3. саман̣абра̄хман̣асуттаван̣н̣ана̄

13. йе паччайасамава̄йе тенаттабха̄вена сачча̄ни пат̣ивиджджхитум̣ саматтха̄, те ба̄хиракалин̇ге т̣хита̄пи тенева таттха саматтхата̄йогена бха̄винам̣ самитаба̄хитапа̄патам̣ апеккхитва̄ саман̣асаммата̄йева бра̄хман̣асаммата̄йева̄ти те ниваттетум̣ ‘‘сачча̄ни пат̣ивиджджхитум̣ асаматтха̄’’ти вуттам̣. дуккхасаччавасена̄ти дуккхаарийасаччавасена. ан̃н̃атха̄ катхам̣ ба̄хирака̄пи джара̄маран̣ам̣ дуккханти на джа̄нанти. саччадесана̄бха̄вато ‘‘саха тан̣ха̄йа̄’’ти вуттанти кечи. там̣ на сут̣т̣ху. йасма̄ таттха таттха бхаве пат̣хама̄бхиниббатти, идха джа̄тӣти адхиппета̄, са̄ ча тан̣ха̄ ева санта̄нена, тан̣хева са̄ джа̄ти. джара̄маран̣ан̃четтха па̄кат̣амева адхиппетам̣, на кхан̣икам̣, тасма̄ сатан̣ха̄ ева джа̄тиджара̄маран̣асса самудайоти бхӯтакатханаметам̣ дат̣т̣хаббам̣. самудайасаччавасена на джа̄нантӣти йоджана̄. еса найо сесападесупи. саббападесӯти йаттха тан̣ха̄ висесанабха̄вена ваттабба̄, тесу саббападесу. йена саманна̄гататта̄ пуггало параматтхато саман̣о бра̄хман̣оти вуччати, там̣ са̄ман̃н̃ам̣ брахман̃н̃ан̃ча̄ти а̄ха ‘‘арийа…пе… брахман̃н̃ан̃ча̄’’ти. йена хи паваттинимиттена саман̣а-саддо бра̄хман̣а-саддо ча саке аттхе нирул̣хо, тасса васена абхиннопи венеййаджджха̄сайато двидха̄ катва̄ ваттум̣ арахатӣти вуттам̣ ‘‘убхайаттха̄пӣ’’ти. ека̄дасасу т̣ха̄несу чатта̄ри сачча̄ни катхеси авиджджа̄самудайасса ануддхат̣атта̄.

саман̣абра̄хман̣асуттаван̣н̣ана̄ нит̣т̣хита̄.