3. дуккхасуттаван̣н̣ана̄

43. самудайанам̣ самудайо, самудети етамха̄ти самудайо, евам̣ убхиннам̣ самудайа̄наматтхатопи бхедо ведитаббо. паччайа̄ва паччайасамудайо. а̄раддхавипассако ‘‘иман̃ча иман̃ча паччайаса̄маггим̣ пат̣ичча име дхамма̄ кхан̣е кхан̣е уппаджджантӣ’’ти пассанто ‘‘паччайасамудайам̣ пассантопи бхиккху кхан̣икасамудайам̣ пассатӣ’’ти вутто паччайадассанамукхена ниббаттиккхан̣асса дассанато. со пана кхан̣е кхан̣е сан̇кха̄ра̄нам̣ ниббаттим̣ пасситум̣ а̄раддхо ‘‘имехи на̄ма паччайехи ниббаттатӣ’’ти пассати. ‘‘со кхан̣икасамудайам̣ пассанто паччайам̣ пассатӣ’’ти ваданти. йасма̄ пана паччайато сан̇кха̄ра̄нам̣ удайам̣ пассанто кхан̣ато тесам̣ удайадассанам̣ хоти, кхан̣ато етесам̣ удайам̣ пассато пагева паччайа̄нам̣ суггахитатта̄ паччайато дассанам̣ сукхена иджджхати, тасма̄ вуттам̣ ‘‘паччайасамудайам̣ пассантопӣ’’тиа̄ди. аттхан̇гамадассанепи есева найо. аччантаттхан̇гамоти аппаватти ниродхо нибба̄нанти. бхедаттхан̇гамоти кхан̣иканиродхо. тадубхайам̣ пуббабха̄ге уггахапарипуччха̄дивасена пассанто ан̃н̃атарасса дассане итарадассанампи сиддхамева хоти, пуббабха̄ге ча а̄рамман̣авасена кхайато вайасаммасана̄дика̄ле бхедаттхан̇гамам̣ пассанто атирекавасена ануссава̄дито аччантам̣ аттхан̇гамам̣ пассати. маггаккхан̣е пана̄рамман̣ато аччантааттхан̇гамам̣ пассати, асаммохато итарампи пассати. там̣ сандха̄йа̄ха ‘‘аччантаттхан̇гамам̣ пассантопӣ’’тиа̄ди. самудайаттхан̇гамам̣ ниббаттибхеданти самудайасан̇кха̄там̣ ниббаттим̣ аттхан̇гамасан̇кха̄там̣ бхедан̃ча. ниссайавасена̄ти чаккхусса санниссайавасена паччайам̣ катва̄. а̄рамман̣авасена̄ти рӯпе а̄рамман̣ам̣ катва̄. йам̣ панеттха ваттаббам̣, там̣ мадхупин̣д̣икасуттат̣ӣка̄йам̣ вуттанайена ведитаббам̣. тин̣н̣ам̣ сан̇гати пхассоти ‘‘чаккху рӯпа̄ни вин̃н̃а̄н̣а’’нти имесам̣ тин̣н̣ам̣ сан̇гати сама̄гаме ниббатти пхассоти вуттоти а̄ха ‘‘тин̣н̣ам̣ сан̇гатийа̄ пхассо’’ти. тин̣н̣анти ча па̄кат̣апаччайавасена вуттам̣, тадан̃н̃епи пана манасика̄ра̄дайо пхассапаччайа̄ хонтийева. еванти тан̣ха̄дӣнам̣ асесавира̄ганиродхаккамена. бхиннам̣ хотӣти ануппа̄даниродхена нируддхам̣ хоти. тена̄ха ‘‘аппат̣исандхийа’’нти.

дуккхасуттаван̣н̣ана̄ нит̣т̣хита̄.