5. а̄нандасуттаван̣н̣ана̄

225. ативеланти атибахука̄лам̣. бхиккхуна̄ на̄ма упагата̄нам̣ упанисиннакатха̄маттам̣ ватва̄ гантхадхурехи ва̄садхурехи ва̄ йуттапайуттачиттена бхавитаббам̣, на̄тивелам̣ тесам̣ сан̃н̃аттибахулена. тхеро пана тада̄ кеначи ка̄ран̣ена бахувелам̣ гихисан̃н̃аттибахуло ахоси, там̣ сандха̄йа вуттам̣ ‘‘ативела’’нтиа̄ди. ида̄ни таматтхам̣ вибха̄ветум̣ ‘‘бхагаватӣ’’тиа̄ди вуттам̣. танти там̣ та̄дисам̣ сан̃н̃а̄панам̣ сандха̄йа етам̣ ‘‘ативелам̣ гихисан̃н̃аттибахуло’’ти вачанам̣ вуттам̣. бхиккхусан̇гхасса катхам̣ сутва̄ти сан̇гхасса маджджхе нисӣдитва̄ тхерена катхитатта̄ вуттам̣. саттхуса̄сананти пит̣акаттайам̣ вадати.

пасаккийа̄ти упасаккитва̄ гантва̄. там̣ пана таттха аджджхога̄ханам̣ хотӣти а̄ха ‘‘пависитва̄’’ти. сан̇кха̄радуккхато ниббиннахадайасса саббасан̇кха̄равиниссат̣ам̣ нибба̄нам̣ йа̄тха̄вато паччавеккхантасса саммадева самасса̄сакарам̣ хутва̄ упат̣т̣хахантам̣ там̣ упари адхигама̄йа уссуккам̣ каронто нибба̄нам̣ хадайе никкхипати на̄ма̄ти а̄ха – ‘‘нибба̄нам̣…пе… опети на̄ма̄’’ти. нибба̄нам̣…пе… а̄рамман̣ато опети на̄ма̄ти а̄нетва̄ самбандхо. аттхавирахита̄ ‘‘бил̣ибил̣ӣ’’ти паваттакирийа̄ бил̣ика̄, айам̣ пана гихисан̃н̃аттикатха̄ тхерасса аттано са̄ман̃н̃аттхааса̄дханато девата̄йа бил̣ика̄ вийа̄ти бил̣ибил̣ика̄ти вутта̄.

а̄нандасуттаван̣н̣ана̄ нит̣т̣хита̄.