дхамма̄. аппама̄до сати ча татха̄ паватта̄ чатта̄ро кусаладхаммаккхандха̄ ведитабба̄. каттабба̄ти паваттетабба̄.

тасмим̣ а̄йатанети тасмим̣ нибба̄насан̃н̃ите ка̄ран̣е пат̣иведхе. там̣ ка̄ран̣анти чханнам̣ а̄йатана̄нам̣ ка̄ран̣ам̣. сал̣а̄йатанам̣ нируджджхати еттха̄ти сал̣а̄йатананиродхо вуччати нибба̄нам̣. тена̄ха ‘‘нибба̄нам̣. там̣ сандха̄йа̄’’тиа̄ди. нибба̄насминти нибба̄намхи.

ка̄магун̣асуттаван̣н̣ана̄ нит̣т̣хита̄.