5. авиджджа̄паччайасуттаван̣н̣ана̄

35. десанам̣ оса̄песӣти йатха̄раддхакатхам̣ т̣хапеси. таттха нисиннасса дит̣т̣хигатикасса ладдхийа̄ бхинданавасена упари катхетука̄мо. буддха̄нан̃хи десана̄ва̄рам̣ паччхинда̄петва̄ пуччхитум̣ саматтхо на̄ма кочи наттхи. тена̄ха ‘‘дит̣т̣хигатикасса ока̄сада̄наттха’’нти. дуппан̃хо есо саттӯпаладдхийа̄ пуччхитатта̄. саттӯпаладдхива̄дападена̄ти ‘‘сатто джӣво упалаббхатӣ’’ти евам̣ паваттадит̣т̣хидӣпакападавасена. ваданти етена̄ти ва̄до. дит̣т̣хи-саддо пана двайасан̇гахито, брахмачарийава̄со пана параматтхато арийамаггабха̄вана̄ти а̄ха ‘‘арийамаггава̄со’’ти. айам̣ дит̣т̣хӣти анан̃н̃е сарӣраджӣва̄ти дит̣т̣хи. ‘‘джӣво’’ти ча джӣвитамева ваданти. ват̣т̣анти дувидхам̣ ват̣т̣ам̣. ниродхентоти ануппаттидхамматам̣ а̄па̄денто. самуччхиндантоти аппаваттийам̣ па̄панена упаччхинданто. тадетам̣ маггена ниродхетаббам̣ ват̣т̣ам̣ нируджджхатӣти йоджана̄. ‘‘айам̣ сатто вина̄сам̣ абха̄вам̣ патва̄ саббасо уччхиджджатӣ’’ти евам̣ уччхедадит̣т̣хийа̄ гахита̄ка̄расса самбхаве саччабха̄ве сати. на хотӣти са̄ттхако на хоти.

гаччхатӣти сарӣрато никкхамитва̄ гаччхати. виват̣т̣ентоти аппаваттим̣ каронтоти аттхо. виват̣т̣етум̣ на саккоти ниччасса аппаваттим̣ па̄петум̣ асаккун̣еййатта̄. миччха̄дит̣т̣хи самма̄дит̣т̣хим̣ виджджхати асама̄хитапуггаласеванавасена татха̄ паваттитум̣ аппада̄навасена ча паджахитабба̄паджаханавасена самма̄дит̣т̣хим̣ виджджхати. висӯкамива̄ти кан̣д̣ако вийа. на кевалам̣ анануваттакова, атха кхо виродхопи ‘‘ничча’’нтиа̄дина̄ паваттанадхаммата̄йа вин̃н̃а̄панато. вирӯпам̣ бӣбхаччхам̣ пхандитам̣ виппхандитам̣. пан̣н̣апуппхапхалапаллава̄нам̣ аваттхубхӯто та̄ло ева та̄ла̄ваттху ‘‘асиве сива̄’’ти воха̄ро вийа. кечи пана ‘‘та̄лаваттхуката̄нӣ’’ти пат̣ханти, аваттхубхӯтата̄йа та̄ло вийа ката̄нӣти аттхо. тена̄ха ‘‘маттхакаччхинната̄ло вийа̄’’ти. ануабха̄ванти вина̄сам̣.

авиджджа̄паччайасуттаван̣н̣ана̄ нит̣т̣хита̄.