5. ваккалисуттаван̣н̣ана̄

87. нагарамаджджхе маха̄а̄ба̄дхо уппаджджӣти нагарамаджджхена а̄гаччханто каммасамут̣т̣ха̄но маханто а̄ба̄дхо уппаджджати. самантато адхосӣти саббабха̄гена париппханди. ирийа̄патхам̣ йа̄петунти сайананисаджджа̄дибхедам̣ ирийа̄патхам̣ паваттетум̣. ниваттантӣти осакканти, париха̄йантӣти аттхо. адхигаччхантӣти вад̣д̣ханти. саттху гун̣асарӣрам̣ на̄ма нававидхалокуттарадхамма̄дхигамамӯланти катва̄ вуттам̣ ‘‘нававидхо хи…пе… ка̄йо на̄ма̄’’ти, йатха̄ сатта̄нам̣ ка̄йо пат̣исандхимӯлако.

ка̄л̣асила̄йам̣ катавиха̄ро ка̄л̣асила̄виха̄ро. маггавимоккхаттха̄йа̄ти аггамаггавимоккха̄дхигама̄йа. девата̄ти суддха̄ва̄садевата̄. ала̄макам̣ на̄ма путхуджджанака̄лакирийа̄йа абха̄вато. тена̄ха ‘‘тхеро кира̄’’тиа̄ди. екам̣ две н̃а̄н̣а̄нӣти екам̣ две паччавеккхан̣ан̃а̄н̣а̄ни сабха̄вато авассам̣ уппаджджанти, айам̣ дхаммата̄. маггапхаланибба̄напаччавеккхан̣а̄ни там̣там̣маггавут̣т̣ха̄не уппаджджанти ева. екам̣ двети вачанам̣ уппаннабха̄вадассанаттхам̣ вуттам̣.

дхӯма̄йанабха̄во дхӯма̄ка̄рата̄, татха̄ тимира̄йанабха̄во.

ваккалисуттаван̣н̣ана̄ нит̣т̣хита̄.