6. саммасасуттаван̣н̣ана̄

66. чхат̣т̣хе асса̄ти бхагавато. сан̣хасукхумадхаммапаридӣпанато сукхума̄. тӣхи лаккхан̣ехи ан̇кийатта̄ тилаккхан̣а̄хата̄, аничча̄дилаккхан̣апаридӣпинӣти аттхо. арийадхамма̄дхигамасса упаниссайабхӯтена хетуна̄ сахетука̄. тихетукапат̣исандхипан̃н̃а̄йа па̄т̣иха̄рийапан̃н̃а̄йа ча аттхита̄йа пан̃н̃аванто на кевалам̣ аджджхаттикаан̇гасампаттийева, ба̄хиран̇гасампаттипи несаматтхӣти дассетум̣ ‘‘синиддха̄нӣ’’тиа̄ди вуттам̣. аббхантаранти аджджхаттам̣. паччайасаммасананти паччайуппанна̄нам̣ паччайавӣмам̣сам̣.

а̄рамбха̄нурӯпа̄ анусандхи йатха̄нусандхи. на гата̄ти на сампатта̄. асамбхиннападанти авомиссакападам̣, ан̃н̃аттха евам̣ ана̄гатам̣ ва̄кйанти аттхо. тена̄ха ‘‘ан̃н̃аттха хи евам̣ вуттам̣ на̄ма наттхӣ’’ти. еванти ‘‘тенаха̄нанда̄’’ти екавачанам̣, ‘‘сун̣а̄тха манаси каротха̄’’ти бахувачанам̣ катва̄ вуттам̣ на̄ма наттхӣти аттхо. кечи пана ‘‘тенаха̄нанда̄’’ти идха̄пи бахувачанамева катва̄ пат̣ханти ‘‘са̄дху ануруддха̄’’тиа̄дӣсу вийа. упадхӣти адхиппетам̣ упадхӣйати еттха дуккханти. уппаджджати уппа̄даккхан̣ам̣ удайам̣ пат̣илабхати ‘‘па̄кат̣абха̄во т̣хитико, аттала̄бхо удайо’’ти. нивисати нивесам̣ ока̄сам̣ пат̣илабхати. екава̄рамева хи уппаннаматтасса дхаммасса дуббалаттена ока̄се вийа патит̣т̣хаханам̣ наттхи, пунаппунам̣ а̄рамман̣е паваттама̄нам̣ нивит̣т̣хам̣ патит̣т̣хитам̣ на̄ма хоти. тена̄ха ‘‘нивисатӣти пунаппунам̣ паваттивасена патит̣т̣хахатӣ’’ти.

пийасабха̄ванти пийа̄йитаббаджа̄тикам̣. мадхурасабха̄ванти ит̣т̣хаджа̄тикам̣. абхинивит̣т̣ха̄ти тан̣ха̄бхинивесена отин̣н̣а̄. сампаттийанти бхавасампаттийам̣. нимиттаггахан̣а̄нуса̄рена̄ти пат̣ибимбаггахан̣а̄нуса̄рена. кан̣н̣асса чхиддападесам̣ раджатана̄л̣икам̣ вийа, кан̣н̣абаддхам̣ пана па̄ман̇гасуттам̣ вийа. тун̇га̄ учча̄ дӣгха̄ на̄сика̄ тун̇гана̄са̄. евам̣ ладдхавоха̄рам̣ аттано гха̄нам̣. ‘‘ладдхавоха̄ра̄’’ти ва̄ па̄т̣хо. тасмим̣ сати тун̇га̄ на̄са̄ йесам̣ те тун̇гана̄са̄. евам̣ ладдхавоха̄ра̄ сатта̄ аттано гха̄нанти йоджана̄ ван̣н̣асан̣т̣ха̄нато раттакамбалапат̣алам̣ вийа. сампхассато мудусиниддхам̣ киччато синиддхамадхурарасадам̣. са̄лалат̣т̣хинти са̄лаккхандхам̣.

аддасам̣сӯти пассим̣су. евам̣ вуттанти ‘‘кам̣се’’ти евам̣ вуттам̣ адхит̣т̣ха̄навоха̄рена.

сампаттинти ван̣н̣а̄дигун̣ам̣. а̄дӣнаванти маран̣аггатато.

саттупа̄нӣйена̄ти саттум̣ паккхипитва̄ а̄лолитапа̄нӣйена. чатта̄ри па̄на̄ни вийа чатта̄ро магга̄ тан̣ха̄пипа̄са̄вӯпасаманато.

саммасасуттаван̣н̣ана̄ нит̣т̣хита̄.