3. бха̄равагго

1. бха̄расуттаван̣н̣ана̄

22. упа̄да̄на̄нам̣ а̄рамман̣абхӯта̄ кхандха̄ упа̄да̄наккхандха̄. париха̄рабха̄рийат̣т̣хена̄ти париха̄расса бха̄рийабха̄вена гарутарабха̄вена. вуттамева аттхам̣ па̄кат̣ам̣ ка̄тум̣ ‘‘етесан̃хӣ’’тиа̄дима̄ха. таттха йасма̄ ета̄ни т̣ха̄нагамана̄дӣни рӯпа̄рӯпадхамма̄нам̣ пан̇гуладжаччандха̄нам̣ вийа ан̃н̃аман̃н̃ӯпассайавасена иджджханти, на паччекам̣, тасма̄ ‘‘етеса’’нти ависесавачанам̣ катам̣. пуггаланти кхандхасанта̄нам̣ вадати. кхандхасанта̄но хи авиччхедена паваттама̄но йа̄ва паринибба̄на̄ кхандхабха̄рам̣ ваханто вийа локе кха̄йати таббинимуттасса саттасса абха̄вато. тена̄ха ‘‘пуггало’’тиа̄ди. бха̄раха̄роти джа̄тоти бха̄раха̄ро на̄ма джа̄то.

пунаббхавакаран̣ам̣ пунаббхаво, там̣ пхалам̣ арахати, таттха нийутта̄ти ва̄ понобхавика̄. таббха̄васахагатам̣ йатха̄ ‘‘санидассана̄ дхамма̄’’ти, на сам̣сат̣т̣хасахагатам̣, на̄пи а̄рамман̣асахагатам̣. ‘‘татра татра̄’’ти йам̣ йам̣ уппаттит̣т̣ха̄нам̣, рӯпа̄диа̄рамман̣ам̣ ва̄ патва̄ татрататра̄бхинандинӣ. тена̄ха ‘‘упапаттит̣т̣ха̄не ва̄’’тиа̄ди. пан̃чака̄магун̣икоти пан̃чака̄магун̣а̄рамман̣о. рӯпа̄рӯпӯпапаттибхаве ра̄го рӯпа̄рӯпабхавара̄го. джха̄наниканти джха̄насан̇кха̄те каммабхаве ра̄го. сассата̄дит̣т̣хӣти бхавадит̣т̣хи, там̣сахагато ра̄го. айанти ра̄го бхаватан̣ха̄ на̄ма. уччхедадит̣т̣хи вибхавадит̣т̣хи на̄ма, там̣сахагато чхандара̄го вибхаватан̣ха̄ на̄ма. еса пуггало кхандхабха̄рам̣ а̄дийати тан̣ха̄васена пат̣исандхиггахан̣ато. ‘‘асесаметтха тан̣ха̄ вираджджати палуджджати нируджджхати пахӣйатӣ’’тиа̄дина̄ саббапада̄ни нибба̄навасенева ведитабба̄нӣти а̄ха ‘‘саббам̣ нибба̄нассева вевачана’’нти.

бха̄расуттаван̣н̣ана̄ нит̣т̣хита̄.

2. парин̃н̃асуттаван̣н̣ана̄

23. париджа̄нитаббети паха̄напарин̃н̃а̄йа париджа̄нитаббе. татха̄ париджа̄нанан̃ча таттха чхандара̄гаппаха̄нам̣, тесам̣ атиккамоти а̄ха ‘‘саматиккамитаббети аттхо’’ти. аччантапарин̃н̃анти нибба̄нам̣ вадати. тена̄ха ‘‘саматиккаманти аттхо’’ти.

парин̃н̃асуттаван̣н̣ана̄ нит̣т̣хита̄.

3. абхиджа̄насуттаван̣н̣ана̄

24. н̃а̄тапарин̃н̃а̄ катхита̄ ‘‘абхивисит̣т̣ха̄йа пан̃н̃а̄йа джа̄нана’’нти катва̄. дутийападена̄ти ‘‘париджа̄на’’нти падена. татийачатуттхехӣти ‘‘вира̄джайам̣ паджаха’’нти падехи.

абхиджа̄насуттаван̣н̣ана̄ нит̣т̣хита̄.

4-9. чхандара̄гасутта̄диван̣н̣ана̄

25-30. дха̄тусам̣йутте вуттанайенева ведитабба̄ни, кевалан̃хи еттха кхандхавасена десана̄ а̄гата̄, таттха дха̄тувасена̄ти айамева висесо. чатта̄ри сачча̄ни катхита̄ни асса̄да̄дӣнаваниссаран̣авасена десана̄йа паваттатта̄.

чхандара̄гасутта̄диван̣н̣ана̄ нит̣т̣хита̄.

10. агхамӯласуттаван̣н̣ана̄

31. агхам̣ вуччати па̄пам̣, агханимиттата̄йа агхам̣ дуккхам̣. идан̃хи дуккхам̣ на̄ма висесато па̄пахетукам̣ каммапхаласан̃н̃итам̣. татха̄ ват̣т̣адуккхам̣ авиджджа̄тан̣ха̄мӯлакатта̄. агхасса нимиттата̄йа агхам̣ дуккхам̣. ват̣т̣а̄нуса̄рӣ маха̄джано хи дуккха̄бхибхӯто тасса патика̄рам̣ ман̃н̃ама̄но там̣ там̣ каротӣти.

агхамӯласуттаван̣н̣ана̄ нит̣т̣хита̄.

11. пабхан̇гусуттаван̣н̣ана̄

32. пабхиджджанасабха̄ванти кхан̣е кхан̣е пабхан̇гусабха̄вам̣.

пабхан̇гусуттаван̣н̣ана̄ нит̣т̣хита̄.

бха̄раваггаван̣н̣ана̄ нит̣т̣хита̄.