7. субрахмасуттаван̣н̣ана̄

98. субрахма̄ти тасса девапуттасса на̄мам̣. тасса саттху сантикӯпасан̇каманасса ка̄ран̣ам̣ дассенто ‘‘со кира̄’’тиа̄дима̄ха. тадева сокам̣ тасса девапуттасса ат̣т̣хуппатти. аччхара̄сан̇гхапаривутоти сахассаматтена аччхара̄сан̇гхена паривуто. нанданакӣл̣иканти нанданаванакӣл̣икам̣. хаттхам̣ а̄гаччхатӣти хаттхагайхупаго хоти. гантхентӣти еттха ма̄ла̄вет̣ханампи кхид̣д̣а̄пасутата̄йа̄ти дат̣т̣хаббам̣. ан̃н̃атха̄ пуппха̄нийева та̄йа та̄йа читтасса васена ма̄ла̄бха̄вена хаттхам̣ упагаччхантӣти. упаччхедакакаммавасена̄ти тасмим̣ девалоке а̄йусесе сати ева тасса пана упагха̄такасса ладдхока̄сасса па̄пакаммасса васена. ‘‘паха̄ро’’ти дивасасса татийо бха̄го вуччати, тасма̄ екаппаха̄ренева̄ти екавела̄йамева̄ти аттхо.

пийаваттхукасокена̄ти пийаваттхунимиттакена сокена. руппама̄ноти пӣл̣ийама̄но. саттаме дивасети мануссаган̣ана̄йа саттаме дивасе. таттхева̄ти тасмим̣йева нирайе ниббаттитаббам̣ имина̄ та̄хи ча сахева пуббе тасса па̄пакаммасса кататта̄. руппӣти читтасанта̄сам̣ а̄паджджи. ниддхамитунти нӣхаритум̣ апанетум̣. саттху сантикам̣ гантва̄ти та̄хи пан̃часата̄хи аччхара̄хи саддхим̣ бхагавато сантикам̣ гантва̄.

иданти аттано читтам̣ дассети а̄саннапаччаккхабха̄вато. ниччанти сада̄. сва̄йам̣ ниччаттхо адхиппа̄йавасена гахетабботи таттха паха̄таббам̣ гахетаббан̃ча дассенто ‘‘девалоке’’тиа̄дима̄ха. на гахетаббо хетупаваттито пуббе тасса утра̄сасса абха̄вато. тесӯти дуккхесу. та̄ни хи хетупаччайехи каттаббато га̄тха̄йам̣ ‘‘киччхесӯ’’ти вутта̄ни. киччхесӯти ва̄ киччханимиттам̣. йа̄сан̃хи пайогавипаттӣнам̣ васенасса та̄ни дуккха̄ни уппаджджеййум̣, там̣нимиттанти аттхо. та̄ хи асса пайогавипаттийо гативипаттийо саттху сантикам̣ упагаманена ха̄йеййум̣. ниббатта̄нам̣ дит̣т̣ха̄нӣти ниббатта̄нам̣ васена дит̣т̣ха̄ни дуккха̄ни. тесу ча дуккхесу. саббаттха нимиттаттхе бхуммам̣. д̣айхама̄но вийа читтасанта̄пена.

чатта̄рипи сачча̄ни буджджхати пат̣ивиджджхатӣти бодхи, сатиа̄дидхаммаса̄маггӣ, тасма̄ боджджха̄ бодхито. са̄ пана бодхи бха̄вана̄ка̄ренева паваттати, ан̃н̃атрасаддайогена ча ‘‘боджджха̄’’ти ниссаккавачананти тадаттхам̣ дассенто мун̃читва̄падам̣ апеккхитва̄ ‘‘боджджхан̇габха̄вана’’нти а̄ха. тапогун̣анти дхутадхаммама̄ха. со хи тан̣ха̄лолуппасса тапанато тапо, сайам̣ гун̣асабха̄ватта̄ гун̣асанниссайато ча гун̣анти. тена̄ха ‘‘дхутан̇гасан̇кха̄там̣ тапогун̣а’’нти. саббе сан̇кха̄рагата̄ ниссаджджӣйанти еттха̄ти саббаниссагго, асан̇кхатадха̄тӯти а̄ха ‘‘саббаниссагга̄ти нибба̄нато’’ти.

индрийасам̣варова пат̣хамам̣ ведитаббо пат̣ипаттиккамавасена тассева пат̣хаматта̄. там̣ пана пат̣ипаттиккамам̣ дассетум̣ ‘‘индрийасам̣варе хӣ’’тиа̄дима̄ха. ниппарийа̄йато маггапарийа̄панна̄ ева боджджхан̇га̄ти а̄ха ‘‘сахавипассана̄йа боджджхан̇ге’’ти. тасса̄ти татха̄бха̄вена тасса йогино. йасма̄ девапуттасса саттха̄ там̣ га̄тхам̣ ватва̄ упари ча сачча̄ни пака̄сеси, тасма̄ вуттам̣ ‘‘бхагава̄ чатусаччавасена десанам̣ виниваттесӣ’’ти. девапутто сота̄паттипхале патит̣т̣хахӣти ка̄мам̣ тассева висеса̄дхигамо идха̄гато, пан̃часатаматта̄хи пана аччхара̄хи саддхим̣ сота̄паттипхале патит̣т̣хахӣти ведитаббам̣. тена̄ха маха̄сатипат̣т̣ха̄насуттаван̣н̣ана̄йам̣ (дӣ. ни. ат̣т̣ха. 2.373; ма. ни. ат̣т̣ха. 1.106) ‘‘со десана̄парийоса̄не пан̃чахи аччхара̄сатехи саддхим̣ сота̄паттипхале патит̣т̣ха̄йа там̣ сампаттим̣ тха̄варам̣ катва̄ девалокамева агама̄сӣ’’ти.

субрахмасуттаван̣н̣ана̄ нит̣т̣хита̄.