4. ан̃н̃атиттхийасуттаван̣н̣ана̄

24. соти са̄рипуттаттхеро. йади на та̄ва павит̣т̣хо, касма̄ ‘‘па̄висӣ’’ти вуттанти а̄ха ‘‘пависисса̄мӣ’’тиа̄ди. тена авассамбха̄вини бхӯте вийа упача̄ро хотӣти дассети. ида̄ни таматтхам̣ упама̄йа вибха̄венто ‘‘йатха̄ ки’’нтиа̄дима̄ха. атиппагойева никкхантадивасоти пакатийа̄ бхиккха̄чаран̣авела̄йа ативийа па̄то ева виха̄рато никкхантадивасабха̄го. етадахосӣти етам̣ ‘‘атиппаго кхо’’тиа̄дикам̣ чинтанам̣ ахоси. даккхин̣адва̄расса̄ти ра̄джагаханагаре даккхин̣адва̄расса вел̣уванасса ча антара̄ ахоси, тасма̄ ‘‘тенупасан̇камисса’’нти чинтана̄ ахосӣти адхиппа̄йо. ким̣ ва̄дӣти чатӯсу ва̄десу катарам̣ ва̄дам̣ вадаси. кимаккха̄йӣти тассева вевачанам̣. ким̣ вадатӣти пана чатта̄ро ва̄де са̄ман̃н̃ато гахетва̄ напум̣сакалин̇гена вадати йатха̄ ким̣ те джа̄талин̇гам̣. саббана̄ман̃хетам̣, йадидам̣ напум̣сакалин̇гам̣. вадати етена̄ти ва̄до, дассанам̣. там̣ сандха̄йа̄ха ‘‘ким̣ еттха…пе… дассананти пуччхантӣ’’ти. ‘‘дхаммапат̣исамбхида̄’’тиа̄дӣсу вийа дхамма-саддо хетуаттхоти а̄ха ‘‘йам̣ вуттам̣ ка̄ран̣ам̣, тасса анука̄ран̣а’’нти. ва̄дасса вачанасса ануппатти ва̄даппаватти.

идам̣ вачананти ‘‘екамида̄ха’’нтиа̄дивачанам̣. са̄ти ‘‘еке саман̣абра̄хман̣а̄ каммава̄да̄’’ти евам̣ паваттакатха̄. аччхарам̣ ан̇гулипхот̣анам̣ арахатӣти аччхарийам̣. аббхутанти нируттинайена падасиддхи дат̣т̣хабба̄. саббава̄да̄нанти саббесам̣ чатуббидхава̄да̄нам̣. пат̣хамо хеттха сассатава̄до, дутийо уччхедава̄до, татийо екаччасассатава̄до, чатуттхо адхиччасамуппаннава̄до, тесам̣ саббесам̣ пат̣иккхепато пат̣иккхепака̄ран̣ам̣ вуттам̣. пат̣иччасамуппа̄дакиттанам̣ ва̄ пачураджанан̃а̄н̣асса алаббханеййапатит̣т̣хата̄йа гамбхӣран̃чева, татха̄ авабха̄санато четаси упат̣т̣ха̄нато гамбхӣра̄вабха̄сан̃ча каронто. тадева паданти пхассападам̣йева а̄дибхӯтам̣ гахетва̄.

ан̃н̃атиттхийасуттаван̣н̣ана̄ нит̣т̣хита̄.