6. каротосуттаван̣н̣ана̄

211. сахаттха̄ каронтасса̄ти сахаттхена каронтасса. ниссаггийатха̄вара̄дайопи идха сахаттхакаран̣енева сан̇гахита̄. хаттха̄дӣнӣти хаттхапа̄дакан̣н̣ана̄са̄дӣни. пачанам̣ даханам̣ виба̄дхананти а̄ха ‘‘дан̣д̣ена пӣл̣ентасса̄’’ти. папан̃часӯданийам̣ ‘‘таджджентасса ча̄’’ти аттхо вутто, идха пана суман̇галавила̄синийам̣ вийа таджджанам̣ парибха̄санам̣ дан̣д̣енева сан̇гахетва̄ ‘‘дан̣д̣ена пӣл̣ентасса’’иччева вуттам̣. сокам̣ сайам̣ каронтасса̄ти парасса сокака̄ран̣ам̣ сайам̣ каронтасса, сокам̣ ва̄ уппа̄дентасса. парехи аттано вачанакарехи. сайампи пхандатоти парасса виба̄дханаппайогена сайампи пхандато. атипа̄тайатоти падам̣ суддхакаттуаттхе хетукаттуаттхе ча ваттатӣти а̄ха – ‘‘ханантассапи хана̄пентассапӣ’’ти. ка̄ран̣авасена̄ти ка̄ра̄панавасена.

гхарасса бхитти анто ча бахи ча сандхита̄ хутва̄ т̣хита̄ва гхарасандхи. кин̃чипи асесетва̄ ниравасесо лопо ниллопо. ека̄га̄ре нийутто вилопо ека̄га̄рико. парито саббасо пантхе хананам̣ парипантхо. па̄пам̣ на карӣйати пуббе асато уппа̄детум̣ асаккун̣еййатта̄, тасма̄ наттхи па̄пам̣. йади евам̣ катхам̣ сатта̄ па̄пе паваттантӣти а̄ха ‘‘сатта̄ пана карома̄ти евам̣сан̃н̃ино хонтӣ’’ти евам̣ кирасса хоти имесан̃хи сатта̄нам̣ хим̣са̄дикирийа̄ на атта̄нам̣ пхусати тасса ниччата̄йа ниббика̄ратта̄, сарӣрам̣ пана ачетанам̣ кат̣т̣хакалин̇гарӯпамам̣, тасмим̣ викопитепи на кин̃чи па̄панти. кхуранемина̄ти ниситакхурамайанемина̄, кхурасадисанемина̄ти аттхо.

ган̇га̄йа даккхин̣а̄ диса̄ аппатирӯпадесо, уттарадиса̄ патирӯпадесоти адхиппа̄йена ‘‘даккхин̣ан̃чепӣ’’тиа̄ди вуттанти а̄ха ‘‘даккхин̣атӣре манусса̄ каккхал̣а̄’’тиа̄ди. маха̄йа̄ганти маха̄виджитайан̃н̃асадисам̣ маха̄йа̄гам̣. упосатхакаммена̄ти упосатхакаммена ча. ча-саддо хеттха луттаниддит̣т̣хо. дамасаддо хи индрийасам̣варасса упосатхасӣласса ча ва̄чако идха̄дхиппето. кечи пана ‘‘упосатхакаммена̄’’ти идам̣ индрийадаманасса висесанам̣, тасма̄ ‘‘упосатхакаммабхӯтена индрийадамена̄’’ти аттхам̣ ваданти. сӣласам̣йамена̄ти сӣласам̣варена. саччавачанена̄ти саччава̄ча̄йа. тасса̄ висум̣ вачанам̣ локе гарутарапун̃н̃асамматабха̄вато. йатха̄ хи па̄падхаммесу муса̄ва̄до гару, евам̣ пун̃н̃адхаммесу саччава̄ча̄. тена̄ха бхагава̄ – ‘‘екам̣ дхаммам̣ атӣтасса̄’’тиа̄ди (итиву. 25). паваттӣти йо каротӣти вуччати, тасса санта̄не пхаласса ниббаттийа̄ паччайабха̄вена паватти. саббатха̄ти ‘‘карото’’тиа̄дина̄ вуттена саббаппака̄рена кирийамева пат̣иккхипанти.

каротосуттаван̣н̣ана̄ нит̣т̣хита̄.