1. накхасикха̄суттаван̣н̣ана̄

74. сукхума̄ти тарун̣а̄ паритта̄ кесаггаматтабха̄вато. йатха̄ кеса̄ дӣгхасо дван̇гуламатта̄йа саббасмим̣ ка̄ле етаппама̄н̣а̄ва, на таччхинданам̣, евам̣ накхагга̄пи кесаггаматта̄ва, на тесам̣ чхинданам̣ авад̣д̣ханато. паратоти ‘‘сахассимам̣ сатасахассима’’нти вуттат̣т̣ха̄не. абхисаметва̄ти пат̣ивиджджхитва̄, тасма̄ абхисамета̄вино пат̣ивиддхасаччасса̄ти аттхо. ка̄мам̣ пуримападам̣ дуккхаккхандхасса атӣтабха̄вам̣ упа̄да̄йапи ваттум̣ йуттам̣. пуретарам̣йева пана вуттабха̄вам̣ упа̄да̄йа вуттанти дассетум̣ ‘‘пуримам̣ дуккхаккхандха’’нтиа̄ди вуттам̣. пуримам̣ на̄ма паччхимам̣ апеккхитва̄. пуримапаччхимата̄ хи там̣ там̣ упа̄да̄йа вуччатӣти идха̄дхиппетам̣ пуримам̣ нӣхаритва̄ дассетум̣ ‘‘катамам̣ пана̄’’тиа̄ди вуттам̣. ‘‘атӣтампи париккхӣн̣а’’нти идха̄дхиппетам̣ париккхӣн̣амева вибха̄ветум̣ ‘‘катамам̣ пана париккхӣн̣а’’нтиа̄ди вуттам̣. сота̄паннасса дуккхаккхайо идха чодитоти там̣ дассетум̣ ‘‘пат̣хамамаггасса абха̄витатта̄ уппаджджеййа̄’’ти ватва̄ ида̄ни там̣ сарӯпато дассетум̣ пуна ‘‘катама’’нтиа̄ди вуттам̣. саттасу аттабха̄весу йам̣ апа̄йе уппаджджеййа ат̣т̣хамам̣ пат̣исандхим̣ а̄дим̣ катва̄ йаттха каттхачи апа̄йесу ча̄ти йам̣ дуккхам̣ уппаджджеййа, там̣ саббам̣ париккхӣн̣анти дат̣т̣хаббам̣. асса̄ти сота̄паннасса, йам̣ парима̄н̣ам̣, тато уддхан̃ча упапа̄там̣ аттхӣти адхиппа̄йо. маха̄ аттхо гун̣о махаттхо, со етасса аттхӣти махаттхийо ка-ка̄расса йа-ка̄рам̣ катва̄. тена̄ха ‘‘махато аттхасса ниппха̄дако’’ти.

накхасикха̄суттаван̣н̣ана̄ нит̣т̣хита̄.