5. сама̄дхисуттаван̣н̣ана̄

5. сама̄дхӣти аппана̄сама̄дхи, упача̄расама̄дхи ва̄. каммат̣т̣ха̄нанти сама̄дхипа̄дакам̣ випассана̄каммат̣т̣ха̄нам̣. ‘‘пха̄тим̣ гамиссатӣ’’ти па̄т̣хо. паттхетӣти ‘‘ахо вата ме ӣдисам̣ рӯпам̣ бхавеййа̄’’ти. абхивадатӣти тан̣ха̄дит̣т̣хивасена абхинивесам̣ вадати. тена̄ха ‘‘та̄йа абхинандана̄йа̄’’тиа̄ди. ‘‘ахо пийам̣ ит̣т̣ха’’нти вачӣбхеде асатипи татха̄ лобхуппа̄де сати абхивадатийева на̄ма. тена̄ха ‘‘ва̄чам̣ абхинданто’’ти. ‘‘мама ида’’нти аттано парин̣а̄метва̄ анан̃н̃агочарам̣ вийа катва̄ ган̣ханто аджджхоса̄йа тит̣т̣хати на̄ма̄ти дассенто а̄ха ‘‘гилитва̄ти паринит̣т̣хапетва̄ ган̣ха̄тӣ’’ти. ‘‘абхинандатӣ’’тиа̄дайо пуббабха̄гавасена вутта̄, ‘‘уппаджджати нандӣ’’ти два̄раппаттавасена. пат̣хамехи падехи анусайо, паччхимена парийут̣т̣ха̄нанти кечи ‘‘гахан̣ат̣т̣хена упа̄да̄на’’нти катва̄. на̄бхинандати на̄бхивадатӣти еттха хет̣т̣ха̄ вуттавипарийа̄йена аттхо ведитаббо. на ‘‘ит̣т̣хам̣ канта’’нти вадатӣти ‘‘ит̣т̣ха’’нти на вадати, ‘‘канта’’нти на вадати. на̄бхивадатийева тан̣ха̄йа анупа̄дийатта̄.

сама̄дхисуттаван̣н̣ана̄ нит̣т̣хита̄.