1. пат̣хамакассапасуттаван̣н̣ана̄

82. девасса путто девапутто. дева̄нам̣ джанакаджанетаббасамбандха̄бха̄вато катхамайам̣ девапуттоти вуччатӣти а̄ха ‘‘дева̄нам̣ хӣ’’тиа̄ди. ‘‘апа̄кат̣о ан̃н̃атароти вуччатӣ’’ти идам̣ йебхуййавасена вуттам̣. па̄кат̣опи хи каттхачи ‘‘ан̃н̃атаро’’ти вуччати. хет̣т̣ха̄ девата̄сам̣йутте ‘‘апа̄кат̣а̄ ан̃н̃атара̄ девата̄’’ти ватва̄ идха ‘‘па̄кат̣о девапутто’’ти вуттам̣. татха̄ хисса кассапоти готтана̄мам̣ гахитам̣, тан̃ча кхо пуримаджа̄тисиддхасаман̃н̃а̄васена. ануса̄санам̣ ануса̄со, там̣ ануса̄сам̣. бхиккхуниддесанти бхиккхусаддасса ниддесам̣. бхиккхуова̄данти бхиккхубха̄ва̄вахам̣ ова̄дам̣. йади пана на ассоси, катхамайам̣ пан̃хам̣ катхесӣти? ан̃н̃ато сутам̣ нисса̄йа пан̃хам̣ катхеси, на пана бхагавато саммукха̄ сутабха̄вена.

тесанти йатха̄вутта̄нам̣ тин̣н̣ам̣ пуггала̄нам̣. ‘‘катхетука̄мо чева̄’’тиа̄дина̄ хи чатуттхам̣ идха уддхат̣ам̣. таттха а̄дито тин̣н̣ам̣ бхагава̄ пан̃хам̣ бха̄рам̣ на кароти екекан̇гавекаллато чева ан̇гадвайавекаллато ча, чатуттхасса пана убхайан̇гапа̄рипӯратта̄ бха̄рам̣ каротӣти а̄ха ‘‘айам̣ пана̄’’тиа̄ди.

га̄тха̄йам̣ ‘‘субха̄ситасса̄’’ти упайогаттхе са̄мивачананти а̄ха ‘‘субха̄ситам̣ сиккхеййа̄’’ти. чатусачча̄динисситам̣ буддхавачанам̣ сиккханто чатуббидхам̣ вачӣсучаритам̣ сиккхати на̄ма̄ти а̄ха ‘‘чатусаччанисситам̣…пе… сиккхеййа̄’’ти. авадха̄ран̣ена таппат̣ипаккхам̣ пат̣иниваттети. упа̄ситаббанти а̄севитаббам̣ бха̄ветаббам̣ бахулӣка̄таббам̣. ат̣т̣хатим̣сабхедам̣ каммат̣т̣ха̄нанти идам̣ тасса випассана̄падат̣т̣ха̄натам̣ хадайе т̣хапетва̄ вуттам̣. татха̄ хи вуттам̣ ‘‘дутийападена адхипан̃н̃а̄сиккха̄ катхита̄’’ти. йе пана ‘‘дутийападена адхичиттасиккха̄ читтавӯпасамена адхипан̃н̃а̄сиккха̄’’ти пат̣ханти, тесам̣ падена ат̣т̣хатим̣саппабхедакаммат̣т̣ха̄нам̣ суддхасаматхакаммат̣т̣ха̄нассева гахан̣ам̣ дат̣т̣хаббам̣. йади евам̣ ‘‘ат̣т̣хасама̄паттивасена̄’’ти идам̣ катханти? ‘‘там̣ випассана̄дхит̣т̣ха̄на̄нам̣ сама̄паттӣнам̣ васена катхита’’нти ваданти. еван̃ча катва̄ ‘‘дутийападена адхипан̃н̃а̄сиккха̄’’ти идам̣ вачанам̣ саматтхитам̣ хоти. сиккханам̣ на̄ма а̄севананти а̄ха ‘‘бха̄веййа̄ти аттхо’’ти. упа̄сананти пайирупа̄санам̣. тан̃ча кхо ассутапарийа̄пун̣анакаммат̣т̣ха̄нуггаха̄дивасена дассенто ‘‘тампӣ’’тиа̄дима̄ха. адхисӣласиккха̄ катхита̄ лаккхан̣аха̄ранайена. вачӣсучаритасса хи сӣласабха̄ватта̄ таггахан̣енева тадекалаккхан̣ам̣ ка̄йасучаритампи итарампи гахитамева̄ти. еттха ча адхисӣласиккха̄йа читтавивеко, адхипан̃н̃а̄сиккха̄йа упадхививеко, адхичиттасиккха̄йа ка̄йавивеко катхито, ка̄йавивеко пана сарӯпенева па̄л̣ийам̣ гахитоти тивидхассапи вивекасса пака̄ситаттам̣ дат̣т̣хаббам̣. сесам̣ сувин̃н̃еййамева.

пат̣хамакассапасуттаван̣н̣ана̄ нит̣т̣хита̄.