6. ануруддхасуттаван̣н̣ана̄

226. анантаре аттабха̄вети атӣта̄нантаре деваттабха̄ве. тхеро хи та̄ватим̣садевалока̄ чавитва̄ идхӯпапанно. аггамахесӣти ка̄чи парича̄рика̄ девадхӣта̄ читтапан̣идха̄наматтена ида̄нипи девака̄йе бхависсати упачитакусаладхамматта̄ти ман̃н̃ама̄на̄ тасмим̣ ваттама̄нам̣ вийа катхентӣ ‘‘собхасӣ’’ти а̄ха. евам̣ атӣтамписса диббасотам̣ паччуппаннам̣ вийа ман̃н̃еййа на̄тичирака̄латта̄ти дассенто ‘‘пуббепи собхасӣ’’ти а̄ха. сугатинирайа̄дидуггатийа̄ васена дуггата̄ етарахӣти адхиппа̄йо. пат̣ипаттидуггатийа̄ ка̄месу саммуччхитабха̄вато.

патит̣т̣хахантоти нивисанто. ат̣т̣хахи ка̄ран̣ехӣти чирака̄лапарибха̄вана̄йа вирул̣хамӯлехи айонисоманасика̄ра̄дипаччайамӯлакехи вуччама̄нехи ат̣т̣хахи ка̄ран̣ехи. ратто ра̄гавасена̄ти сабха̄вато сан̇каппато ча йатха̄самӣхите ит̣т̣ха̄ка̄ре сакка̄йе сан̃джа̄тара̄гаваса̄ ратто гиддхо гадхито. патит̣т̣ха̄тӣти оруйха тит̣т̣хати. дут̣т̣хо досавасена̄ти сабха̄вато сан̇каппато ча йатха̄самӣхите анит̣т̣ха̄ка̄ре сакка̄йе сан̃джа̄тадосавасена дут̣т̣хо рупитачитто. мӯл̣хо мохавасена̄ти асамапеккханена мӯл̣хо муйханавасена. винибаддхоти ахам̣ка̄рена висесато нибандханато ма̄наваттхусмим̣ бандхито. ма̄навасена̄ти тена тена ман̃н̃ана̄ка̄рена. пара̄мат̣т̣хоти дхаммасабха̄вам̣ ничча̄дивасена парато а̄мат̣т̣хо. дит̣т̣хивасена̄ти миччха̄дассанавасена. тха̄магатоти ра̄га̄дикилесавасена тха̄мам̣ тхирабха̄вам̣ упагато. анусайавасена̄ти маггена аппахӣната̄йа ану ану санта̄не сайанавасена. аппахӣнат̣т̣хо хи тесам̣ анусайат̣т̣хо. анит̣т̣хан̇гатоти сам̣сайито. виккхепагатоти виккхиттабха̄вам̣ упагато. уддхаччавасена̄ти читтасса уддхатабха̄вавасена. та̄пӣти та̄пи девакан̃н̃а̄йо. евам̣ патит̣т̣хита̄ва̄ти йатха̄вуттанайена раттабха̄ва̄дина̄ сакка̄йасмим̣ патит̣т̣хита̄ ева. нарадева̄нанти пурисабхӯтадева̄нам̣.

пат̣игантунти апеккха̄васена тато апагантум̣ апеккхам̣ виссаджджетум̣. дуссантанти дасантам̣, ‘‘ваттха’’нти кечи. сӯчим̣ йоджетва̄ти сиббанасуттена сӯчим̣ йоджетва̄ па̄се ча павесетва̄. мана̄пака̄йе деваника̄йе джа̄та̄ мана̄пака̄йика̄. тесам̣ пабха̄вам̣ дассетум̣ ‘‘манаса̄’’тиа̄ди вуттам̣. самаджджанти сам̣хитам̣. гаманабха̄ванти гаманаджджха̄сайам̣. виккхӣн̣оти виччхинданавасена кхӣн̣о. девата̄нам̣ уттаримануссадхамма̄рочане досо наттхӣти та̄сам̣ пуна ана̄гаманаттхам̣ арахаттам̣ бйа̄ка̄си.

ануруддхасуттаван̣н̣ана̄ нит̣т̣хита̄.